ކުރީ ސަރުކާރާ ހަވާލުކުރަން އުޅުނަސް ސަޕްލިމެންޓްރީ ބަޖެޓުގައި އޮތީ ޑްރޯނަށް ހަރަދުކުރި ފައިސާއާއި ރަސްމާލެ ހިއްކަން ފައިސާ ޖަހާފައި - ޝަމްހީދު
ޑްރޯނަށް ކުރި ހަރަދު އަނބުރާ ހޯދަން ކޮންޓިޖެންސީގައި 650 މިލިއަން ރުފިޔާ ޖަހާފައިވޭ
ހުޅުމާލެ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު
5.1 ބިލިއަން ރުފިޔާގެ ސަޕްލިމެންޓްރީ ބަޖެޓު ހުށަހަޅާ ކުރީ ސަރުކާރުގެ ބޮލުގައި އެކަން އަޅުވަން އުޅުނު ނަމަވެސް، ސަޕްލިމެންޓްރީ ބަޖެޓުގައި އޮތީ މި ސަރުކާރުން ޑްރޯންއަށް ހަރަދުކުރި ފައިސާއާއި ރަސްމާލެ ހިއްކަން ޖަހާފައިވާ ފައިސާ ކަމަށް ހުޅުމާލެ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު ވިދާޅުވެއްޖެއެވެ.
ސަޕްލިމެންޓްރީ ބަޖެޓަށް ބަހުސްކުރައްވަމުން ޝަމްހީދު ވިދާޅުވީ ސަޕްލިމެންޓްރީ ބަޖެޓުގައި ކަންބޮޑުވާ ކަންތައްތަކެއް އެބަހުރި ކަމަށެވެ. އެންމެ ފުރަތަމަ ކަމަކަށް ފާސްކުރި ބަޖެޓާއެކު އިތުރު ކުރެވޭ ސަޕްލިމެންޓްރީ ބަޖެޓާއެކު ޖުމްލަ 54.9 ބިލިއަން ރުފިޔާއަށް ދައުލަތުގެ ބަޖެޓް އަރާނެ ކަމަށް ޝަމްހީދު ވިދާޅުވިއެވެ. މެންބަރު ވިދާޅުވީ ދައުލަތަށް ލިބޭ އާމްދަނީ މާބޮޑަށް އިތުރުވާނެ ކަމަށް ލަފާ ނުކުރޭ ކަމަށެވެ. އެހެންކަމުން 34 ބިލިއަންގައި އާމްދަނީ ހުރި ނަމަވެސް ސަޕްލިމެންޓްރީ ބަޖެޓާއެކު ހަރަދުތައް ނިމޭ އިރު ދައުލަތުގެ ދަރަންނަށް 21 ބިލިއަން އިތުރުވެގެންދާނެ ކަމަށެވެ. އަދި މިއީ އަހަރެއްގެ ތެރޭގައި ދައުލަތުގެ ބަޖެޓަށް އެންމެ ބޮޑު ދަރަންޏެއް އިތުރުވާނެ އަހަރުކަމަށް މެންބަރ ޝަމްހީދު ވިދާޅުވިއެވެ.
މެންބަރު ޝަމްހީދު ވިދާޅުވީ ސަޕްލިމެންޓްރީ ބަޖެޓާއި އެމްޑީޕީގެ ސަރުކާރާއި ގުޅުމެއް ނެތް ކަމަށެވެ. އަދި ބަޖެޓުގައި ހުރި ނަންބަރުތަކާއި ކުރީ ސަރުކާރާއި ގުޅުވާލެވޭނެ އެއްވެސް ގޮތެއް ނެތް ކަމަށެވެ.
ޝަމްހީދު ވިދާޅުވީ ބަޖެޓުގައި ބޮޑު ދަރަންޏެއް އޮތުން އެއީ ގައުމަށް ސަސްޓެއިނަބަލް އަދަދެއްތޯ ބަލަންޖެހޭ ކަމަށެވެ.
