ތަހުގީގަށް ހިފަހައްޓާ ފައިސާ ޤާނޫނާއި އެއްގޮތަށް ބަލަހައްޓަމުންދާ ކަމަށް މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިޙްސާން ވިދާޅުވެއްޖެއެވެ.

ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިޙްސާންއާ ކުރައްވާފައިވާ ސުވާލަށް ޖަވާބުދެއްވުމަށް މަޖިލީހަށް ވަޑައިގެން ވާހަކަދައްކަވަމުންނެވެ. ކުޑޫ ސުވާލުކުރައްވާފައި ވަނީ ފުލުހުންނާއި ކަސްޓަމްސް އިން އެކި އެކި މައްސަލަތަކުގައި ތަހުގީގަށް ހިފަހައްޓާ ފައިސާ ބެލެހެއްޓޭނެ ހަރުދަނާ ނިޒާމެއް އެ މުއައްސަސާތަކުގެ ޤާއިމްކުރެވިފައިވޭތޯ ނުވަތަ މިކަމާއި ގުޅޭ ޤަވައިދެއް އެކުލެވިފައިވޭތޯއެވެ.

އެ ސުވާލުގެ ޖަވާބުގައި މިނިސްޓަރ ވިދާޅުވީ ފުލުހުން އެކަމުގައި އަމަލުކުރާނެ އިޖުރާއަތުގެ އުސޫލެއް އެކުލަވާލާފައިވާ ކަމަށެވެ. ފުލުހުންގެ އިދާރާއިން އެފަދަ ފައިސާ އާއި މެދު އަމަލު ކުރާނެ ގޮތް ސާފުކޮށް ބަޔާންކުރެވިފައިވާ ކަމަށް އޭނާ ވިދާޅުވިއެވެ. ހަމައެހެންމެ އިމިގްރޭޝަން އިން ހޯދާ ފައިސާ އަކީ ވެސް ކޯޓު މަރުހަލާ އާއި ހަމައަށް ދެވެންދެން ބަލަހައްޓާ ކަމަށް އިހުސާން ވިދާޅުވިއެވެ.

އިހުސާން އިތުރަށް ވިދާޅުވީ ހިފަހައްޓާ ފައިސާގެ ތެރެއިން ދިވެހި ފައިސާ މޯލްޑިވްސް މަނިތަރީ އޮތޯރިޓީ (އެމްއެމްއޭ) ގައި ގާއިމްކޮށްފައިވާ ވަގުތީ އެކައުންޓަކަށް ޖަމާކުރާ ކަަމަށެވެ. އަދި ހިފަހައްޓާ ބޭރު ފައިސާ ބަހައްޓަނީ އެކަމަށް ކަނޑައަޅާ ސޭފްއެއްގައި ކަމަށެވެ. އަދި އެ ފައިސާ އަކީ ދައުލަތުގެ އެއްވެސް އިސްވެރިއެއް ބޭނުންވެއްޖެނަމަ،ސާ އޮޑިޓް ކުރެވި، މައުލޫމާތު ރައްކާކުރެވޭ ފައިސާ ކަމަށް އޭނާ ވިދާޅުވިއެވެ.

ހަމައެހެންމެ ކަސްޓަމްސްއިން ހިފަހައްޓާ ފައިސާ ރައްކާކުރަނީ ކަސްޓަމްސްގެ ތިޖޫރިއެއްގައިކަމަށާއި، ކޯޓު މަރުހަލާއާއި ހަމައަށް ދަންދެން އެފައިސާ ބަހައްޓަނީ ތިޖޫރީގައި ކަމަށް އިހުސާން ވިދާޅުވިއެވެ. އެ ފައިސާ އަކީ ދައުލަތުގެ އެއްވެސް އިސްވެރިއެއް ބޭނުންވެއްޖެނަމަ،ސާ އޮޑިޓް ކުރެވި، މައުލޫމާތު ރައްކާކުރެވޭ ފައިސާ ކަމަށް އޭނާ ވިދާޅުވިއެވެ.