ސަރުކާރުން ބަޖެޓް ހުސްކޮށްލި ގޮތާއި މެދު ސުވާލު އުފެދޭ، ކުރެވުނު ކަމެއް ފެންނާކަށް ނެތް - ނާޒިލް
ނާޒިލް ވިދާޅުވީ ސަރުކާރުން ބަޖެޓް ނެތް ކަމަށް ބުނެ ސަޕްލިމެންޓްރީ ބަޖެޓް އިތުރުކޮށްފި ނަމަ ބަޖެޓް ހުސްވި ގޮތް ސާފުވާން ޖެހޭނެ ކަމަށް
އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް
49 ބިލިއަން ރުފިޔާގެ ބަޖެޓެއް ސަރުކާރުން ހުސްކޮށްލި ގޮތާއި މެދު ސުވާލު އުފެދޭ ކަމަށާއި ކުރެވުނު ކަމެއް ފެންނަން ނެތްކަމަށް ދިވެހިރައްޔިތުން ޑިމޮކްރެޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުންނެވެ.
ނާޒިލް ވިދާޅުވި ހުރިހާ ބަހަނާ އެއް ސަރުކާރުން ދައްކަނީ ނާޤާބިލްކަމުންކަމަށެވެ. 49 ބިލިއަނަށް ވުރެ ގިނަ ރުފިޔާ ބަޖެޓްގައި ހިމަނާފައިވާއިރު މާލީ ހިސާބުތައް ހާމަ ނުކޮށް އޮތުމުން ސުވާލު އުފެދޭ ކަންތައްތަކެއް ހުރި ކަމަށް ނާޒިލް ވަނީ ވިދާޅުވެފައެވެ. ސަރުކާރުން ވެރިކަމުގެ ދެބައިކުޅަ އެއްބައި ހޭދަކުރީ މާލީ ހިސާބުތައް ހާމަ ނުކޮށް ކަމަށާއި މާލީ ހާމަކަމެއް ސަރުކާރުގެ ކިބައިން ނުފެންނަ ކަމަށް އޭނާ ވިދާޅުވިއެވެ. އެކަން އެގޮތަށް ކުރަނީ ގަސްތުގައި އޮޅުވާލުމަށް ކަމަށް ނާޒިލް ވަނީ ތުހުމަތުކުރައްވާފައެވެ. ބަޖެޓުން ނުފުދިގެން ސަޕްލިމެންޓްރީ ބަޖެޓެއް ހުށަހަޅާ އިރު ބަޖެޓް ހޭދަ ކުރި ގޮތް އާއްމުންނަށް އެނގެން ވާނެ ކަމަށާއި ޚަރަދު ކުރީ ކޮން މަޝްރޫޢުތަކަކަށް ކަން ސާފުވާން ވާނެ ކަމަށް އޭނާ ވަނީ ވިދާޅުވެފައެވެ. އެހެންނަމަވެސް އެއިން އެއްވެސް ކަމެއް ސަރުކާރަށް ސާފުކޮށް ނުދެވޭ ކަަމަށް ނާޒިލް ވަނީ ވިދާޅުވެފައެވެ. އެހެންކަމުން އޭގައި ފޮރުވިފައިވާ ސިއްރުތަކެއް ހުރި ކަމަށް ބެލެވޭ ކަމަށާއި ރައްޔިތުން ތިބީ ކަންބޮޑުވުމެއްގައި ކަމަށް ނާޒިލް ވިދާޅުވިއެވެ.
ނާޒިލް ވިދާޅުވީ ސަރުކާރުން ބަޖެޓް ނެތް ކަމަށް ބުނެ ސަޕްލިމެންޓްރީ ބަޖެޓް އިތުރުކޮށްފި ނަމަ ބަޖެޓް ހުސްވި ގޮތް ސާފުވާން ޖެހޭނެ ކަމަށެވެ. ކޭޝްފްލޯ ބެލެހެއްޓުމުގައި ދަތިތަކެއް ދިމާވެފައިވާ ކަމަށް ސަރުކާރުން ބުނާ އިރު ޚަރަދު ނުކޮށް، ކޭޝްފްލޯއަށް ބުރޫ އަރާ ސަބަބެއް ސާފު ނުވާ ކަމަށް އޭނާ ވިދާޅުވިއެވެ. ސަރުކާރުން ވަނީ ސަޕްލިމެންޓްރީ ބަޖެޓެއް ހުށަހަޅާނެ ކަން ހޮނިހިރު ދުވަހު އިއުލާންކޮށްފައެވެ. އެ ބަޖެޓް 5 މިލިއަނަށް ވުރެ އިތުރު ނުކުރާނެ ކަމަށް ސަރުކާރުން ބުނެއެވެ. މީގެ އިތުރުން ދައުލަތުގެ ހިސާބުތައް ބެލެހެއްޓުމުގައި ކުރީ ސަރުކާރުން ގޯސްތަކެއް ހަދާފައިވާ ކަމަށް ބުނެ އެ މައްސަލަ އޮޑިޓަރ ޖެނެރަލްގެ އޮފީހަށް ވެސް ސަރުކާރުން ވަނީ ހުށަހަޅާފައެވެ. އެކަމާއި ގުޅޭގޮތުން ވާހަކަދައްކަވަމުން ނާޒިލް ވަނީ އެއީ ބައެއްގެ ބޮލުގައި ބަދުނާމް އަޅުވާ ބިރު ދައްކަން ކުރާ ކަމެއް ކަމަށް ސިފަކުރައްވާފައެވެ. އަދި އެކަމުގައި ހަގީގަތެއް ނެތް ކަަމަށް ނާޒިލް ވިދާޅުވިއެވެ. ސަރުކާރަށް ޚަރަދު ދެކޮޅު ނުޖެއްސެނީ މާލީ ގޮތުން ނާޤާބިލްވުމުން ކަމަށް ވެސް ނާޒިލް ވިދާޅުވިއެވެ.
