އދ. ގެ ސެކްރެޓަރީ ޖެނެރަލް އިޒްރޭލަށް އެރުން މަނާކޮށްފި
ޚާރިޖީ ވަޒީރު އިސްރާއީލު ކަޓްޒް ވިދާޅުވެފައިވަނީ މި ނިންމުމަކީ އަންގާރަ ދުވަހު އީރާނުން އިޒްރޭލަށް ދިން މިސައިލް ހަމަލާ "ސާފު އިބާރާތުން ކުށްވެރިކުރުމަށް" ގުޓެރެސް ނުކެޅުދުމާ ގުޅިގެން ނިންމި ނިންމުމެއް ކަމަށް
އދ ގެ ސެކްރެޓަރީ ޖެނެރަލް ގުޓަރެސް
އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް އިޒްރޭލަށް އެރުން މަނާކޮށްފިއެވެ.
އިޒްރޭލުގެ ފޮރިން މިނިސްޓަރު ވިދާޅުވެފައިވަނީ އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރެސްއަކީ އިޒްރޭލުން "ނުރުހޭ މީހެއް" ކަމަށާއި އޭނާއަށް އެ ޤައުމަށް ވަނުން މަނާކުރެވިފައިވާ ކަމަށެވެ.
ޚާރިޖީ ވަޒީރު އިސްރާއީލު ކަޓްޒް ވިދާޅުވެފައިވަނީ މި ނިންމުމަކީ އަންގާރަ ދުވަހު އީރާނުން އިޒްރޭލަށް ދިން މިސައިލް ހަމަލާ "ސާފު އިބާރާތުން ކުށްވެރިކުރުމަށް" ގުޓެރެސް ނުކެޅުދުމާ ގުޅިގެން ނިންމި ނިންމުމެއް ކަމަށެވެ.
އޭނާ ވަނީ އދ. ގެ އިސްވެރިޔާއަކީ "އިޒްރޭލާ ދެކޮޅު" މީހެއް ކަމަށާއި، "ޓެރަރިސްޓުންނާއި، ރޭޕިސްޓުންނާއި، މާރާމާރީ ހިންގާ މީހުންނަށް އެހީތެރިވާ" މީހެއް ކަމަށް ތުހުމަތުކުރައްވާފައެވެ.
"ގުޓެރެސްއަކީ އދ. ގެ ތާރީޚުގައި އެ ޖަމާއަތުގައި ޖެހި ނުބައި ލަފެއްގެ ގޮތުގައި އަންނަން އޮތް ޖީލުތަކާ ހަމައަށް ހަނދާން ކުރާނެ" ކަމަށް އޭނާ ވިދާޅުވިއެވެ.
އިއްޔެ، އދ. ގެ އިސްވެރިޔާ ވަނީ މެދުއިރުމަތީގެ ހަނގުރާމަ ފުޅާވެ، ގޯހުންގޯހަށް ދާދިއުން ކުށްވެރިކުރައްވާ، ހަނގުރާމަ ހުއްޓާލުމަށް ގޮވާލައްވާފައެވެ.
