ފިސްކަލް ޒިންމާ ގެ ޗާޓަރ އެކުލަވާލަންވީ ވަގުތަކީ މިއީ، މިހާރު ނުވިކަމެއް ދެ އަހަރު ފަހުން ވެސް ނުވާނެ: ޑރ.ޝަމްހީދު

ފިސްކަލް ޒިންމާ ގެ ޗާޓަރ އެކުލަވާލަންވީ ވަގުތަކީ މިއީ ކަމަށާއި މިހާރު ނުވިކަމެއް ދެ އަހަރު ފަހުން ވެސް ނުވާނެ ކަމަށް ރައްޔިތުން ގެ މަޖިލީހު ގެ ހުޅުމާލެ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު ވިދާޅުވެއްޖެ އެވެ.

އޭނާ އެފަދައިން ވިދާޅުވީ ރާއްޖެޓީވީ ގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.

ފިސްކަލް ޒިންމާގެ ޤާނޫނުގެ ދަށުން އެކުލަވާލަން ޖެހޭ، މާލީ ޒިންމާގެ ޗާޓަރު އެކުލަވާލަން ޖެހޭ މުއްދަތު މަވާން ކުޑަތަން ވެފައި ވަނިކޮށް، އެ ޗާޓަރު އެކުލަވާލުން 2 އަހަރަށް ފަސްކުރުމަށް ހުށަހެޅި އިސްލާހު ބަލައިގަނެފައި ވަނީ ބުރާސްފަތި ދުވަހު އެވެ.

އެކަމުގެ ސަބަބުން ރާއްޖޭގެ މާލީ އަގު ދަށް ވާ ކަމަށް ޝަމްހީދު ވިދާޅުވި އެވެ. މާލީ ރެޕިއުޓޭޝަން އާއި ކްރެޑިޓް ރޭޓިން ރަނގަޅޫކުރުމަކީ މުހިންމު ކަމެއް ކަމަށް ޝަމްހީދު ވިދާޅުވި އެވެ. ފިސްކަން ޒިންމާގެ ޗާޓު އެކުލަވާލަން ކުރިން ދީފައި އޮތް 6 މަސް ދުވަހުގެ މުއްދަތަކީ އެކަށީގެންވާ މުއްދަތެއް ކަމަށް ޑރ.ޝަމްހީދު ވަނީ ވިދާޅުވެފަ އެވެ. ޝަމްހީދު ވިދާޅުވީ ފިސްކަލް ޒިންމާގެ ޤާނޫނަށް އަމަލުކުރަން ފެށި ހިސާބުން ފެށިގެން މިހާތަނަށް އެކުލަވާލި ޤާނޫނުތަކުގެ ފިސްކަލް އެސެސްމެންޓް ހަދާފައި ނުވާތީ، އެއީ ޤާނޫނާއި ޚިލާފަށް ފާސްކޮށްފައިވާ ޤާނޫނުތަކެއް ކަމަށް ޝަމްހީދު ވިދާޅުވި އެވެ.

"މިފަދަ ޤާނޫނެއް އޮތުމަކީ މާލީ ވަޒީރު ވެސް އިތުރަށް ޒިންމާދާރުވޭ. މިހެން ހަދާ ޤާނޫނުތައް ވަނީ މާލީ ގޮތުން ބުރަ ބޮޑު ޤާނޫނުތަކަށް. މަޖިލީހުން ފާސްކުރާ ޤާނޫނުތަކުގެ ފިސްކަލް އިމްޕެކްޓް އެނގެން ޖެހޭ. އެކަން ނުކޮށް މިހާރު މި ހުށަހަޅަނީ ފިސްކަލް ޒިންމާގެ ޤާނޫނުގެ ބައެއް މާއްދާތަކަށް އަމަލު ނުކުރަން." ޑރ.ޝަމްހީދު ވިދާޅުވި އެވެ.

ފިސްކަލް ޒިންމާގެ ޤާނޫނަކީ މިދިޔަ ޑިސެމްބަރު މަހު ތަސްދީގު ކުރި ޤާނޫނެކެވެ. އެ ޤާނޫނަށް އަމަލުކުރަން ފެށީ ޖޫން މަހު އެވެ. އެ ގާނޫނުގައި ބުނާ ގޮތުން ފިސްކަލް ޒިންމާގެ ގާނޫނަށް އަމަލުކުރަން ފަށާތާ ހަ މަސްދުވަހުގެ ތެރޭގައި ފިސްކަލް ޒިންމާގެ ޗާޓަރު އެކުލަވާލަން ޖެހޭނެ އެވެ. އެހެންނަމަވެސް އެކަމާއި ގުޅިގެން ކުރަން ޖެހޭ ކަންކަން ސަރުކާރުން މިހާތަނަށް ފުރިހަމަކޮށްފަ އެއް ނުވެ އެވެ.

ހުރާ ދާއިރާގެ މެންބަރު ޑރ. އަނާރާ ނައީމް އިސްލާހު ހުށަހަޅުއްވާފައި ވަނީ ދައުލަތުގެ ފިސްކަލް ޒިންމާގެ ގާނޫނުގެ ދަށުން އެކުލަވާލަން ޖެހޭ ފިސްކަލް ޒިންމާގެ ޗާޓަރު އެކުލަވާލުމަށް ގާނޫނުގައި ކަނޑައަޅާފައިވާ މުއްދަތު އިތުރުކުރުމަށެވެ. އެ ޤާނޫނަށް ހުށަހަޅާފައިިވާ އިސްލާހަކީ ޤާނޫނުގެ 39 ވަނަ މާއްދާގެ ދަށުން އެކުލަވާލަން ޖެހޭ ފިސްކަލް ޒިންމާގެ ޗާޓަރު އެކުލަވާލުމާއި، އެއަށް އަމަލުކުރަން ޖެހޭ މުއްދަތު ވެސް ދިގުދަންމާލުމެވެ. އިސްލާހު ހުށަހަޅާފައި ވަނީ ފިސްކަލް ޒިންމާގެ ޗާޓަރު އެކުލަވާލުމުގެ މުއްދަތު ދެ އަހަރަށް އިތުރުކުރުމަށެވެ. އެހެންކަމުން ދެން އެ ޗާޓަރު އެކުލަވާލަން ޖެހޭނީ 3 ޑިސެމްބަރު 2026ގަ އެވެ.