ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން، (ޑީއެންއާރު) ތެރޭގައި ސަރުކާރު ހިންގާ ޕާޓީ ޕީއެންސީ އަށް މީހުން ވައްދަން ފޯމު ފުރިކަމުގެ މައުލޫމާތު ލިބިފައިނުވާ ކަމަށް ސަރުކާރުން ބުނެފިއެވެ.

ބުދަ ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީގެ ނޫސްވެރިޔާ ވަނީ ޑީއެންއާރުގެ ތެރޭގައި ޕީއެންސީގެ ފޯމުތައް ފުރަން ތިބި ފޮޓޯތައް އާއްމުވެފައިވާތީ އެކަމާއި ގުޅޭގޮތުން ސުވާލު ކޮށްފައެވެ.

އެ ސުވާލަކަށް ޖަވާބު ދެއްވަމުން ރައީސް އޮފީހުގެ ތަރުޖަމާން ހީނާ ވަލީދު ވިދާޅުވީ މި ޕޯޑިއަމްގައި ސީދާ ޕާޓީގެ ވާހަކަ ނުދެއްކޭނެ ކަމަށާއި، ނަމަވެސް ސަރުކާރުގެ އެއްވެސް މުއައްސަސާއަކަށް ރައީސް ޑރ.މުހައްމަދު މުއިއްޒު ނުފޫޒު ނުފޯރުވާނެ ކަމަށާއި، އެއީ ސަރުކާރުގެ ސިޔާސަތެއް ނޫން ކަމަށެވެ. އަދި ދައުލަތު ހުރިހާ މުއައްސަސާއަކުން އަދި ޚާއްސަކޮށް މިނިވަން މުއައްސަސާތަކުން އެ މިނިވަންކަމާއި މުސްތަގިއްލުކަމުގައި ހަރުދަނާ ނިޒާމެއްގެ ތެރެއިން، ރައްޔިތުންނަށް ޚިދުމަތް ކުރުމުގެ ފުރުސަތު ފަހިކުރާނެ ކަމަށް ހީނާ ވިދާޅުވިއެވެ.

ޑީއެންއާރުގައި ސިޔާސީ ފޯމު ފުރުމުގެ މަސައްކަތް ކޮށްފައިވާތީ އެކަމަށް އިޝާރާތް ކުރައްވައި ހީނާ ވިދާޅުވީ ސިޔާސީ ޕާޓީއެއްގެ މަސައްކަތްތަކެއް އެ މުއައްސަސާގައި ކުރިކަމުގެ މައުލޫމާތެއް ރަސްމީކޮށް ލިބިފައިނުވާ ކަމަށެވެ.

ޑީއެންއާރު ތެރޭގައި ސަރުކާރު ހިންގާ ޕާޓީ ޕީއެންސީ އަށް މީހުން ވައްދަން ފޯމު ފުރާ މަންޒަރު ފެންނަ ފޮޓޯއެއް އާއްމުވެ ސަރުކާރަށް ވަނީ ފާޑު ކިޔުންތައް އަމާޒުވެފައެވެ. މީސްމީޑިއާގައި ވެސް މިފަދަ ފޮޓޯތަކެއް ދައުރުވަމުން ދާއިރު އެ ފޮޓޯތަކުން ޕީއެންސީ އަށް ނިސްބަތްވާ މީހުން ފޯމް ފުރުމުގެ މަސައްކަތުގައި އުޅޭ މަންޒަރު ފެނެއެވެ.

އިތުބާރު ހުރި ގޮތަކަށް މި ނޫހަށް މައުލޫމާތު ލިބިފައިވާ ގޮތުގައި މި ފޮޓޯ އަކީ ޑީއެންއާރުގެ މީޓިން ރޫމްގައި ނަގާފައިވާ ފޮޓޯތަކެކެވެ. އަދި މި ފޮޓޯ ނަގާފައި ވަނީ ފޯމް ފުރުމުގެ މަސައްކަތުގެ އަޕްޑޭޓްތައް އެންގުމުގެ ގޮތުން، މި މަސައްކަތް ކުރަމުން ދިޔަ މުވައްޒަފުން އަމިއްލައަަށް ކަމަށް ވެސް ވަނީ އެނގިފައެވެ. ރާއްޖެ އެމްވީ އަށް އެނގިފައިވާ ގޮތުން މި މަސައްކަތުގައި ހަރަކާތްތެރިވި މުވައްޒަފުންނަކީ ޑީއެންއާރުގައި ތިބި ބައެއް ސިޔާސީ މުވައްޒަފުންނެވެ.

ޑިޕާޓްމަންޓް އޮފް ނޭޝަނަލް ރެޖިސްޓްރޭޝަންގައި ތިބެގެން މިފަދަ މަސައްކަތެއް ކުރުމަކީ ކަންބޮޑުވާ ކަމެއް ކަމަށް ސިޔާސީ ޕާޓީތަކުން ވަނީ ބުނެފައެވެ.