މި ސަރުކާރުން ގައުމު ގެންދަނީ ރަނގަޅު މިސްރާބަކަށް ނޫން: ހަސަން ލަތީފް
ސަރުކާރުން މިގޮތަށް މަސައްކަތް ކުރާނަމަ 2025 ވަނަ އަހަރުގެ މެދުތެރޭގައި ވަރަށް ދަތި ހާލަތަކަށް ރާއްޖެދާނެ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު، ނައިބު ރައީސް ހުސައިން މުހައްމަދު ލަތީފްއާ ސަލާމް ކުރައްވަނީ
މި ސަރުކާރުން ގައުމު ގެންދަނީ ރަނގަޅު މިސްރާބަކަށް ނޫން ކަމަށާއި، ސަރުކާރުގެ އަމަލުތައް ރަނގަޅު ނޫން ކަމަށް ދަ ޑިމޮކްރެޓްސް ރައީސް ހަސަން ލަތީފް ވިދާޅުވެއްޖެއެވެ.
ހޮނިހިރު ދުވަހުގެ ފަށާއިރު ޕްރޮގްރާމްގައި ހަސަން ލަތީފް ވިދާޅުވީ މިސަރުކާރުގައި ގައުމު ގެންދަނީ ރަނގަޅު މިސްރާބަށް ނޫން ކަމަށެވެ.
އެގޮތުން މާލީ، އިގްތިސާދީ، އިޖްތިމާއީ ގިނަ ކަންކަމުގައި އަދި ރައްޔިތުންނާއި ގުޅުންހުރި ކަންކަމުގައި ސަރުކާރުން އަމަލުކުރަމުންދަނީ ރަނގަޅަށް ނޫން ކަމަށް ހަސަން ލަތީފް ވިދާޅުވިއެވެ. ސަރުކާރުން މިގޮތަށް މަސައްކަތް ކުރާނަމަ 2025 ވަނަ އަހަރުގެ މެދުތެރޭގައި ވަރަށް ދަތި ހާލަތަކަށް ރާއްޖެދާނެ ކަމަށް އިގްތިސާދީ މާހިރުން މިހާރު ވިދާޅުވަމުން ގެންދަވާކަން އޭނާ ފާހަގަކުރެއްވިއެވެ. އަދި ވިދާޅުވީ އެ މަންޒަރުތައް މިހާރު ގައުމުން ފެންނަމުންދާ ކަމަށެވެ.
ހަސަން ލަތީފް ވިދާޅުވީ ރާއްޖޭގެ ވެރިކަމާއި ހަވާލުވާ އެއްވެސް ބަޔަކު މިހެން ގައުމު ހިންގުމަށް ރައްޔިތުން ނުރުހޭނެ ކަމަށެވެ. އެހެންކަމުން މިހެން ކަންކަން ވިޔަ ނުދިނުމަށް މިހާރުން ފެށިގެން މަސައްކަތް ކުރަންޖެހޭ ކަމަށް ހަސަން ލަތީފް ވިދާޅުވިއެވެ.
ރާއްޖޭގެ މާލީ ހަލަތު އޮތީ ވަރަށް ދަށްވެފައިކަމަށް ސަރުކާރުގެ ދަނީ ބުނަމުންނެވެ. ސަރުކާރުގެ ހަރަދުތައް އިންތިހާއަށް ބޮޑުވެފައިވާއިރު، ހަރަދު ކުޑަ ކުރަންޖެހޭ ދިމަދިމާލުން ހަރަދުތައް ކުޑަ ނުކުރާ ކަމަށް ބުނެ ގިނަ ބައެއްގެ ފާޑު ކިޔުން ސަރުކާރަށް ވަނީ އަމާޒުވެފައެވެ.
