އާރުޓީއެލް ފެރީގެ އަގު ބޮޑުކުރަނީ
މިހާރު މަސައްކަތްކުރަނީ ސަބްސިޑީ ލެވަލް 55 ޕަސަންޓަށް ކުޑަކޮށް، ރިކަވަރީ 45 ޕަސަންޓު ހައްލުކުރެވޭނެ މޮޑިއުލްއަކަށް ގެންދިޔުމަށް ކަމަށް ސަރުކާރުން ބުނޭ
އާރުޓީއެލް ފެރީގެ އަގުބޮޑުކުރަން ސަރުކާރުން ވަނީ ނިންމާފައި
ރާއްޖެ ޓްރާންސްޕޯޓް ލިން (އާރުޓީއެލް) ފެރީ ނިޒާމަށް ސަބްސިޑީއާއެކު ބޮޑު ހޭދައެއް ކުރަން ޖެހޭ ކަމަށް ބުނެ ފެރީގެ އަގު ބޮޑުކުރަން ސަރުކާރުން ނިންމާފައިވާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެއެވެ.
ރައްޔިތުންގެ މަޖިލީހުގެ އިގްތިސާދީ ކޮމިޓީގައި ވާހަކަ ދައްކަވަމުން އަންގާރަ ދުވަހު އަމީން ވިދާޅުވީ އާރުޓީއެލްގެ ޚިދުމަތައް ސަރުކާރުން ދޭ ސަބްސިޑީ ދަށްކުރަން ޖެހޭ ކަމަށާއި، މިހާރު އޮތް ގޮތަކީ ދައުލަތަށް ކެތްވާ ވަރުގެ ކަމެއް ނޫން ކަމަށާއި، މިހާރު އޮތް މޮޑެލްގައި އޮޕަރޭޓް ކުރާނަމަ އެއީ 20 ޕަސަންޓް ރިކަވަރީ. 80 ޕަސަންޓް ސަބްސިޑައިޒް ކުރަން ޖެހޭ ކަމަށެވެ. އަދި ފެރީ ހިދުމަތް ދިނުމަށް ސަބްސިޑީއަށް އެއް ބިލިއަން ރުފިޔާ ހޭދަވާ ކަމަށް މިނިސްޓަރު އަމީން ވިދާޅުވިއެވެ.
މިނިސްޓަރު ވިދާޅުވީ މިހާރު މަސައްކަތްކުރަނީ ސަބްސިޑީ ލެވަލް 55 ޕަސަންޓަށް ކުޑަކޮށް، ރިކަވަރީ 45 ޕަސަންޓު ހައްލުކުރެވޭނެ މޮޑިއުލްއަކަށް ގެންދިޔުމަށް ކަމަށެވެ. މިނިސްޓަރު އަމީން ވިދާޅުވީ އާރުޓީއެލް ޚިދުމަތް ދެމެހެއްޓުމަށްޓަކައި އަގުތައް ކަނޑައެޅުމަށް އިކޮނޮމިކް ކައުންސިލަށް ހުށަހަޅާފައިވާ ކަމަށެވެ.
މިނިސްޓަރު އަމީން ވިދާޅުވީ ފުރަތަމަ އަހަރުގައި 48 މިލިއަން ރުފިޔާ ސަބްސިޑައިޒް ކުރި އިރު މިދިޔަ އަހަރު 130 މިލިއަން ސަބްސިޑައިޒް ކުރެވުނު ކަމަށެވެ. އަދި މި އަހަރު ނިމޭއިރު 280 އަށްވުރެ ބޮޑު އެއްޗެއް ހޭދަވާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އެމްޑީޕީ ސަރުކާރުން ފެށި އާރްޓީއެލްގެ ޕްލޭނަށް އެއްވެސް ބަދަލެއް ނުގެންނާނެ ކަމަށެވެ. އަދި މި ސަރުކާރުން ވެސް ކުރިއަށް ދާނީ އެ ޕްލޭނާ އެކީ ކަމަށާއި، ޕްލޭން ރަނގަޅު ކަމަށް މިނިސްޓަރު ވިދާޅުވިއެވެ.
އާރުޓީއެލްގެ ހިދުމަތް މިހާރު 9 އަތޮޅެއްގައި ދެއެވެ.
