ހޯމަ ދުވަހު އެކްސް ސޯޝަލް މީޑިއާ ނެޓްވޯކުން އިރާނުގެ އެންމެ މަތީ ވެރިޔާ އަލީ ޚާމަނާއީގެ ފަރާތުން ހީބްރޫ ބަހުން މެސެޖުތައް ޝާއިޢުކުރި އެކައުންޓެއް ސަސްޕެންޑް ކޮށްފިއެވެ.
މި އެކައުންޓް ސަސްޕެންޑު މިކުރީ އެކައުންޓު ހުޅުވިތާ މަދު ދުވަސްކޮޅެއްގެ ތެރޭގައެވެ.
އެ އެކައުންޓް ސަސްޕެންޑު ކުރުމަށްފަހު އެކްސް އިން ބުނެފައިވަނީ "އެކްސްގެ ގަވާއިދުތަކާ ޚިލާފުވާ އެކައުންޓްތައް އެކްސްއިން ސަސްޕެންޑްކުރެއެވެ." މިހެންނެވެ. ނަމަވެސް އެލޮން މަސްކްގެ މިލްކިއްޔާތުގައިވާ މި ޕްލެޓްފޯމުން އެކައުންޓް ސަސްޕެންޑް ކުރީ ކޮން ގަވާއިދަކާ ޚިލާފުވެގެންކަމެއް ބަޔާން ކޮށްފައެއް ނުވެއެވެ.
ޚާމަނާއީގެ އޮފީހުން އޭނާގެ ނަމުގައި އެކި ބަސްބަހުން މެސެޖު ފޮނުވުމަށް ގިނަ ސޯޝަލް ނެޓްވޯކް އެކައުންޓްތަކެއް ހިންގާކަން ފާހަގަ ކުރެވެއެވެ.
އެކްސް އިން ސަސްޕެންޑް ކުރި އެކައުންޓަކީ މިދިޔަ ހަފްތާ ބަންދުގައި ހުޅުވި ހީބްރޫ ބަހުން މެސެޖްކޮށްފައިވާ އެކައުންޓެއްކަން ފާހަގަ ކުރެވެއެވެ. އެ އެކައުންޓު ފެށިފައިވަނީ އިސްލާމްދީނުގެ ސަލާމުންނެވެ.
މި އެކައުންޓް ހުޅުވީ އޮކްޓޯބަރު 1 ގައި އިރާނުން އިޒްރޭލަށް ދިން މިސައިލް ހަމަލާ އަށް ރައްދު ދިނުމުގެ ގޮތުން ކަމަށް ބުނެ ހޮނިހިރު ދުވަހު އިޒްރޭލުން އިރާނުގެ އަސްކަރީ ތަންތަނަށް ވައިގެ ހަމަލާތަކެއް ދިނުމަށްފަހުގައެވެ.
އިރާނުން ބުނާ ގޮތުގައި އެ ހަމަލާގައި ގެއްލުން ލިބުނީ މަދު ރާޑާ ސިސްޓަމްތަކަކަށް ކަމަށާއި މި ހަމަލާގައި 4 އިރާނު ސިފައިން މަރުވެފައިވެއެވެ.
