ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް ރައްޔިތުންގެ މަޖިލީހުގެ އަޣްލަބިއްޔަތުން ނިންމާފައިވާ ކަމަށް ޕާލިމެންޓޭރިއަންސް ފޯ ގްލޯބަލް އެކްޝަން (ޕީޖީއޭ) އިން ބުނެފި އެވެ.

ރައްޔިތުންގެ މަޖިލިސް ހުއްޓުމަކަށް ގެނެސްފައި އޮތުމާއި، މަޖިލިސް މެންބަރުން ހައްޔަރުކޮށް، ދައުވާ އުފުލުމާ ދެކޮޅަށް އަޑު އުފުލައި ޕީޖީއޭ އިން ނެރުނު ބަޔާނެއްގައި ވަނީ ރައްޔިތުންގެ މަޖިލިސް މެންބަރުން ހިމެނޭ ގޮތަށް ހުރިހާ ފަރުދުންގެ ހައްގުތަކަށް، ރާއްޖޭގެ ގާނޫނުތަކާއި ރާއްޖެއިން ބައިވެރިވެފައިވާ ބައިނަލްއަގްވާމީ މުއާހަދާތަކުގެ އިތުރުން ގާނޫނީ އަދި ޑިމޮކްރެޓިކް ހަމަތަކާ އެއްގޮތްވާ ގޮތުގެ މަތިން އިހުތިރާމް ކުރުމަށް ދިވެހި ސަރުކާރަށް ގޮވާލާފަ އެވެ.

ދުނިޔޭގެ 140 އަށް ވުރެ ގިނަ ގައުމެއްގެ ގާނޫނު ހަދާ މަޖިލީސްތަކެއްގެ 1,300 އަށް ވުރެ ގިނަ މެންބަރުން ހިމެނިވަޑައިގަންނަވާ، ޕާލިމެންޓޭރިއަނުންގެ އެންމެ ބޮޑު ޖަމިއްޔާއިން ވަނީ ރާއްޖޭގެ ހާލަތާ މެދު ކަންބޮޑުވުން ފާޅުކޮށް މިމަހުގެ 7 ވަނަ ދުވަހު ވެސް ބަޔާނެއް ނެރެފަ އެވެ. މިމަހުގެ 14 ވަނަ ދުވަހު އިތުރު ބަޔާނެއް ނެރެ، އެ ޖަމއިްޔާއިން ވަނީ ކުރީގެ ބަޔާނުގައި ހުރި ކަންތައްތައް އަނެއްކާ ވެސް ދިވެހި ސަރުކާރަށް ހަނދާން ކޮށްދީފަ އެވެ.

ޕީޖީއޭގެ ބަޔާނުގައި ބުނެފައި ވަނީ، ރާއްޖޭގެ ރައްޔިތުންގެ މަޖިލީހުގެ މެންބަރުންނާ ދެކޮޅަށް އެކި ކަހަލަ ތުޙުމަތުކޮށް، ބައެއް މެންބަރުން ހައްޔަރުކޮށް، ދުސްތޫރީ އަދި ޑިމޮކްރެޓިކް ނިޒާމާ ދެކޮޅަށް ގިނަ ކަންތައްތަކެއް ހިންގާތީ ކަންބޮޑުވާ  ކަމަށެވެ. ރައްޔިތުންގެ މަޖިލީހުގެ އެކި މެންބަރުންނާއި، ސިޔާސީ އެކި ފަރާތްތަކާ ދެކޮޅަށް ސަރުކާރުން މިހާރު ހިންގަމުންދާ އެކި އަމަލުތައް ކުށްވެރިކޮށް، އެ އަމަލުތައް ހުއްޓާލުމަށް އެ ޖަމިއްޔާއިން ވަނީ ގޮވާލާފަ އެވެ.

ހަ މެންބަރެއްގެ، މެންބަރުކަމުގެ ގޮނޑި ގެއްލިފައިވާ ކަމަށް ބުނަމުންދާ ކަމާއި، މަޖިލިސް އިދާރާއަށް ވަނުމުން ޖުމްލަ 12 މެންބަރެއްގެ މައްޗަށް ދައުވާކުރުމުގެ ބިރު ހީވެފައިވާކަން އެ ޖަމިއްޔާއިން ފާހަގަކޮށްފައި ވެއެވެ. ނަމަވެސް، ސިފައިންނާއި ފުލުހުންގެ އަމަލުތަކާ މެދު އެއްވެސް ފިޔަވަޅެއް އެޅިފައިނުވާކަން ވެސް އެ ޖަމިއްޔާ އިން ފާހަގަކޮށްފައިވެއެވެ.

 ރައްޔިތުންގެ މަޖިލީހުގެ ރައީސް، ނުވަތަ މަޖިލިސް ރައީސްގެ ނައިބުގެ މައްޗަށް އިތުބާރު ނެތް ކަމަށް މަޖިލީހުގެ އަގުލަބިއްޔަތު މެންބަރުން ނިންމާ ހިސާބުން އެފަރާތްތަކުން އިސްތިއުފާ ދެއްވުމަކީ، ދިވެހި ރާއްޖޭގެ ޤާނޫނުތަކުގައި ކަން ކުރުމަށް ކަނޑައަޅާފައިވާ ގޮތްކަން ޕީޖީއޭގެ ބަޔާނުގައި ވަނީ ފާހަގަ ކޮށްފައެވެ.

އެ ޖަމިއްޔާ އިން ބުނީ ރާއްޖޭގެ ހާލަތު ދުވަހަކަށް ވުރެ ދުވަހެއް ގޯސްވަމުންދާ ކަމަށާއި ޖުޑިޝަރީއިން ތަފާތު އުޅުތައް ބޭނުންކޮށްގެން އިދިކޮޅު ފަރާތްތަކުގެ އަޑު ކަނޑުވާލުމަށް މަސައްކަތް ކުރަމުންދާ ކަމަށެވެ. ޖުޑިޝަރީގެ މިނިވަންކަމާ މެދު އުފައްދާ ސުވާލުތަކާ ގުޅިގެން ކަންތައްތައް ކުރަމުންދާ ގޮތް އެ ޖަމިއްޔާއިން ވަކިން ބޮޑަށް ފާހަގަކޮށްފައި ވެއެވެ.

އެ ޖަމިއްޔާއިން ބުނީ މަޖިލީހުގެ އަޣްލަބިއްޔަތުން މަސީހުގެ އިތުބާރު ނެތް ކަމަށް ނިންމުމުން ވެސް، ޖަލްސާތައް ބާއްވަން ދެކޮޅު ހަދަމުންދާ ކަމަށެވެ. މަޖިލީހުގައި އެންމެ ފަހުން ޖަލްސާއެއް ބޭއްވީ ޖުލައި 31 ވަނަ ދުވަހު އެވެ. އެ ޖަލްސާއަށް ސިފައިން ވަދެ މެންބަރުންނަށް ވަނީ ހުރަސްއަޅާފަ އެވެ.

އެ ޖަމިއްޔާއިން ނެރުނު ބަޔާނުގައި ގަލޮޅު ދެކުނު ދާއިރާގެ މެންބަރު އަދި އެ ޖަމިއްޔާގެ މެންބަރު އަހުމަދު މަހުލޫފް ވިދާޅުވެފައި ވަނީ ރައްޔިތުންގެ މަޖިލީހުގެ ރައީސްގެ މަގާމުގައި ދެމިހުރުމަށް މަސީހަށް މެންބަރުންގެ ތާއީދު ނެތް ކަމަށާއި އެހެންކަމުން، މަސީހުގެ އިތުބާރު ނެތްކަމުގެ މައްސަލަ އެޖެންޑާ ކުރިއަށް ނުދިނުމަށް ސަރުކާރުން ތަފާތު އުކުޅުތައް ބޭނުންކުރަމުންދާ ކަމަށެވެ. އޭގެ ފަހުން މަޖިލީހުގެ ޖަލްސާއެއް ބާއްވާފައިނުވާ ކަން މަހުލޫފް ވެސް ފާހަގަކުރެއްވިއެވެ.

މަހުލޫފް ވިދާޅުވީ މެންބަރުން ތިއްބެވީ ވަރަށް ހިތްވަރާއެކު މި ދައުވާތަކާ ކުރިމަތިލެއްވުމަށް ތާއްޔާރަށް ކަމަށާއި ރާއްޖޭގައި ޑިމޮކްރަސީގެ ހަމަތަކާއި އިންސާނީ ހައްގުތައް އިޔާދަކުރުމަށް ވަރުބަލިވުމެއް ނެތި މެންބަރުން މަސައްކަތް ކުރައްވާނެ ކަމަށެވެ. މަހުލޫފް ވިދާޅުވީ މިކަމުގެ ތެރޭގައި ވަރަށް ދަތި އުނދަގޫ ކަންތައްތަކާ ކުރިމަތިވާނެ ކަމަށާއި ނަމަވެސް، ކާމިޔާބު ލިބޭނެ ކަމަށެވެ.

މީގެ އިތުރުން މަހުލޫފް ވަނީ ޕީޖީއޭ އާއި ބައިނަލްއަގްވާމީ މުޖުތަމައުއިން ދެމުންދާ އެއްބާރުލުމަށް ޝުކުރު އަދާކުރައްވާފަ އެވެ.