އިޒްރޭލުން އީރާނަށް ދިން ހަމަލާގެ ބަދަލު ހިފައިގެން ނުވާނެ ކަމަށް ބުނެ އީރާނަށް އެމެރިކާ އާއި އިނގިރޭސިވިލާތުން އިންޒާރު ދީފި

އިޒްރޭލުން އީރާނަށް ހޮނިހިރު ދުވަހު ދިން ހަމަލާގެ ބަދަލު ހިފައިގެން ނުވާނެ ކަމަށް ބުނެ އީރާނަށް އެމެރިކާ އާއި އިނގިރޭސިވިލާތުން އިންޒާރު ދީފިއެވެ.

އިޒްރޭލުން އީރާނަށް ދިން ހަމަލާއާ ގުޅިގެން އިޒްރޭލަށް ތާއީދުކޮށް އެމެރިކާގެ ޑިފެންސް ޑިޕާޓްމަންޓުން ބަޔާނެއް ނެރެފިއެވެ. މި ބަޔާނުގައި ބުނެފައިވަނީ ޑިފެންސް ސެކްރެޓަރީ ލޮއިޑް އޮސްޓިން އަށް އިޒްރޭލުން ދިން ހަމަލާގެ "އަޕްޑޭޓް" އިޒްރޭލުގެ ޑިފެންސް މިނިސްޓަރ ދެއްވަމުން ގެންދަވާ ކަމަށެވެ.

ޕެންޓަގަންގެ ބަޔާނުގައި "އިޒްރޭލުގެ ސަލާމަތާއި އަމިއްލަ ދިފާޢުގެ ހައްގަށް އެމެރިކާގެ އެއްބާރުލުން އެންމެ މަތީ ދަރަޖައަށް އޮންނާނެ ކަން ތަކުރާރުކޮށް ކަށަވަރުކޮށްދޭ ކަމަށް" ބުނެފައިވެއެވެ.

އަދި މީގެ އިތުރުން ބަޔާނުގައި ފާހަގަ ކޮށްފައިވަނީ "އީރާނާއި އީރާނުގެ މަދަދު ލިބޭ ޓެރަރިސްޓް ޖަމާޢަތްތަކުގެ ނުރައްކަލުން އެމެރިކާގެ މުވައްޒަފުންނާއި، އިޒްރޭލު އަދި ސަރަހައްދުގެ ބައިވެރިން ދިފާޢުކުރުމަށް އެމެރިކާގެ އިތުރަށް ތައްޔާރަށް އޮތް" ކަމަށެވެ.

އެމެރިކާގެ މީޑިއާ ރިޕޯޓުތަކުގައި ބުނެފައިވަނީ އީރާނަށް ހަމަލާދޭން ފެށުމުގެ ކުޑައިރުކޮޅެއް ކުރިން ވައިޓް ހައުސްއަށް އެކަމުގެ މައުލޫމާތު ހިއްސާ ކުރި ކަމަށެވެ.

އިޒްރޭލުގެ ހަމަލާތަކަށް ފަހު، އެމެރިކާއިން ވަނީ ބަދަލުހިފުމުގެ ހަމަލާތައް ދީގެން ނުވާނެ ކަމަށް ބުނެ ތެހެރާނަށް އިންޒާރުދީފައެވެ.

އެމެރިކާއިން ބުނެފައިވަނީ އިޒްރޭލުން އީރާނަށް ދިން މި ހަމަލާ އަށް ފަހު ދެ ގައުމުގެ މެދުގައި ހިނގަމުންދާ ހަމަލާތައް މިހިސާބުން "ނިމެންވާނެ" ކަމަށެވެ.

ދެކުނު ޕެސިފިކްގެ ސަމޯއާގައި ކުރިއަށްދާ ކޮމަންވެލްތު ސަމިޓްގައި ވާހަކަފުޅު ދައްކަވަމުން ހޮނިހިރު ދުވަހު އިނގިރޭސި ބޮޑުވަޒީރު ސްޓާމަރ ވިދާޅުވީ "އީރާނުގެ އަނިޔާވެރިކަމުން އަމިއްލަ ނަފްސު ދިފާޢުކުރުމުގެ ހައްގު އިޒްރޭލަށް ލިބިގެންވާ،" ކަމަށެވެ.

"އެހެންނަމަވެސް އަޅުގަނޑު ހަމަ ޔަގީނުންވެސް ބުނަން، ސަރަހައްދީ ހަލަބޮލިކަން އިތުރުވިޔަ ނުދިނުމަށް އަޅުގަނޑުމެން މަސައްކަތްކުރަންޖެހޭ. އަދި ހުރިހާ ފަރާތްތަކުންވެސް ކެތްތެރިކަން އިސްކުރުމަށް ގޮވާލަން،" އޭނާ ވިދާޅުވިއެވެ. "އީރާނުން ރައްދު ދީގެން ނުވާނެ." އޭނާ އިތުރަށް ވިދާޅުވިއެވެ.

އިޒްރޭލުން އީރާނަށް ހޮނހިރު ދުވަހު ހަމަލާ ދިނީ އެމެރިކާގެ ޚާރިޖީ ވަޒީރު އެންތަނީ ބްލިންކެން މެދުއިރުމަތީގައި ސުލްހަ ގާއިމު ކުރުމުގެ މަޝްވަރާތަކަށް ކުރެއްވި ދަތުރުފުޅެއް ނިންމާލެއްވުމަށްފަހު އެނބުރި ވަޑައިގަތް ވަގުތުގައެވެ.

އީރާނުގެ 1979 ގެ އިސްލާމީ އިންގިލާބުން ފެށިގެން އިޒްރޭލާ އީރާނަކީ ވަރަށް ބޮޑު ދެ އަދާވާތްތެރިންނެވެ.

އީރާނުގެ އަސްކަރިއްޔާ އިން ވަނީ އިޒްރޭލުގެ ހަމަލާތައް އެގައުމުގެ އީލާމް، ޚުޒެސްތާން އަދި ވެރިރަށް ތެހެރާން ގައި ހުރި އަސްކަރީ މަރުކަޒުތަކަށް އަމާޒުކުރެވުނު ކަމަށާއި، އޭގެ ސަބަބުން "ކޮންމެވެސް ވަރެއްގެ" ގެއްލުންތަކެއް ލިބުނުކަން ކަށަވަރުކޮށްދީފައެވެ.

އީރާނުން ބަދަލު ހިފުމުގެ ގޮތުން އިތުރު ހަމަލާތަކެއް ދީފިނަމަ، އިޒްރޭލުގެ ސިފައިންނަށް "ޖަވާބުދާރީވާން މަޖުބޫރުވާނެ" ކަމަށް ބުނެ އިޒްރޭލުން ވެސް ވަނީ އީރާނަށް އިންޒާރު ދީފައެވެ.

އީރާނުން ބުނެފައިވަނީ، އެގައުމަށް އިޒްރޭލުން ދިން ހަމަލާގެ ބަދަލު ހިފުމުގެ ހައްގު އެގައުމަށް ލިބިގެންވާ ކަމަށް ބުނެފައެވެ.