އިންޑިއާއިން ބޭނުންވި ނަމަ މުންޑެއްލައްވާފައި ނިތްކުރީގައި ސިއްކަ ޖަހަންވެސް ރައީސް މުއިއްޒު ހުންނެވީ ތައްޔާރަށް - ރާއީ

މި ސަރުކާރުގެ ހާލަތަކީ، އިންޑިއާއިން ބޭނުންވި ނަމަ މުންޑެއްލައްވާފައި ނިތްކުރީގައި ސިއްކަ ޖަހަންވެސް ރައީސް ޑރ. މުހައްމަދު މުއިއްޒު ހުންނެވީ ތައްޔާރަށް ކަމަށް މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވިދާޅުވެއްޖެއެވެ.

އެމްޑީޕީގެ ހަރުގެ ޖަލްސާގައި ވާހަކަދައްކަވަމުން މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވިދާޅުވީ މި ސަރުކާރުން އިންޑިއާއިން އެހީތެރިކަން ނުހޯދަން ވެގެން، ތުރުކީން ކާޑު ގެނެސް، ދުބާއީ ތައިލެންޑުން އާސަންދަ ހަމަޖައްސަން އުޅެ، ބަލި މީހުން އުފުލަން ވެގެން އުޅަނދު ގެންނަން އުޅެ މިއިން އެއްކަމެއްވެސް ނުވެގެން އެންމެފަހުން މި ސަރުކާރަށްވީ ގޮތަކީ "މަހާނަ މައްޗަށް މަޑިއަށް ޖެހުން" ކަމަށެވެ.

މަހާނަ މައްޗަށް މަޑިއަށް ޖެހުމަކީ މީހެއްގެ ބާރު ހުރި އިރު، އެ މީހާގެ ކުރިމަތީ ބަދަލު ހިފުމުގެ ގޮތުން، އެއްޗެއް ބުނަން ނުކެރިފައި، ބާރު ކެނޑުނީމައި، ޖެއްސުންކޮށް މަލާމާތްކޮށް ހެދުމުން ބުނެ އުޅޭ ބަހެއްކެވެ.

ރާއީ ވިދާޅުވީ އަބަދުވެސް ބުނަމުން ދިޔަ ވާހަކައަކީ އަވަށްޓެރި ގައުމުތަކާއި ވަކިން ހާއްސަކޮށް ވެރިޔަކަށް ހުންނަ މީހާ ޖެހިނުގަތުމަށް ކަމަށެވެ. ރައީސްގެ ދަތުރުފުޅަށް އިޝާރާތްކުރައްވާ ރާއީ ވިދާޅުވީ 50 މީހުންގެ ވަފުދަކާއެކު އިންޑިއާއަށް ވަޑައިގެންނެވި އިރުވެސް، އެތަނުން އެއްވެސް ވަޒީރަކަށް ހަތަރުކަޅި ހަމަކޮށް ބަލާލަން ނުކެރި ތިބީ އިސްޖަހައިގެން ކަމަށެވެ.

ރާއީ ވިދާޅުވީ މަޖިލީހުގެ ދައުރު ފެށުން ލަސްކުރުމަކީ މީގެ ކުރިން ދުވަހަކުވެސް ކުރިކަމެއް ނޫން ކަމަށާއި، އެކަންވެސް ކުރީ ބަޖެޓުގެ ވާހަކަ ދައްކަން ވެގެން ދަތުރުފުޅުން ލިބޭނީ ކޯއްޗެއްތޯ ބަލައި އެވާހަކަ ދެއްކުމަށް ކަމަށެވެ. ރާއީ ވިދާޅުވީ އަވަށްޓެރި ގައުމަކާއި ޖެހިގެންނަން ނުވާނެ ކަމަށާއި، ވަކިން ހާއްސަކޮށް ވެރިޔަކަށް ހުންނަ މީހާ އެފަދަ ދަރަޖައަކަށް ވެއްޓިގެން ނުވާނެ ކަމަށެވެ.

އަދި މިއަދު ފެނިގެންދިޔަ މަންޒަރަކީ އިންޑިއާއިން ބޭނުންވިނަމަ މުންޑެއް ލައްވާފައި ނިތްކުރީގައި ސިއްކަވެސް ޖަހާ ގޮތަށް ތައްޔާރަށް ރައީސް ޑރ. މުހައްމަދު މުއިއްޒު ހުންނެވި މަންޒަރުކަމަށް ރާއީ ވިދާޅުވިއެވެ.

ރާއީ ވިދާޅުވީ ރައީސްއާއި ވަޒީރުންނަށް އެއްޗެއް ބުނުމުން އެކަމާއި މާބޮޑުކަމަކަށް ވެގެން އުޅެން ނުޖެހޭނެ ކަމަށެވެ. ސަބަބަކީ ކުރިން ދެއްކި ވާހަކަތައް އެމީހުންނާއި ދިމާލަށް އަންނަމުންދާ ކަމަށާއި، މިކަމާއި ރައްޔިތުން މަލާމާތް ކުރާނެ ކަމަށެވެ. ރާއީ ވިދާޅުވީ މި ސަރުކާރަށް ރައްޔިތުން މިއަދު މަލާމާތްކުރާ ކަމަށާއި، އަހަރެއް ވެގެންދައިރު ރައްޔިތުން ހެއްވާލި އެއްކަމެއްވެސް މި ސަރުކާރަށް ނުކުރެވުނު ކަމަށެވެ.