މި ސަރުކާރާއި މެދު ރައްޔިތުންގެ ހިތުގައި އޮތް ކުޑަކުޑަ އުންމީދުގެ ހުޅުކޮޅު ވެސް 2025ގެ ބަޖެޓާއި އެކު ނިވިއްޖެ - އިހުސާން
ސަރުކާރުގެ މަޤްސަދު ހާސިލްވާކަން މިނެކިރާނެ ގޮތެއް ވެސް ނެތް ކަމަށް އޭނާ ފާހަގަކުރެއްވި
އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން
2025ގެ ބަޖެޓާއި އެކު މި ސަރުކާރާއި މެދު ރައްޔިތުންގެ ހިތުގައި އޮތް ކުޑަކުޑަ އުންމީދުގެ ހުޅުކޮޅު ވެސް ނިވިފައިވާ ކަމަށް އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީގެ ހަރުގެ ޖަލްސާގައި ވާހަކަދައްކަވަމުންނެވެ. 2025 ވަނަ އަހަރަށް 56,647,600,859 (ފަންސާސް ހަ ބިލިއަން، ހަސަތޭކަ ސާޅީސް ހަތް މިލިއަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާގެ ބަޖެޓެއް ސަރުކާރުން ވަނީ ހުހުށަހަޅާފައެވެ. އެ ބަޖެޓާއި އެކު ވެސް ރައްޔިތުން ރާއްޖެ ކުރިއަރައިދިއުމަށް ކުރާ އުންމީދު އެއްކޮށް ފަނޑުވެގެން ދިޔަ ކަމަށް އޭނާ ވިދާޅުވިއެވެ. މީގެ އިތުރުން މި ސަރުކާރުން ވެރިކަމަށް އައުމަށްޓަކާ ވީ ހުރިހާ ވައުދެއް ބޮލާލާ ޖަހާފައިވާ ކަމަށް އޭނާ ވިދާޅުވިއެވެ. އެގޮތުން ދަރިވަރުންނަށް ވީ ވައުދުތަކާއި، ގޯތި ގެދޮރާއި މެދުވީ ވައުދުތައް ސަރުކާރުން ހަނދާން ނައްތާލާފައިވާ ކަމަށް އިހުސާން ވިދާޅުވިއެވެ.
އިހުސާން އިތުރަށް ވިދާޅުވީ ދަރިންގެ މުސްތަޤްބަލާ މެދު ވިސްނާލާ ނަމަ 2025ގެ ބަޖެޓުން ފެންނަނީ ނާއުންމީދާއި، ޝައްކު ކަމަށް އޭނާ ވިދާޅުވިއެވެ. އެ ބަޖެޓުން އެނގެނީ ތަންދޮރު ނުދަންނަ ބަޔަކު ބަޖެޓް އެކުލަވާލިކަން ކަމަށް ވެސް އިހުސާން ވިދާޅުވިއެވެ. ސަރުކާރަށް އަހަރެއްވީ އިރު ސަރުކާރުގެ ލަނޑުދަނޑިތައް ވެސް ސާފު ނުވާ ކަމަށް އިހުސާން ވަނީ ވިދާޅުވެފައެވެ. ސަރުކާރުގެ މަޤްސަދު ހާސިލްވާކަން މިނެކިރާނެ ގޮތެއް ވެސް ނެތް ކަމަށް އޭނާ ފާހަގަކުރެއްވިއެވެ. އިހުސާން ވަނީ ތާކުންތާކު ނުޖެހޭ ރޭވުންތެރިކަމެއް ނެތް ސަރުކާރެއްގެ ކިބައިން ފެންނާނީ މިކަހަލަ ބަޖެޓެއް ކަމަށް ވިދާޅުވެފައެވެ. އަދި ބަޖެޓުގައި ދިމާނުވާ އެތައް ކަމެއް ހުރި ކަމަށް އޭނާ ވަނީ ވިދާޅުވެފައެވެ.
ބަޖެޓާއި ގުޅޭގޮތުން ފިނޭންސް މިނިސްޓަރ މޫސާ ޒަމީރު ވިދާޅުވީ 2025 ވަނަ އަހަރުގެ ބަޖެޓުގައި ސިއްހީ ނިޒާމަށް ބޭނުންވާ މުހިންމު މަޝްރޫއުތަކެއް ހިމަނާފައިވާނެ ކަމަށެވެ. އަދި އަންނަ އަހަރަށް ލަފާކުރާ ބަޖެޓުގައި ފާހަގަކޮށްލެވޭ ސިއްހީ ދާއިރާއަށް ހާއްސަކޮށްފައިވާ މަޝްރޫއުތަކުގެ ތެރޭގައި ކެންސަރުގެ ފަރުވާއަށް ހާއްސަ ހޮސްޕިޓަލަކާއި މެންޓަލް ހެލްތު ހޮސްޕިޓަލެއް ގާއިމުކުރުން ހިމެނޭ ކަމަށެވެ. އަދި އެކިރަށްރަށުގައި ހެލްތު ސެންޓަރުތަކާއި ހޮސްޕިޓަލުތަކުން ލިބޭ ހިދުމަތްތައް ފުޅާކުރުމާއެކު އެތަންތަން ތަރައްގީކުރުމަށްވެސް މި ބަޖެޓުގައި އިސްކަންދީފައިވާނެ ކަމަށް މިނިސްޓަރު ވިދާޅުވިއެވެ.
