ރަށުގެ ތަރައްގީއަށް ހިންގުމަށް ނިންމާފައިވާ މަސްރޫޢުތައް ސަރުކާރުން ކުރިއަށް ނުގެންދާތީ އާއި ރަށުގެ ބައެއް އިންފްރާސްޓްރަކްޗަރ އަށް ލިބިފައިވާ ގެއްލުންތައް ހައްލުކޮށްދިނުމަށް ސަރުކާރުގެ ކަމާބެހޭ އިދާރާތަކުން މަސައްކަތް ނުކުރާތީ އިހަވަންދޫ ކައުންސިލް ކަންބޮޑުވުން ފާޅުކޮށް ބަޔާނެއް ނެރެފިއެވެ.

ނިމުނު ހަފްތާގައި ކައުންސިލުން ފާސްކޮށް ނެރުނު ބަޔާނުގައި، ނިމިދިޔަ ސަރުކާރުން 2021 ވަނަ އަހަރު ފެށި އެރަށުގެ ބިންހިއްކުމުގެ މަޝްރޫއު ނުނިމި ލަސްވަމުން ދާއިރު އެ މަޝްރޫއަކީ، ރަށުގެ ކުނި މެނޭޖުކުރުމާއި، ގެދޮރުވެރިކަމާއި އަދި އެހެނިހެން އުމްރާނީ ތަރައްގީގެ މުހިންމު މަޝްރޫއުތަކާއި ގުޅިގައިވާ މަސައްކަތަކަށް ވާތީ، އެއީ ކައުންސިލުން "ނުހަނު ކަންބޮޑުވާ މައްސަލައެއް" ކަމަށް ފާހަގަކޮށްފައިވެއެވެ.

އޭގެ އިތުރުން ރަށުގެ ރައްޔިތުންގެ ހިތްހަމަޖެހުމަށްޓަކައި ފެހި ސިގްނަލް ދީ، މޯލްޑިވްސް ޓްރާންސޓް އެންޑް ކޮންޓރެކްޓިންގް ކޮމްޕެނީ (އެމްޓީސީސީ) ގެ ސީއެސްއާރުގެ ދަށުން ހިއްކި ސަރަހައްދުގައި ހަދައިދިނުމަށް އިއުލާނު ކޮށްފައިވާ މޫދަށް އެރޭ ސަރަހައްދު ހަދައިދިނުމަށް އެއްވެސް އިޖާބައެއް ނުދީ ރިވެޓްމެނޓް ޖަހަމުން ގެންދާތީ އެކަމާވެސް ކަންބޮޑުވުން ފާޅު ކުރާކަމަށް ކައުންސިލުން ބުނެއެވެ.

ރަށުގެ ބަނދަރުގެ އެއްގަމު ތޮށީގެ ފެރީ ޓާމިނަލް ސަރަހައްދުން ސިޑި އަދި ސިޑިއާ ގުޅިފައިވާ ސަރަހައްދު ގަނބައިގަނެފައިވުން ހައްލުކުރުން ލަސްވަމުން ދާ ދިއުމަކީ އިހަވަންދޫ ކައުންސިލުން ނުހަނު ކަންބޮޑުވާކަމެއް ކަމަށް ބުނެފައިވެއެވެ. އަދި އެސަރަހައްދު ބަންދުކޮށްފައި އޮތުމުން، ރަށުގައި ގާއިމުކުރެވިފައިވާ ފެރީ ޓާމިނަލްގެ ބޭނުން ނުކުރެވުމުން ދަތުރުވެރިންނަށް ދަތިތަކާ ކުރިމަތިލާން ޖެހިފައިވާ ކަމަށްވެސް ބަޔާނުގައި ބުނެފައިވެއެވެ.

ކައުންސިލުން ފާހަގަ ކުރާ ގޮތުގައި އިހަވަންދޫ އެއްގަމު ތޮއްޓަށް ލިބިފައިވާ ހުރި ގެއްލުމުގެ ނުރައްކަލުގެ ސަބަބުން އެކި ފަހަރު މަތިން މިނިސްޓްރީގެ ޓީމްތައް އެރަށަށް ކުރި ޒިޔާރަތުގައި ކަންބޮޑުވުން ފާޅުކޮށް ލިޔުމުން އެ ވާހަކަތައް ދެންނެވިފައި ވީ ނަމަވެސް، އަދިއަދާ ޖެހެންދެންވެސް އެއްވެސް އަލިމަގެއް ލިބިފައި ނުވުމީ އިހަވަންދޫ ކައުންސިލުން ނުހަނު ހިތާމަ ކުރާ އަދި ކަންބޮޑުވާ ކަމެއް ކަމަށެވެ.

ކައުންސިލުން ބުނީ ބަނދަރުގެ ތެރޭގައި ބާނި ދޭމޭތީ އެކަމަށް ހައްލެއް ހޯދުމަށް ބަނދަރުގެ ކަނޑިންމަ ބަދަލުކުރުމަށް މަޝްވަރާ ކުރެވި ލިޔެކިއުންތައް ބަދަލުކުރެވިފައި ވީނަމަވެސް އެކަމަ އިޖާބައެއް ލިބިފައި ނުވާ ކަމަށެވެ.

ކައުންސިލުން ހިތާމައާއެކު ފާހަގަކޮށްފައިވަނީ އެ ކައުންސިލުން ސަރުކާރުގެ ކަމާބެހޭ ފަރާތްތަކަށް ފޮނުވާ ލިޔެކިޔުންތަކަށް ޖަވާބުވެސް ނުދޭ ކަމުގައެވެ.

މީގެ އިތުރުން، ރަށުގައި ހަސްފަތާލެއް ގާއިމްކުރުމުގެ މަސައްކަތް މިއަހަރުގެ ތެރޭގައި ފެށޭނެ ކަމަށް ރައީސުލްޖުމްހޫރިއްޔާ އިއުލާނުކޮށްފައި ވީނަމަވެސް، އެއްވެސް އަމަލީ މަސައްކަތެއް ފެށިފައި ނުވުމާއި، ރަށުގައި ގާއިމުކުރަން ނިންމާފައިވާ ފިޝް ކަލެކްޝަން ސެންޓަރގެ މަސައްކަތް ފެށިފައި ނުވުމާއި، ރަށުގައި ގާއިމް ކުރެވިފައިވާ އައިސްޕްލާންޓުން އައިސްލިބުމުގައި ހުރި ދަތިތައް ހައްލު ނުވުމާއި، ރައީސުލްޖުމްހޫރިއްޔާގެ ވައުދުފުޅާ އެއްގޮތައް ރަށުގައި އައު އައިސްޕްލާންޓެއް ގާއިމް ކުރުމަށް މަސައްކަތް ނުކުރުން އިހަވަންދޫ ކައުންސިލުން ވަނީ ހިތާމައާއެކު ފާހަގަ ކޮށްފައެވެ.

ކައުންސިލުން ބުނެފައިވަނީ އިހަވަންދޫއަށް ދިމާވެފައިވާ ކުނީގެ މައްސަލަ އަށް ހައްލެއް ހޯދުމަށް ކުނިކޮށި ހެދުމަށް ބިމެއް ހަމަޖައްސަން ކުރެވިފައިވާ މުއާމަލާތްތަކަށް ވެސް ސަރުކާރުން ޖަވާބެއް ދީފައި ނުވާކަމަށެވެ.

"ބަޔާން ކުރެވިފައިވާ ރަށުގެ ރައްޔިތުންނާ ގުޅިފައިވާ މުހިންމު ކަންކަމަށް ވީހިނދު މިކަންކަމަށް މަޝްވަރާކުރެވި އެއްބަސްވެފައިވާ ގޮތުގެ މަތިން ހައްލު ހޯދައިދިނުމަށް ކަމާ ގުޅުން ހުރި އިދާރާތަކަށް ގޮވާލަން،" އިހަވަންދޫ ކައުންސިލުގެ ބަޔާނުގައި ބުނެފައިވެއެވެ.

ވެރިކަންކުރާ ޕީއެންސީ އާ ކޯލިޝަން ހަދާފައިވާ ޕީޕީއެމްގެ މެޖޯރިޓީ އޮންނަ އިހަވަންދޫ ކައުންސިލުގެ 7 މެމްބަރުންގެ ތެރެއިން 5 މެމްބަރުން މި ބަޔާނަށް ތާއީދުކޮށް ސޮއިކޮށްފައިވެއެވެ.

ބަޔާނުގައި ސޮއި ކޮށްފައި ނުވަނީ ކައުންސިލް މެމްބަރުންގެ ތެރޭގައި ހިމެނޭ އަހްމަދު ރިޟްވާން އާއި މަރިޔަމް ޝިފާޒާ އެވެ.

އިހަވަންދޫ ދާއިރާ ތަމްސީލު ކުރުމަށް ރައްޔިތުންގެ މަޖިލީހަށް އިންތިޚާބު ކޮށްފައިވަނީވެސް ސަރުކާރު ހިންގާ ޕާޓީގެ މެމްބަރެކެވެ.