މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ގަވައިދު: ދިވެހިންނަށް އިސްކަންދޭންޖެހޭ ގޮތަށް ޞިއްޙަތާއި ރައްކައުތެރިކަމުގެ އޮފިސަރުން އައްޔަނުކުރަން މަޖުބޫރު
އައްޔަނުކުރާ ފަރާތަކީ މި ގަވައިދުގެ 7 ވަނަ މާއްދާގައި ބަޔާންކޮށްފައިވާ ޝަރުޠުތައް ހަމަވާ ފަރާތްތަކެއް ކަމުގައި ވާންޖެހޭ
ބިދޭސީ މަސައްކަތްތެރިއެއް މަސައްކަތް ކުރަނީ
މުވައްޒަފުން މަސައްކަތްކުރާ ކޮންމެ ތަނެއްގައި ޞިއްޙަތާއި ރައްކައުތެރިކަމުގެ އޮފިސަރެއް ނުވަތަ ހެލްތު އެންޑް ސޭފްޓީ އޮފިސަރެއް އައްޔަންކުރަންޖެހޭނެކަމަށް މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ގަވާއިދުގައި ބުނެފިއެވެ.
މި ގަވާއިދުގެ 3 ވަނަ ބާބުގައި ބުނެފައިވަނީ ވަޒީފާދޭ ފަރާތުގެ ވަޒީފާގައި މަދުވެގެން 75 މުވައްޒަފުން މަސައްކަތްކުރާ ކޮންމެ ތަނެއްގައި ޞިއްޙަތާއި ރައްކައުތެރިކަމުގެ އޮފިސަރެއް ނުވަތަ ހެލްތު އެންޑް ސޭފްޓީ އޮފިސަރެއް ހުންނަންވާނެ ކަމަށެވެ.
އެގޮތުން ވަޒީފާދޭ ފަރާތުގެ މުވައްޒަފުންގެ ގޮތުގައި 75 އާއި 150 އާ ދެމެދުގެ އަދަދެއްގެ މުވައްޒަފުން މަސައްކަތްކުރާ ތަނެއްގައި ހިމެނޭ ނަމަ، ޞިއްޙަތާއި ރައްކައުތެރިކަމުގެ 1 އޮފިސަރުން މަދުވެގެން ހުންނަންވާނެއެވެ. އަދި ވަޒީފާދޭ ފަރާތުގެ މުވައްޒަފުންގެ ގޮތުގައި 151 އާއި 300 އާ ދެމެދުގެ އަދަދެއްގެ މުވައްޒަފުން މަސައްކަތްކުރާ ތަނެއްގައި ހިމެނޭ ނަމަ، ޞިއްޙަތާއި ރައްކައުތެރިކަމުގެ 2 އޮފިސަރުން، އެންމެ މަދުވެގެން ވެސް ތިބެންވާނެ ކަމަށް މި ގަވައިދުގައި ބުނެއެވެ.
މީގެ އިތުރުން ވަޒީފާދޭ ފަރާތުގެ މުވައްޒަފުންގެ ގޮތުގައި 301 އާއި 500 އާ ދެމެދުގެ އަދަދެއްގެ މުވައްޒަފުން މަސައްކަތްކުރާ ތަނެއްގައި ހިމެނޭ ނަމަ، ޞިއްޙަތާއި ރައްކައުތެރިކަމުގެ 3 އޮފިސަރުން، އެންމެ މަދުވެގެން ވެސް ތިބެންވާނެ ކަމަށް ބުނެފައިވެއެވެ. އަދި 501 އާއި 1,000 އާ ދެމެދުގެ އަދަދެއްގެ މުވައްޒަފުން ވަޒީފާގައި ގެންގުޅޭ ނަމަ މަދުވެގެން 4 ހެލްތު އެންޑް ސޭފްޓީ އޮފިސަރުން ތިބެންވާނެ ކަމަށް މި ގަވާއިދުގައި ބުނެއެވެ.
އަދި ވަޒީފާދޭ ފަރާތުގެ މުވައްޒަފުންގެ ގޮތުގައި 1,001 މުވައްޒަފުންނަށްވުރެ ގިނަ ނަމަ، އެންމެ މަދުވެގެން ވެސް، 5 ހެލްތު އެންޑް ސޭފްޓީ އޮފިސަރުން ތިބެންވާނެއެވެ.
މި ގަވައިދުގައި ބުނާ ގޮތުން ޞިއްޙަތާއި ރައްކައުތެރިކަމުގެ އޮފިސަރުންގެ ގޮތުގައި އައްޔަނުކުރާ މުވައްޒަފުންނަކީ މަސައްކަތްކުރާ ތަނުގެ ދާއިމީ މުވައްޒަފުން ކަމުގައި ވާންވާނެއެވެ. އަދި މުވައްޒަފުންގެ ގޮތުގައި 151 އަށްވުރެ ގިނަ މީހުން މަސައްކަތްކުރާ ތަންތަނުން، ދިވެހި ސަރުކާރުގެ ގެޒެޓުގައި މި ގަވާއިދު ޝާއިޢުކުރާތާ 1 އަހަރުދުވަހުގެ ތެރޭގައި، ޞިއްޙަތާއި ރައްކައުތެރިކަމުގެ އޮފިސަރުން އައްޔަނުކުރަން ވާނެކަމަށް ބުނެފައިވެއެވެ.
އަދި މުވައްޒަފުންގެ ގޮތުގައި 75 އާއި 150 އާ ދެމެދު މީހުން މަސައްކަތްކުރާ ތަންތަނުން، ދިވެހި ސަރުކާރުގެ ގެޒެޓުގައި މި ގަވާއިދު ޝާއިޢުކުރާތާ 2 އަހަރުދުވަހުގެ ތެރޭގައި، ޞިއްޙަތާއި ރައްކައުތެރިކަމުގެ އޮފިސަރުން އައްޔަނުކުރަން ވާނެ ކަމަށް ބުނެފައިވެއެވެ.
ޞިއްޙަތާއި ރައްކައުތެރިކަމުގެ އޮފިސަރުންގެ ގޮތުގައި އައްޔަނުކުރާ ފަރާތަކީ މި ގަވާއިދުގެ 7 ވަނަ މާއްދާގައި ބަޔާންކޮށްފައިވާ ޝަރުޠުތައް ހަމަވާ ފަރާތްތަކެއް ކަމުގައި ވާންޖެހެއެވެ. އަދި ޞިއްޙަތާއި ރައްކައުތެރިކަމުގެ އޮފިސަރުން އައްޔަނުކުރުމުގައި ދިވެހިންނަށް އިސްކަން ދޭންވާނެކަމަށްވެސް ބުނެފައިވެއެވެ. އަދި މަސައްކަތް ހަވާލުކުރާ ކޮންމެ ފަރާތަކުން ވެސް އެ ފަރާތުން އައްޔަނުކުރާ ޞިއްޙަތާއި ރައްކައުތެރިކަމުގެ އޮފިސަރަށް އެކަން އަންގައިދޭ ކާޑެއް ނުވަތަ ލިޔުމެއް ދޭންވާނެއެވެ. އަދި އަދި ހާދިސާއެއް ދިމާވެއްޖެ ހާލަތެއްގައި މަސައްކަތްތެރިންނަށް ޞިއްޙަތާއި ރައްކައުތެރިކަމުގެ އޮފިސަރާ މުޢާމަލާތުކުރެވޭނެ ފަސޭހަ އިންތިޒާމެއް ހަމަޖައްސައިދީފައި އޮންނަންވާނެ ކަމަށް މި ގަވާއިދުގައި ބުނެއެވެ.
ޞިއްޙަތާއި ރައްކައުތެރިކަމުގެ އޮފިސަރުންގެ ގޮތުގައި މަގާމަށް މީހަކު އައްޔަނުކުރާތާ ރަސްމީ 5 ދުވަހުގެ ތެރޭގައި އޭނާގެ މަޢުލޫމާތާއި ވަނަވަރާއި ކަމާގުޅޭ އެހެނިހެން ލިޔުންތައް އޮތޯރިޓީއަށް ލިޔުމުން ހުށަހަޅަންވާނެ ކަމަށް ބުނެފައިވެއެވެ. އަދި އެއްވެސް ހާލެއްގައި ޞިއްޙަތާއި ރައްކައުތެރިކަމުގެ އޮފިސަރު ބަދަލުވެއްޖެ ނަމަ، އެކަން ވެސް ރަސްމީ 5 ދުވަހުގެ ތެރޭގައި އޮތޯރިޓީއަށް އަންގަންވާނެ ކަމަށް ބުނެފައިވެއެވެ.
