މަސްވެރިންނަށް ނުދެވިހުރި ފައިސާގެ ޖުމުލަ އަދަދު މިފްކޯއަށް ޙަވާލުކުރެވިއްޖެ: ރައީސް
މެނިފެސްޓޯގައިވާ ފަދައިން 48 ގަޑީއިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ޤާއިމު ކުރުމުގެ މަސައްކަތް ދަނީ ކުރެވެމުން ކަމަށް ވިދާޅުވި
ރައީސުލްޖުމްހޫރިއްޔާ ޑރ މުޙައްމަދު މުއިއްޒު
މަސްވެރިންނަށް ނުދެވިހުރި ފައިސާގެ ޖުމުލަ އަދަދު މިފްކޯއަށް ހަވާލުކުރެވިއްޖެ ކަމަށް ރައީސުލްޖުމްހުރިއްޔާ ޑރ މުޙައްމަދު މުއިއްޒު ވިދާޅުވެއްޖެއެވެ.
ބުދަ ދުވަހު އެކްސްގައި ކުރެއްވި ޕޯސްޓެއްގައި ރައީސް ޑރ މުއިއްޒު ވިދާޅުވީ، "މިއަދާ ހަމައަށް މަސްވެރިންނަށް ނުދެވިހުރި ފައިސާގެ ޖުމުލަ އަދަދު މިހާރު ވަނީ އެ ފަރާތްތަކަށް ރަށްދުކުރުމަށް މިފްކޯއަށް ޙަވާލުކުރެވިފައި ކަމަށާއި، މެނިފެސްޓޯގައިވާ ފަދައިން 48 ގަޑިއިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ޤާއިމު ކުރުމުގެ މަސައްކަތް ދަނީ ކުރެވެމުން،" ކަމަށެވެ.
ރައީސް މިހެން ވިދާޅުވެފައިވާއިރު، މަސްވެރިންނަށް ދޭން ޖެހޭ ހުރިހާ ފައިސާއެއް މާދަމާގެ ނިޔަލަށް އެއްކޮށްދީ، ބެކްލޮގް އެއްކޮށް ކްލިއަރ ކުރާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވަނީ ވިދާޅުވެފައެވެ.
ބުދަ ދުވަހު ރައްޔިތުންގެ މަޖިލީހުގެ ޖަލްސާގައި ޝިޔާމް ވިދާޅުވީ، "މަސްވެރިންނަށް ނުދެއްކި މިހާރު ބާކީ ހުރީ 16 މިލިއަން ރުފިޔާ ކަމަށާއި، މި ފައިސާ ފިނޭންސް މިނިސްޓްރީން މިފްކޯ އަށް ޖަމާކުރުމުގެ މަސައްކަތް މިހާރު ކުރަމުން،" އަންނަ ކަމަށެވެ. އަދި މަސްވެރިންނަށް ލިބެންވާ ފައިސާ މާދަމާ ޖަމާކުރުމުގެ މަސައްކަތް ކުރާނެ،" ކަމަށެވެ.
މަސްވެރިންނަށް ލިބެންޖެހޭ ފައިސާ މިފްކޯއަށް މާދަމާގެ ނިޔަލަށް އެއްކޮށް ދެވޭނެ ކަމަށް ސަރުކާރުން މިއަދު ބުނެފައިވާއިރު، މަސްވެރިން ކިރުވި މަހަށް ފައިސާ ދެވޭނެ ގޮތެއް ނެތްކަމަށް ދާދިފަހުން މިފްކޯއިން ވަނީ ބުނެފައެވެ.
ސެޕްޓެމްބަރު 26ގެ ކުރިން މަސްވެރިންނަށް 17.3 މިލިއަން ރުފިޔާ ދޫކޮށްފައިވަނީ ވެސް މަސްވެރިން މުޒާހަރާކޮށްގެންނެވެ. އެއީ 1 މަސް ދުވަހުގެ ފައިސާއެވެ. އެ ފައިސާ ދޫކުރަން ފެށީ، ފިޝަރީޒް މިނިސްޓްރީގެ ޓީމްތައް ރަށްރަށަށް ނާރުވާ މުޒާހަރާކުރަން ފެށުމުންނެވެ.
މި ސަރުކާރު ވެރިކަމަށް އައީ ކިރާ މަހަށް ވަގުތުން ފައިސާ އާއި ޑޮލަރުން ފައިސާ ދޭނެކަމުގެ ވައުދާއެކުއެވެ. ނަމަވެސް މަސްވެރިންނަށް ކިރާ މަހަށް ފައިސާ ނުލިބި މަސްވެރިކަމަށް ނުނުކުމެ އެތައް ފަހަރެއްގެ މަތިންވަނީ މުޒާހަރާކޮށްފައެވެ.
