މި ސަރުކާރުން ކަމެއްގެ ފެހި ސިގްނަލް ލިބޭނެ ކަމަށް ބުނެފި ނަމަ އެކަމެއް ދަނީ ގޯހުން ގޯހަށް - މާރިޔާ
ރާއްޖޭގެ އިގްތިސާދު ކުރިއެރުވުމަށް ވެސް ސަރުކާރަށް މަސައްކަތްތަކެއް ނުކުރެވޭ ކަމަށް އެކަމަނާ ވިދާޅުވި
ކުރީގެ ޑިފެންސް މިނިސްޓަރ މާރިޔާ އަހުމަދު ދީދީ
މި ސަރުކާރުން ކަމެއްގެ ފެހި ސިގްނަލް ލިބޭނެ ކަމަށް ބުނެފި ނަމަ އެކަމެއް ދަނީ ގޯހުން ގޯހަށް ކަމަށް ކުރީގެ ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
މާރިޔާ އެފަދައިން ވިދާޅުވީ ރާއްޖެ ޓީވީގެ ދަލަ ސުރުޚީ ޕްރޮގްރާމްގައި ވާހަކަދައްކަވަމުންނެވެ.
އެގޮތުން ރާއްޖެއިން ބޭރަށް ކުރައްވާ ދަތުރުފުޅުތަކަށް ފަހު އެކި އެކި ދާއިރާތަކުން މަސައްކަތް ކުރެވޭނެ ކަމުގެ ފެހި ސިގްނަލް ލިބިފައިވާ ކަމަށް ސަރުކާރުން ބުނި ނަމަވެސް އެކަން ވަނީ އެއާއި ދިމާ އިދިކޮޅަށް ކަމަށް އެ ކަމަނާ ވިދާޅުވިއެވެ. އަދި ސަރުކާރުން ރާއްޖެ އިން ބޭރަށް ކުރާ ދަތުރުތަކުގެ ހަގީގީ ފައިދާ އާއްމުންނަށް ނުލިބޭ ކަމަށެވެ.
ރައީސް މުއިއްޒު ވެރިކަމަށް ވަޑައިގެން ތުރުކީ އަށް ކުރެއްވި ދަތުރުފުޅަށް ފަހު ތުރުކީ އިން ކާޑު ލިބޭނެ ކަމުގެ ފެހި ސިގްނަލް ލިބިފައިވާ ކަމަށާއި އިންޑިއާ ނޫން އެހެން ޤައުމުތަކުން ބޭސްފަރުވާ ލިބޭނެ ކަމުގެ ފެހި ސިގްނަލް ލިބިފައިވާ ކަމަށް ރައީސް ވިދާޅުވިކަން މާރިޔާ ވަނީ ފާހަގަކުރައްވާފައެވެ. ނަމަވެސް އެއިން އެއްވެސް ކަމެއް އެގޮތަށް ނުހިނގާކަމަށް މާރިޔާ ވިދަޅުވިއެވެ. ވެރިކަމަށް ވަޑައިގަތީ ވެސް ފެހި ސިގްނަލްގެ ވާހަކަ ދައްކަވަމުން ކަމަށް ވީ ނަމަވެސް ރާއްޖޭގެ އިގްތިސާދު ކުރިއެރުވުމަށް ވެސް ސަރުކާރަށް މަސައްކަތްތަކެއް ނުކުރެވޭ ކަމަށް އެކަމަނާ ވިދާޅުވިއެވެ.
ބައިނަލްއަޤުވަމީގޮތުން ރާއްޖެ ގެންގުޅޭ ޕޮލިސީ ދިވެހިންނަށް ސާފު ނުވާ ނަމަ އެހެން ބަޔަކަށް އެކަން ސާފުވާނީ ކިހިނެތްތޯ މާރިޔާ ވަނީ ސުވާލު އުފައްދަވާފައެވެ. އަދި ހަރުދަނާ ފޮރިން ޕޮލިސީ އެއް ނެތުމަކީ ރާއްޖެ އަށް އޭގެ ގެއްލުން އިންތިހާ އަށް ކުރާނެ ކަމެއް ކަމަށް މާރިޔާ ވަނީ ފާހަގަކުރައްވާފައެވެ. ބޭރު ޤައުމުތަކާއި ގުޅުން ބާއްވާ އިރު ސަރުކާރުގެ ފަރާތުން ފެންނަނީ އޮޅޭ ފަދަ ކަންތައްތަކެއް ކަމަށް އެކަމަނާ ވިދާޅުވިއެވެ. އަދި އެއް އުސޫލެއްގެ މަތީގައި ކަންކަން ހިންގަން ނޭނގުމަކީ ފޮރިން ޕޮލިސީ ބަލިކަށިވާ ކަމެއް ކަމަށާއި ރާއްޖޭގެ އޮތީ ލާހޫރޭ ފޮރިން ޕޮލިސީ އެއް ކަމަށް މާރިޔާ ވަނީ ވިދާޅުވެފައެވެ.
މީގެ އިތުރުން މާރިޔާ ވިދާޅުވީ ރައީސް މުއިއްޒުގެ ވެރިކަމަށް ބަލާލުމުން ރައްޔިތުންގެ ވިސްނުމާއި ސަރުކާރާއި ދުރުހެލި މިންވަރު ފެނިގެންދާ ކަމަށެވެ. ރައީސް މުއިއްޒު އދ. އަށް ކުރެއްވި ދަތުރުފުޅުގައި ދައްކަވާފައިވާ ވާހަކަފުޅުތަކުންނާއި، އުޅުއްވާ ގޮތްކޮޅުތަކުން ވެސް ފެނިގެން ދިޔައީ އެ މަންޒަރުކަމަށް މާރިޔާ ފާހަގަކުރެއްވިއެވެ.
