ފްލެޓާއި، ގޯތީގެ މައްސަލާގައި ރައްޔިތުންގެ އުއްމީދެއް ނެތް
ފަލަސުރުހީ ޕްރޮގްރާމްގައި ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ މަކަރުވެރި ސިޔާސަތު ހާމަކުރުމުގެ މަސައްކަތް ކުރަންޖެހޭ ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ސަމީރު ވިދާޅުވީ މިސަރުކާރުން ދަނީ ރައްޔިތުން ހައްގުތަކަށް ހުރަސް އަޅަމުން ކަމަށާއި، ރައްޔިތުން ބޭނުންވާ ކަންކަން ފުއްދައިދިނުމުގައި ފެއިލްވެފައިވާ ކަމަށެވެ.
ފްލެޓާއި ގޯތި މައްސަލާގައި 21 އޮކްޓޯބަރ 2024 ވީ ހޯމަ ދުވަހު ރައްޔިތުންގެ މަޖިލިސް ކައިރީގައި ކުރިއަށް ގެންދިޔަ މުޒާހަރާގެ ބައިވެރިން ވަރަށް ބޮޑަށް ފަހަތަށް ޖައްސާފައިވާތީ އެކަމަށް އިޝާރާތް ކުރައްވައި މެންބަރު ސަމީރު ވިދާޅުވީ ރައްޔިތުންގެ ހައްގުތައް ހޯދުމަށް މަގު މައްޗަށް ނުކުތުމުން ސަރުކާރުގެ ބޭފުޅުން ގަންނަނީ ބިރު ކަމަށާއި، އެދުވަހު ވެސް ފެނިގެންދިޔައީ އެ މަންޒަރު ކަމަށެވެ.
މެންބަރު ސަމީރު ވިދާޅުވީ ކުރީ ސަރުކާރުގައި ޔަގީންކަމާއެކު ދިން ގޯއްޗާއި، ފްލެޓު ރައްޔިތުންނަށް ނުލިބި، މިއަދު ތިބީ ވާނުވާގައި ކަމަށެވެ. މި މައްސަލާގައި ރައްޔިތުން ކުރަމުން ދިޔަ އުންމީދު ވެސް ގެއްލޭ ހިސާބަށް ކަންކަން ގޮސްފައިވާ ކަމަށް މެންބަރު ސަމީރު ވިދާޅުވިއެވެ.
މެންބަރު ސަމީރު ވިދާޅުވީ ރައްޔިތުންގެ ހައްގު ކަށަވަރު ކުރުމަށް މަގުމައްޗަށް ނުކުމެ މިހާރަށް ވުރެ ބޮޑަށް އަޑު އުފުލަންޖެހޭ ކަމަށެވެ. އެމްޑީޕީން އަބަދުވެސް ރައްޔިތުންގެ ހައްގުގައި ވަކާލަތު ކުރާނެ ކަމަށާއި، މިސަރުކާރުގެ މަކަރުވެރި ސިޔާސަތު ހާމަކުރުމަށް މަސައްކަތް ކުރަންޖެހޭ ކަމަށެވެ. އަދި ރައްޔިތުން ވެސް މިމަސައްކަތުގައި ބައިވެރިވުމަށް މެންބަރު ސަމީރު ގޮވާލެއްވިއެވެ.
