ޚަރަދުތައް ހަމަޖައްސަން ސަޕްލިމެންޓްރީ ބަޖެޓް ހުށަހަޅާތީ ފާޑުކިޔުން އަމާޒުކުރެއްވި ރައީސް ޑރ.މުހައްމަދު މުއިއްޒުގެ ސަރުކާރުން މި އަހަރަށްވެސް ސަޕްލިމަންޓަރީ ބަޖެޓެއް ރައްޔިތުންގެ މަޖިލީހަށް ހުށަހެޅުމަށް ނިންމައިފިއެވެ.

ހޮނިހިރު ދުވަހު އެކަން ހާމަކުރެއްވީ މާލީ ވަޒީރު މޫސާ ޒަމީރުއެވެ.

ޒަމީރު ވަނީ ކޭޝްފްލޯ ބެލެހެއްޓުމުގައި ދަތިތަކެއް ދިމާވެފައިވާ ކަމަށް ފާހަގަކުރައްވާފައެވެ. އަދި ދައުލަތުގެ ޚަރަދުތައް ފޫބެއްދުމަށް އެހެނިހެން އަހަރުތަކެކޭ އެއްފަދަައިން މި އަހަރުވެސް ސަޕްލިމެންޓަރީ ބަޖެޓެއް ހުށަހަޅާނެކަން ހާމަކުރެއްވިއެވެ.

ޒަމީރު ވިދާޅުވި ގޮތުގައި ސަޕްލިމެންޓަރީ ބަޖެޓުގެ ސީދާ އަދަދު އަދި ކަނޑައަޅާފައެއް ނުވެއެވެ. އޭނާ ވިދާޅުވީ، ކިހާ ވަރެއްގެ ސަޕްލިމެންޓްރީ ބަޖެޓެއް ކަން ކަނޑައަޅާ ނިންމާނީ ކެބިނެޓުގެ އިތުރު ލަފާ ހޯދައި އަދި ރައީސުލްޖުމްހޫރިއްޔާގެ ލަފައާ އެއްކޮށް، އޮޑިޓާ ޖެނެރަލްގެ ރިޕޯޓު ވެސް ލިބުމުން ކަމުގައެވެ.

އެ މަނިކުފާނު ވިދާޅުވި ގޮތުގައި ސަރުކާރުން މަސައްކަތް ކުރަމުން ދަނީ ބަޖެޓު ވީހާވެސް ކުޑަކޮށް ހުށަހެޅުމަށެވެ. ޒަމީރު ވަނީ ޚަރަދުކުޑަ ނުކޮށްފި ނަމަ ސަޕްލިމެންޓަރީ ބަޖެޓު 10 ބިލިއަން އަށް އަރާފާނެ ކަމަށް ބުނެފައެވެ. މަސައްކަތް ކުރަމުން ދަނީ 5 ބިލިއަން ރޭންޖުގައި ސަޕްލިމެންޓްރީ ބަޖެޓް ބަހައްޓަން ކަމަށް އެ މަނިކުފާނު ވިދާޅުވިއެވެ. ނަމަވެސް އެ ބަޖެޓް 10 ބިލިއަނަށް ނާރާނެ ކަމަށް ޒަމީރު ވަނީ ވިދާޅުވެފައެވެ. ޚަރަދު ކުޑަކުރުމުގެ ސިޔާސަތުތަކާއި އެކު ސަޕްލިމެންޓްރީ ބަޖެޓް ކުޑަ ކުރެވޭނެ ކަމަށް އެ މަނިކުފާނު ވިދާޅުވިއެވެ. ސަޕްލިމެންޓްރީ ބަޖެޓްގެ އަދަދު ކަނޑައެޅުމުގެ މަސައްކަތް މިހާރު ދަނީ ކުރަމުންނެވެ.

ސަޕްލިމެންޓްރީ ބަޖެޓް ހުށަހަޅަމުން އަންނަ ގޮތާއި މެދު ސަރުކާރުން ވަނީ ކަންބޮޑުވުން ފާޅުކޮށްފައެވެ. އެކަމާއި ގުޅޭގޮތުން ބަންޑާރަ ނައިބު އަހުމަދު އުޝާމް ވިދާޅުވީ ޤާނޫނު އަސާސީގައި ބުނާގޮތުން ދައުލަތުގެ ޚަރަދުތައް ކުރަން ޖެހެނީ މަޖިލީހުން ފާސްކުރާ ބަޖެޓާއި އެއްގޮތަށް ކަމަށެވެ. ބަޖެޓްކޮށްފައިވާ މިންވަރަށް ވުރެ އިތުރަށް ޚަރަދުކޮށްގެން ނުވާނެކަން ވަރަށް ސާފުކޮށް އެނގެން އޮތް ކަމަށް އުޝާމް ވިދާޅުވިއެވެ. މަޖިލީހަށް ބަޖެޓް ހުށަހަޅާފައި ހުންނަނީ ސަޕްލިމެންޓްކުރުމަށް ފަހުގައި ކަމަށާއި، ޚަރަދު ކުރުމަށް ފަހު އެކަން ކުރުމަކީ ޤާނޫނު އަސާސީގެ ރޫހާއި ޚިލާފުކަމެއް ކަމަށް އުޝާމް ވިދާޅުވިއެވެ.

މި އަހަރު ރައްޔިތުންގެ މަޖިލީހުން ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ.

ސަރުކާރުން 5 ވަރަކަށް ބިލިއަން ރުފިޔާގެ ސަޕްލިމެންޓަރީ ބަޖެޓެއް ހުށަހަޅަން ޖެހޭނެ ކަމަށް އަންދާޒާކުރާ އިރު 2023 ވަނަ އަހަރު 6.5 ބިލިއަން ރުފިޔާގެ ބަޖެޓެއް ހުށަހެޅިއެވެ.