އެއްވެސް ރަހުމެއް ނެތި ކޮންމެ ތަނެއްގައިވިޔަސް ހިޒްބުﷲ އަށް ހަމަލާ ދޭނަން: ނަތަންޔާހޫ

އެއްވެސް ރަހުމެއް ނެތި ކޮންމެ ތަނެއްގައި ވިޔަސް ހިޒްބުﷲ އަށް އިޒްރޭލުން ހަމަލާ ދޭނެ ކަމަށް އެ ގައުމުގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެއެވެ.

"ލުބުނާނުގެ ކޮންމެ ތަނެއްގައި - ބެއިރޫތުވެސް ހިމެނޭގޮތަށް – ހިޒްބުﷲ އަށް ރަހުމެއް ނެތި ހަމަލާދޭނަން،" ނަތަންޔާހޫ ވިދާޅުވިއެވެ.

އޭނާ މިހެން ވިދާޅުވީ އިޒްރޭލުގެ އުތުރުގައި ހުރި ސިފައިންގެ މަރުކަޒަކަށް ޒިޔާރަތްކުރެއްވުމުގެ ތެރޭގައެވެ. މި މަރުކަޒަކީ ހިޒްބުﷲ އިން ދިން ޑްރޯން ހަމަލާއެއްގައި އާދިއްތަ ދުވަހުގެ ރޭ އިޒްރޭލުގެ ހަތަރު ސިފައިން މަރުވެ އެތައް ބަޔަކު ޒަޚަމްވި ހާދިސާ ހިނގި މަރުކަޒެވެ.

ރިޕޯޓްތައް ބުނާ ގޮތުގައި މިއީ ޣައްޒާގައި އިޒްރޭލުން ހިންގަމުންދާ އަނިޔާވެރި ހަނގުރާމަ އާ ގުޅިގެން ފާއިތުވި އަހަރެއްހާ ދުވަހުގެ ތެރޭގައި ދެ ޤައުމުގެ ސަރަޙައްދުގައި ހިނގަމުންދާ ހަމަލާތަކުގެ ތެރެއިން ހިޒްބުﷲ އިން އިޒްރޭލަށް ދިން އެންމެ ނުރައްކާތެރި ހަމަލާތަކުގެ ތެރެއިން އެއް ހަމަލާއެވެ.

ހަމަލާއަށް ފަހު ހިޒްބުﷲ އިން ބުނެފައިވަނީ މިއީ ލުބުނާނަށް އިޒްރޭލުން ދެމުންދާ މަރުގެ ހަމަލާތަކަށް ރައްދު ދިނުމުގެ ގޮތުން ދިން ހަމަލާއެއް ކަމަށެވެ.

ލުބުނާނުގެ ޞިއްޙީ ވުޒާރާއިން ބުނާ ގޮތުގައި މިދިޔަ މަސްދުވަހެއްހާ ދުވަހުގެ ތެރޭގައި އިޒްރޭލުން ދިން ހަމަލާތަކުގައި ގާތްގަނޑަކަށް 1،700 މީހުން ވަނީ ލުބުނާނުން މަރުވެފައެވެ.

ފާއިތުވި ހަފްތާގެ ތެރޭގައި އިޒްރޭލުން ދެމުންދާ ހަމަލާތައް އަމާޒު ކޮށްފައިވަނީ ޝިޔާ މުސްލިމުން ގިނަ ދެކުނު ސަރަހައްދާއި އިރުމަތީގައިވާ ބެކާ ވެލީއަށެވެ. މިއީ ހިޒްބުއްލާގެ ނުފޫޒު ބޮޑު ސަރަހައްދުތަކެކެވެ.

އިޒްރޭލުގެ އަސްކަރިއްޔާ އަށް ކުއްލި ސިހުމެއް ލިބުނު ހިޒްބުﷲ ގެ ޑްރޯން ހަމަލާ ބިންޔަމީނާ ކައިރީގައިވާ ގޮލާނީ ބްރިގޭޑްގެ ތަމްރީނު މަރުކަޒަށް އެ ޑްރޯނު ވާސިލްވި ގޮތް ތަޙްޤީޤު ކުރަމުންދާ ކަމަށް އިޒްރޭލުގެ އަސްކަރިއްޔާ އިން ވަނީ ބުނެފައެވެ. ހިޒްބުﷲ އިން ފޮނުވި ޑްރޯން ވަނީ އިޒްރޭލުގެ ވަރުގަދަ ވައިގެ ދިފާޢީ ނިޒާމު ފޫއަޅުވާލާފައެވެ.

އަނެއްކޮޅުން ހޯމަ ދުވަހު ލުބުނާނުގެ އުތުރުގައި އިޒްރޭލުން ދިން ހަމަލާއެއްގައި މަދުވެގެން 21 މީހުން މަރުވެ 8 މީހުން ޒަޚަމުވެފައިވާކަމަށް ލުބުނާނުގެ ޞިއްޙީ ވުޒާރާއިން ބުނެފައިވެއެވެ.

މި ހަމަލާ އަމާޒުވެފައިވަނީ އައިތޫ ނަމަކަށް ކިޔާ ކްރިސްޓިއަން ދީނުގެ މީހުން ދިރިއުޅޭ އަވަށެއްގެ އާންމުން ދިރިއުޅޭ އިމާރާތަކަށެވެ. މިއީ ހިޒްބުﷲ ގެ ބާރުގަދަ ސަރަހައްދުތަކާ ވަރަށް ދުރުގައިވާ އަވަށެއް ކަމަށް ރިޕޯޓްތައް ބުނެއެވެ.