248 ސިޔާސީ މުވައްޒަފުން ވަކިކޮށްފި ކަމަށް ބުނެފި، ވަކި ކުރީ ކޮން ބައެއް ކަމެއް ނުބުނޭ
ވަކި ކުރީ ކޮން ބައެއްކަން އެނގޭނެ އެއްވެސް މައުލޫމާތެއް ސަރުކާރުން ހާމަކޮށްފައެއް ނުވޭ
ރައީސް މުއިއްޒު އާއި ސަރުކާރުގެ ވެރިން - މަތިބަރު ސަރުކާރެއްގެ ގޮތުގައި މުއިއްޒުގެ ސަރުކާރު ވަނީ ފާހަގަ ކުރެވިފައި
ޚަރަދު ކުޑަކުރުމުގެ ސިޔާސަތުގެ ދަށުން މިހާތަނަށް 248 ސިޔާސީ މުވައްޒަފުން މަގާމުން ވަކިކޮށްފައިވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު މިއަދު ވިދާޅުވެއްޖެއެވެ.
ސިޔާސީ މަގާމުތަކަށް މީހުން އައްޔަން ކުރުމާއި ވަކި ކުރުމަކީ މީގެ ކުރިން އާންމުކޮށް އަންގާ އިއުލާނު ކުރާ މައުލޫމާތު ކަމަށް ވިޔަސް، 248 ސިޔާސީ މުވައްޒަފުން މަގާމުން ވަކި ކޮށްފި ކަމަށް ބުނުން ފިޔަވާ ވަކި ކުރީ ކޮން ބައެއްކަން އެނގޭނެ އެއްވެސް މައުލޫމާތެއް ސަރުކާރުން ހާމަކޮށްފައެއް ނުވެއެވެ.
އޮކްޓޯބަރު 15 ވަނަ ދުވަހު ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ކުރިއަށް އޮތް 15 ދުވަހުގެ ތެރޭގައި 228 ސިޔާސީ މުވައްޒަފުން ވަކިކުރަން ނިންމެވި ކަމަށެވެ. އަދި ސިޔާސީ މަގާމުތަކުން ވަކިކުރަން ނިންމެވީ، އިގްތިޞާދީ ސިޔާސަތު އިސްލާހުކުރުމުގެ ތެރެއިން ޚަރަދުކުޑަކުރުމުގެ ގޮތުން އަޅަން ނިންމެވި ފިޔަވަޅެއްގެ ގޮތުން ކަމަށްވެސް ވިދާޅުވިއެވެ.
"ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ޚަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން، މިހާތަނަށް 31 އޮކްޓޯބަރު 2024 ގެ ނިޔަލަށް 248 ސިޔާސީ މުވައްޒަފުންވަނީ މަދުކުރެވިފައި." ކަމަށް ހުކުރު ދުވަހު ހަވީރު ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވެފައިވެއެވެ.
އޭގެ އިތުރުން ސިޔާސީ މުވައްޒަފުންގެ މަސައްކަތުގެ ފެންވަރު ބަލާ، ސިޔާސީ މުވައްޒަފުންގެ ޕަރފޯމަންސް ބަލާނެ ނިޒާމެއް ޤާއިމް ކުރުމަށް ކެބިނެޓުން މިހާރު ވަނީ ނިންމާފައި ވާ ކަމަށާއި، މިނިޒާމަށް ވަރަށް އަވަހަށް ޢަމަލު ކުރަން ފަށާނެ ކަމަށްވެސް ހީނާގެ ޕޯސްޓުގައި ވެއެވެ.
ސިޔާސީ މަގާމުތަކަކުން ބަޔަކު ވަކި ކުރި ކަމަށް ސަރުކާރުން ހާމަކުރި އިރު، ނޫސްވެރިން ތަކުރާރުކޮށް އެހުމުންވެސް ޑރ. މުއިއްޒުގެ ސަރުކާރުގައި އުފައްދާފައިވަނީ ކިތައް ސިޔާސީ މަގާމު ކަމެއް ސަރުކާރުން ހާމަކޮށްފައެއް ނުވެއެވެ.
ސިޔާސީ މަގާމުތަކުން މީހުން ވަކި ކުރީ ޚަރަދު ކުޑަކުރުމުގެ ގޮތުން ކަމަށް ސަރުކާރުން ބުނާއިރު، އަނެއްކޮޅުން 2025 ވަނަ އަހަރަށް ދައުލަތުން ހުށަހެޅި ބަޖެޓުގައި މުވައްޒަފުންގެ މުސާރަ އާއި އުޖޫރައިގެ ގޮތުގައި ހިމަނާފައިވާ އަދަދު ހިނގަމުންދާ އަހަރަށް ވުރެ ބޮޑުކަން ވަނީ ފާހަގަ ކުރެވިފައެވެ.
