ޕީއެންސީގެ ނައިބު ރައީސް ކަަމަށް ވާދަކުރައްވާނެކަން އެލްޖީއޭގެ ސީއީއޯ ނިމާލް އިއުލާންކުރައްވައިފި
6 އޯގަސްޓު 2026 | ބުރާސްފަތި 17:39ނިމާލް އޭނާގެ ފޭސްބުކް އެކައުންޓުގައި ކުރައްވާފައިވާ ޕޯސްޓެއްގައި ވިދާޅުވެފައި ވަނީ، 2028 ވަނަ އަހަރުގެ ރިޔާސީ އިންތިޚާބު ރައީސް މުއިއްޒު އަށް ކާމިޔާބު ކޮށްދެއްވުމަކީ އޭނާގެ އެންމެ ބޮޑު އަމާޒު ކަމަށް. ނިމާލް ވިދާޅުވީ އެއީ އޭނާގެ އެންމެ ބޮޑު ލަނޑުދަނޑި ކަމަށް
ރައީސް މުއިއްޒު، އެލްޖީއޭގެ ސީއީއޯގެ މަޤާމަށް ނިމާލް އައްޔަން ކުރެއްވުމުގެ ތެރެއިން | ރައީސް އޮފީސް
ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ނައިބު ރައީސް ކަމަށް ވާދަކުރައްވާނެ ކަމަށް، މުޙައްމަދު ނިމާލް އިއުލާން ކުރައްވައިފި އެވެ.
ޕީއެންސީގެ ނައިބު ރައީސް ކަމަށް ވާދަކުރައްވާނެ ކަމަށް ނިމާލް އިއުލާން ކުރެއްވިއިރު، އޭނާ އަކީ ލޯކަލް ގަވަމަންޓް އޮތޯރިޓީ (އެލްޖީއޭ)ގެ ސީއީއޯ އެވެ. އެ މަޤާމަށް ރައީސް ޑރ. މުހައްމަދު މުއިއްޒު ނިމާލް އައްޔަން ކުރެއްވީ 2024 ވަނަ އަހަރުގެ އޯގަސްޓު މަހުގެ ފަސް ވަނަ ދުވަހު އެވެ.
ނިމާލް އޭނާގެ ފޭސްބުކް އެކައުންޓުގައި ކުރައްވާފައިވާ ޕޯސްޓެއްގައި ވިދާޅުވެފައި ވަނީ، 2028 ވަނަ އަހަރުގެ ރިޔާސީ އިންތިޚާބު ރައީސް މުއިއްޒު އަށް ކާމިޔާބު ކޮށްދެއްވުމަކީ އޭނާގެ އެންމެ ބޮޑު އަމާޒު ކަމަށެވެ. ނިމާލް ވިދާޅުވީ އެއީ އޭނާގެ އެންމެ ބޮޑު ލަނޑުދަނޑި ކަމަށެވެ.
މީގެ އިތުރުން ނިމާލް ވިދާޅުވެފައި ވަނީ، ޕީއެންސީގައި އޭނާ ދެގޮތެއް ނުވެ ދެމި ހުންނަވާނެ ކަމަށާއި، ހއ.އަތޮޅުން ފެށިގެން އައްޑޫ އަތޮޅާ ހަމައަށް ޕީއެންސީ އަށް ދިމާވާ ކޮންމެ ގޮންޖެހުމެއްގެ ވަގުތުގައި ވެސް، އަދި ކާމިޔާބެއްގެ ވަގުތުގައި ވެސް ދެގޮތެއް ނުވެ ހުންނަވާނެ އެކަކީ އޭނާކަން ޕީއެންސީގެ މެންބަރުން ޤަބޫލު ކުރާނެ ކަމަށެވެ.
އެލްޖީއޭގެ ސީއީއޯގެ މަގާމުގައި ހުންނަވައި، ޕީއެންސީގެ ނައިބު ރައީސް ކަމަށް ނިމާލް ވާދަކުރައްވާނެކަން އިއުލާން ކުރެއްވިއިރު، ބައެއް ފަރާތްތަކުން އަންނަނީ އެކަމަށް ފާޑު ކިޔަމުންނެވެ. ޚާއްސަކޮށް އެލްޖީއޭ ކަހަލަ ބޮޑު މުއައްސަސާއެއްގެ އިސްވެރިޔާގެ މަގާމުގައި ހުންނަވާ ބޭފުޅަކު، ސަރުކާރު ހިންގާ ޕާޓީގެ އިސް މަގާމެއްގައި ހުންނެވުމަކީ މަސްލަހަތު ފުށޫ އަރާނެ ކަމެއް ކަމަަށް ބައެއް ފަރާތްތަކުން ދެކެ އެވެ.
ޕީއެންސީގެ ނައިބު ރައީސް ކަމަށް ވާދަކުރައްވާ ބޭފުޅުންގެ މެދުގައި ވަނީ ވާދަވެރިކަން ވެސް ބޮޑުވެފައި އެވެ. އޭގެ ތެރޭގައި ސަރުކާރުގެ އިސް ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ރައީސް މުޢިއްޒުގެ ކޮއްކޯފުޅު އަދި ސަރުކާރުގެ އިސް ތަރުޖަމާނު ވެސް ހިމެނިވަޑައިގަންނަވަ އެވެ.
