ވަކި ކުރި ކަމަށް ބުނާ ސިޔާސީ މުވައްޒަފުން އެހެން މިނިސްޓްރީތަކަށް!
15 ދުވަސް ތެރޭގައި މުވައްޒަފުން ވަކި ކުރިކަމުގެ ތަފްސީލުދޭނެކަމަށް ބުނިނަމަވެސް ތަފްސީލެއް ދީފައި ނުވޭ
ރައީސް މުއިއްޒު މި ސަރުކާރުގެ ސިޔާސީ އިސް މަގާމުތަކުގައި ތިބި ފަރާތްތަކާއެކު
15 ދުވަސް ތެރޭގައި 228 ސިޔާސީ މުވައްޒަފުން ވަޒީފާއިން ވަކިކޮށް އެކަން ހާމަކުރާނެކަމަށް ބުނި ނަމަވެސް، އެ މުވައްޒަފުންނަށް އެހެން މިނިސްޓްރީތަކުން ވަޒީފާދީފައިވާކަމާއި އަދި ބައެއް މިނިސްޓްރީ ތަކުގައި އެ މުވައްޒަފުން ވަކިކުރުމަށްފަހު ޖެހިގެން އަންނަދުވަހު ހަމަ އެ މިނިސްޓްރީން އަލުން ވަޒީފައި ދޭކަން ހާމަވެއްޖެއެވެ. ހަމަ އެއާއެކު މި ގޮތަށް ވަކިކުރާ ބައެއް ފަރާތް ތަކަށް ސަރުކާރުގެ ކުންފުނިތަކުން ވަޒީފާ ދެމުން ވެސް އެބަގެންދެއެވެ.
ސަރުކާރުގެ ޚަރަދު ކުޑަކުރުމުގެ ގޮތުން އެކުލަވާލާފައިވާ "އިކޮނޮމިކް ރީފޯމް އެޖެންޑާ"ގެ ދަށުން އެކި މިނިސްޓްރީތަކުގައި ސިޔާސީ މަޤާމުތަކުގައި ތިއްބެވި 228 މުވައްޒަފުން މަޤާމުން ވަކިކުރެއްވުމަށް ނިންމަވާފައިވާކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެފައިވަނީ މިދިޔަ އޮކްޓޯބަރު މަހުގެ 15 ވަނަ ދުވަހުއެވެ.
ރައީސުލްޖުމްހޫރިއްޔާގެ މި ނިންމެވުމާ ގުޅިގެން، 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުންނާއި، 109 ސީނިއަރ ޕޮލިޓިކަލް ޑިރެކްޓަރުންނާއި، 69 ޕޮލިޓިކަލް ޑިރެކްޓަރުން، ކުރިއަށް އޮތް 15 ދުވަހުގެ ތެރޭގައި މަޤާމުން ވަކިކުރުމަށް ވަނީ ހަމަޖެހިފައެވެ. މި ފިޔަވަޅާއެކު، ސަރުކާރުގެ ޚަރަދުތަކުން، މަހަކު 5.714 (ފަހެއް ޕޮއިންޓް ހަތެއް އެކެއް ހަތަރެއް މިލިޔަން) ރުފިޔާ ސަލާމަތްކުރެވޭނެކަމަށް ސަރުކާރުން އެއިރު ބުނެފައިވެއެވެ.
މިފަފަ ބޮޑު ބަދަލެއް ގެންނަވަން ރައީސުލްޖުމްހޫރިއްޔާ ނިންމެވީ، ޚަރަދުތައް ބެލެހެއްޓުމުގެ ޤާބިލުކަން އިތުރުކުރުމަށާއި، ސަރުކާރުގެ ހިންގުން ހަރުދަނާ ކުރެއްވުމަށް ރައީސުލްޖުމްހޫރިއްޔާ ގެންގުޅުއްވާ ވިސްނުންފުޅުގެ ތެރެއިން ކަމަށް ވެސް ސަރުކާރުން އެއިރު ބުނެފައިވެއެވެ.
ނަމަވެސް ސިޔާސީ މަގާމުތަކުގެ އަދަދާއި، ދައުލަތުން އެކަމަށް ކުރާ ހޭދަ މީގެކުރިންވެސް ދޭން ދެކޮޅު ހެދި މި ސަރުކާރުން 15 ދުވަސް ހަމަވިއިރުވެސް އެ މައުލޫމާތެއް ހާމަނުކުރެއެވެ. އެ މައުލޫމާތު ދީފައިވަނީ 16 ވަނައަށްވީ ދުވަހުއެވެ.
ރައީސް އޮފީހުގެ ތަރުޖަމާނު ހުކުރު ދުވަހު މެންދުރުފަހު އެކްސްގައި އެއްވެސް ތަފްސީލެއް ނެތި ކުރެއްވި ޕޯސްޓެއްގައި ވިދާޅުވީ ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ޚަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން، މިހާތަނަށް 31 އޮކްޓޯބަރު 2024 ގެ ނިޔަލަށް 248 ސިޔާސީ މުވައްޒަފުން މަދުކުރެވިފައިވާ ކަމަށެވެ. ހަމަ އެއާއެކު ސިޔާސީ މުވައްޒަފުންގެ މަސައްކަތުގެ ފެންވަރު ބަލާ، ކުރުންތެރިކަން އިތުރު ކުރުމަށް ސިޔާސީ މުވައްޒަފުންގެ ޕަރފޯމަންސް ބަލާނެ ނިޒާމެއް ޤާއިމް ކުރުމަށް ކެބިނެޓުން މިހާރު ވަނީ ނިންމާފައި ކަމަށާއި، މިނިޒާމަށް ވަރަށް އަވަހަށް ޢަމަލު ކުރަން ފަށާނެ ކަމަށެވެ.
މުވައްޒަފުން ވަޒީފާއިން ވަކިކުރިކަމަށް ހީނާ ވިދާޅުވިނަމަވެސް، ނަންނުޖެހުމަށް ޝަރުތުކޮށް ބައެއް މިނިސްޓްރީތަކުގެ އިސް މުވައްޒަފުން ރާއްޖެއެމްވީއަށް މައުލޫމާތުދެމުން ބުނެފައިވަނީ މިދިޔަ ދުވަސްތަކުގައި ސިޔާސީ މުވައްޒަފުންތައް ވަޒީފާއިން ވަކިކޮށް، ޖެހިގެން އައި ދުވަހު އެހެން މިނިސްޓްރީއަަކަށް ވަޒީފާއައް ވައްދާފައިވާ ކަމަށެވެ. އަދި މުވައްޒަފުން ވަޒީފާއިން ވަކިކުރާނަމަ އެކަން ލިޔެކިޔުމުގައި ހިމެނޭނެ ކަމަށާއި، ސަރުކާރުން ސިޔާސީ މުވައްޒަފުން ވަކިކުރިކަމަށް ދައްކަން ވެގެން އެގޮތަށް އަމަލުކޮށްފައިވާ ކަމަށެވެ.
މީގެ އިތުރުން ވަޒީފާއިން ވަކިކުރި މުވައްޒަފުން އެހެން މިނިސްޓްރީތަކަށް ބަދަލުކޮށްފައިވާއިރު، މަގާމުތަކަށް ވެސް އެއްވެސް ބަދަލެއް އައިސްފައި ނުވާކަމަށް ވާހަކަ ދެއްކި މުވައްޒަފުން ވަނީ ބުނެފައެވެ.
ސިޔާސީ މުވައްޒަފުން ވަކިކުރަން ނިންމިކަން ރައީސް އިއުލާންކުރެއްވިތާ 14 ވަނައަށްވި މިދިޔަ ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ހީނާ ވިދާޅުވީ 228 ސިޔާސީ މުވައްޒަފުން މަގާމުން ވަކިކުރަން ނިންމާފައިވާ ކަމަށް ރައީސް ވިދާޅުވެފައިވާ ކަމަށެވެ. އަދި އެކަން ކުރައްވާނީ 15 ދުވަސް ތެރޭގައި ކަމަށެވެ. އަދި ވަގުތު ހަމަވުމުން މީޑިއާތަކަށް އެ މައުލޫމާތު ހާމަކުރައްވާނެ ކަމަށެވެ. އަދި ސިޔާސީ މުވައްޒަފުންގެ އަދަދުވެސް ހާމަކުރައްވާނެ ކަމަށެވެ.
ރާއްޖެއެމްވީއަށް އިތުބާރު ހުރިގޮތަކަށް މައުލޫމާތު ލިބިފައިވަނީ މުވައްޒަފުން ވަޒީފާއިން ވަކިކުރުމުގެ ނަމުގައި މިނިސްޓްރީތައް ބަދަލުކުރާ މައްސަލައިގައި ވަނީ ސަރުކާރުގެ ތެރޭގައި ނުތަނަވަސްކަން އުފެދިފައެވެ.
