ހަނިމާދޫ އެއަރޕޯޓް ނިމޭއިރު އެކަށީގެންވާ އަދަދަކަށް އެނދު އުފެއްދުމަށް މަސައްކަތްތަކެއް ކުރެވޭނެ - ފައިސަލް
ވައިކަރަމުރައިދޫގެ 15 ހެކްޓަރު ޓުއަރިޒަމް ޑިވަލަޕްމަންޓަށް ހުޅުވާލެވި އެތަން ޓުއަރިޒަމް މިނިސްޓްރީގެ އިވެލުއޭޝަން ކޮމިޓީން އިވެލުއޭޓްކުރެވި އެވޯޑް ކުރެވިފައިވޭ
ޓުއަރިޒަމް މިނިސްޓަރ އިބްރާހިމް ފައިސަލް މަޖިލިހުގައި
ހަނިމާދޫ އެއަރޕޯޓް ނިމޭއިރު އެކަށީގެންވާ އަދަދަކަށް އެނދު އުފެއްދުމަށް މަސައްކަތްތަކެއް ކުރެވޭނެ ކަމަށް ޓުއަރިޒަމް މިނިސްޓަރ އިބްރާހިމް ފައިސަލް ވިދާޅުވެއްޖެއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ވައިކަރަދޫ ދާއިރާގެ މެންބަރު ހުސައިން ޒިޔާދު ކުރެއްވި ސުވާލުގެ ޖަވާބުގައި މިނިސްޓަރ ފައިސަލް ވިދާޅުވީ ހދ އަތޮޅުގައި ފަތުރުވެރިކަން ތަރައްގީކުރުމަކީ ރައީސް މުހައްމަދު މުއިއްޒުގެ ރިޔާސީ ވައުދުފުޅެއް ކަމަށެވެ. އެގޮތުން ހދ އަތޮޅުގައި ޓުއަރިޒަމް ތަރައްގީކުރުމަށްޓަކައި، މަގާމާއި ހަވާލުވެ ފަތުުރުވެރިކަމަށް ރަށްތައް ދޫކުރެވުނު ފުރަތަ ފުރުސަތުގައި، ހދ އަތޮޅުގެ ވައިކަރަމުރައިދޫގެ 15 ހެކްޓަރު ޓުއަރިޒަމް ޑިވަލަޕްމަންޓަށް ހުޅުވާލެވި އެތަން ޓުއަރިޒަމް މިނިސްޓްރީގެ އިވެލުއޭޝަން ކޮމިޓީން އިވެލުއޭޓްކުރެވި އެވޯޑް ކުރެވިފައިވާ ކަމަށެވެ.
މިނިސްޓަރ ފައިސަލް ވިދާޅުވީ އަންނަ އަހަރުގެ މާޗް މަހާ ހިސާބަށްދާއިރު ހަނިމާދޫ އެއަރޕޯޓް ނިންމާލެވޭނެކަމަށެވެ. އެހެންކަމުން އެއަރޕޯޓް ނިންމާލެވޭ އިރު ހދ އަތޮޅުގައި އެކަށީގެންވާ އަދަދަކަށް އެނދު އުފެއްދުމަށް ހާއްސަ މަސައްކަތެއް ކުރައްވަމުން ގެންދަވާ ކަމަށެވެ.
