އޮގްސްބާގް އަތުން ޑޯޓްމަންޑު ބަލިވެއްޖެ

ޖަރުމަނު ލީގުގައި އޮގްސްބާގާ ދެކޮޅަށް ކުޅުނު މެޗުން ބޮރޫޝިއާ ޑޯޓްމަންޑު ބަލިވެއްޖެ އެވެ.

އޮގްްސްބާގެ އަމިއްލަ ދަނޑުގައި ކުޅުނު މެޗުގައި އެ ޓީމުން ޑޯޓްމަންޑުގެ މައްޗަށް ކުރި ހޯދީ 2-1 އިންނެވެ. އެއީ މެޗުގައި ޑޯޓްމަންޑުން ފުރަތަމަ ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ.

މެޗު ފަށައިގެން ހަތަރު ވަނަ މިނެޓުގައި ޑޯޓްމަންޑުން ވަނީ ލަނޑު ޖަހައި ލީޑު ނަގައިފަ އެވެ. ސާހޯ ގިރާސީ ތަނަވަސްކޮށްދިން ފުރުސަތެއްގައި ޑޯޓްމަންޑަށް ލީޑު ނަގައިދިނީ ޑޮންޔެލް މާލެން އެވެ. ނަމަވެސް ފުރަތަމަ ހާފުގައި އޮގްސްބާގް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ފުރަތަމަ ހާފުގެ 24 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ އެލެކްސިސް ކްލައުޑޭ މައުރިސް އެވެ. މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި މައުރިސް ވަނީ ދެ ވަނަ ލަނޑު ޖަހައި އޮގްސްބާގަށް ކުރި ހޯދައިދީފަ އެވެ.

މިއީ މި ސީޒަންގެ ޖަރުމަނު ލީގުގައި ޑޯޓްމަންޑުގެ ތިން ވަނަ ބައްޔެވެ. މިހާތަނަށް އެ ޓީމު އަށް މެޗު ކުޅެފައިވާއިރު، ހަތަރު މެޗުން މޮޅުވެ، އެއް މެޗު ވަނީ އެއްވަރުވެފަ އެވެ. ޖުމުލަ 13 ޕޮއިންޓާ އެކު ޑޯޓްމަންޑު އޮތީ ލީގު ތާވަލްގެ ހަތް ވަނައިގަ އެވެ. ޑޯޓްމަންޑު އަތުން މޮޅުވި އޮގްސްބާގެ ވަނީ މިހާތަނަށް ކުޅުނު އަށް މެޗުން 10 ޕޮއިންޓު ހޯދައިފަ އެވެ. އެ ޓީމު އޮތީ ލީގު ތާވަލްގެ 11 ވަނައިގަ އެވެ.