ދެ ލޯންޗެއް ޖެހި ހިނގި އެކްސިޑެންޓް: މިހާރު ފަރުވާ ދެމުންދަނީ 2 މީހުންނަށް، 18 މީހުން ދޫކޮށްލައިފި
މި ހާދިސާ ހިނގިކަމުގެ ރިޕޯޓު ފުލުހުންނަށް ލިބިފައިވަނީ ހުކުރު ދުވަހުގެ ރޭ 7:34 ގައި
އެކްސިޑެންޓް ހިނގި ލޯންޗު، ދެ ލޯންޗަށް ވެސް ވަނީ ބޮޑެތި ގެއްލުންތަކެއް ލިބިފައި
ދެ ލޯންޗެއް ޖެހި ހިނގި ނުރައްކާތެރި އެކްސިޑެންޓްގައި މިހާރު ފަރުވާ ދެމުންދަނީ ދެމީހުންނަށް ކަމުގައި އައިޖީއެމްއެޗުން ބުނެފިއެވެ.
މިހާދިސާ ހިނގިކަމުގެ ރިޕޯޓު ފުލުހުންނަށް ލިބިފައިވަނީ ހުކުރު ދުވަހުގެ ރޭ 7:34 ގައެވެ.
ރާއްޖެއެމްވީއަށް އައިޖީއެމްއެޗްގެ އޮފިޝަލެއް ވިދާޅުވީ މި އެކްސިޑެންޓާ ގުޅިގެން ޖުމްލަ 20 މީހުންނަށް ފަރުވާ ދިނުމަށް ހޮސްޕިޓަލަށް ގެނެސްފައިވާ ކަމަށާއި، އެއްވެސް މީހަކަށް ފުރާނައަށް ނުރައްކާވާފަދަ ސީރިއަސް އަނިޔާއެއް ލިބިފައި ނުވާކަމަށެވެ. މިހާރު 18 މީހުންނަށް ފަރުވާ ދިނުމަށްފަހު ދޫކޮށްލާފައިވާއިރު، ދިވެއްސަކާއި، ބޭރު މީހަކަށް އިމަރޖެންސީގައި ފަރުވާ ދެމުންދާ ކަމަށް އޭނާ ވިދާޅުވިއެވެ. ނަމަވެސް އެ ދެމީހުންނަށް ލިބިފައިވާ އަނިޔާގެ ތަފްސީލެއް ހާމައެއް ނުކުރެއެވެ.
އެކްސިޑެންޓް ހިނގި ސަރަހައްދުގައި ފުލުހުން ހަރަކާތްތެރިވެފައިވާއިރު، މިހާދިސާ ހިނގަން މެދުވެރި ސަބަބު ސީރިއަސް މައްސަލައެއްގެ ގޮތުގައި ތަހުޤީގު ކުރަމުންދާ ކަމަށް އެއިދާރާއިން ބުނެއެވެ. ސޯޝަލް މީޑިއާގައި އާއްމުވެފައިވާ ފޮޓޯތަކުން ފެންނަ ގޮތުގައި ދެ ލޯންޗަށް ވެސް ވަނީ ބޮޑެތި ގެއްލުންތަކެއް ލިބިފައެވެ. އަދި އެއް ލޯންޗުގެ ކުރީކޮޅު ވަނީ ވަރަށް ބޮޑަށް ހަލާކުވެފައިއެވެ.
މައުލޫމާތު ލިބިފައިވާ ގޮތުގައި އެކްސިޑެންޓު ވެފައިވަނީ ގްރޭންޑް ޕާކް ކޮއްދިއްޕަރު ޕީކޭޑީ-10 ކިޔާ ލޯންޗަކާއި ފެރިދޫ ޓުއާޒްގެ ސެނޯރާ ކިޔާ ލޯންޗެކެވެ.
މިފަހުން ބާރު ސްޕީޑްގައި ލޯންޗު ރޭސް ޖަހާ މައްސަލަ ބޮޑުވެ، އެ މައްސަލަތައް ވެސް ތަހުގީގު ކުރަމުންދާ ކަމަށް ފުލުހުން ބުނެފައިވެއެވެ. މިފަދަ ކަންކަމުގެ ސަބަބުން ނުރައްކާތެރި ކަނޑުމަތީގެ ހާދިސާތައް ހިނގަން މެދުވެރިވާ ކަމަށާއި، ކަނޑުމަތީގެ ޤަވާއިދާ އުސޫލާ އެއްގޮތަށް އަމަލު ކުރުމަށް ފުލުހުން އިލްތިމާސްކޮށްފައިވެއެވެ.
