ދަ ޑެމޮކްރެޓްސް އިން މަޖިލީސް އިންތިޚާބަށް ކުރިމަތިލި ލީލާ އަށް އެންވަޔަރަންމަންޓުގެ ސިޔާސީ މަގާމެއް

އެންވަޔަރަންމަންޓް މިނިސްޓްރީގެ ސީނިއަރ ޕޮލިޓިކަލް ޑިރެކްޓަރ ގެ މަގާމު ލީލާ އިބްރާހީމް މަނިކަށް ރައީސް މުހައްމަދު މުއިއްޒު ދެއްވައިފިއެވެ.

ލީލާ އަކީ ނިމިދިޔަ ރައްޔިތުންގެ މަޖިލިސް އިންތިޚާބުގައި ދަ ޑެމޮކްރެޓްސް ޓިކެޓްގައި ގުރައިދޫ ދާއިރާއަށް ވާދަކުރުމަށް ނުކުތުމަށް ފަހު ކެމްޕޭންގެ ވަކި ހިސާބަކުން އިންތިޚާބުން ވަކިވެ، އެ ދާއިރާ އަށް ސަރުކާރު ހިންގާ ޕާޓީ ކަމުގައިވާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޓިކެޓްގައި ވާދަކުރި ކެންޑިޑޭޓަށް ތާއީދުކުރަން ނިންމި ފަރާތެކެވެ.

ސިޔާސީ މަގާމުތަކަށް އައްޔަން ކުރާ ފަރާތްތަކުގެ މައުލޫމާތު ސަރުކާރުން ހާމަ ނުކުރާތީ ލީލާ އަށް މަގާމު ދެއްވި ތާރީޚް ސާފުވާގޮތް ވަނީ ނުވެފައެވެ. އެހެން ނަމަވެސް އޭނާ އަށް މަގާމު ހަމަޖެއްސެވީ މި ޑިސެމްބަރު މަހުގެ ތެރޭގައި ކަމަށާއި މިހާރު އެންވަޔަރަންމަންޓް މިނިސްޓްރީ އަށް ވަޒީފާ އަށް ނުކުންނަވާ ކަމުގެ މައުލޫމާތު ވަނީ ލިބިފައެވެ.

ސަރުކާރުގެ ސިޔާސީ މަގާމުތައް އިންތިހާ އަށް ގިނަވެ އެކަމުގެ ފާޑު ކިޔުން ސަރުކާރަށް ވަނީ ވަރަށް ބޮޑަށް އަމާޒު ވެފައެވެ. ސަރުކާރުގެ ސިޔާސީ މަގާމު ތަކުގެ އަދަދު 700 ށް ވުރެ މައްޗަށް ނުދާނޭ ކަމަށް ކެމްޕޭންގައި ޑރ. މުއިއްޒު ވިދާޅުވި ނަމަވެސް ސިޔާސީ މަގާމުތަކުގެ އަދަދު 2000ން މައްޗަށް ގޮސްފައިވާނެ ކަމަށް ބައެއް މީޑިއާ ރިޕޯޓުތަކުގައި ފާހަގަ ކޮށްފައިވެއެވެ. ސަރުކާރުން މިހާތަނަށް ސިޔާސީ މަގާމުތަކުގެ އަދަދު ހާމަ ކުރުމަށް ވަނީ ފަސް ޖެހިފައެވެ.

އަނެއްކޮޅުން ސަރުކާރުގެ ހިންގުމުގެ ޚަރަދުގެ އެންމެ ބޮޑު އެއްޗެއް ހޭދަ ކުރަން ޖެހިފައިވަނީ މުވައްޒަފުންގެ މުސާރަ އަށް ކަން ފިނޭންސް މިނިސްޓްރީން އާންމު ކުރަމުންދާ ރިޕޯޓުތަކުން ހާމަ ވެއެވެ.

ސަރުކާރުން ސިޔާސީ މަގާމުތަކުން މީހުން މަދުކުރާ ވާހަކަ ދައްކާފައިވަނިކޮށް އެންވަޔަރަންމަންޓް މިނިސްޓްރީ އަށް އިތުރު ސިޔާސީ މަގާމަކަށް ބޭފުޅަކު ހަމަޖެއްސި އިރު، މިހާރުވެސް އެ މިނިސްޓްރީގައި ގިނަ އަދަދަކަށް ސިޔާސީ މަގާމުތަކަށް މީހުން ވަނީ އައްޔަން ކޮށްފައެވެ.

ސަރުކާރުގެ ގިނަ މިނިސްޓްރީ ތަކަށް އައްޔަން ކޮށްފައި ތިބި ސިޔާސީ މީހުން ކުރާނެ މަސައްކަތެއް ނޯންނަ ކަމަށާއި އަދި ބައެއް މީހުންނަށް އިށީންނާނެ ގޮނޑި މޭޒުވެސް ނުހުންނަ ކަމަށް ބައެއް މީޑިއާ ރިޕޯޓުތަކުގައި ވެއެވެ.