ބޭރުފައިސާގެ ގަވައިދުގައި ހުރީ އެއްބަސްވެވޭނެ ކަންކަމެއް ނޫން: މަޓީ
ގަވައިދުތައް އެކުލަވާލާފައިވަނީ ކަމާގުޅުން ހުރި ސްޓޭކްހޯލްޑަރުންނާ މަޝްވަރާ ކުރުމަށްފަހުގައި ކަމަށް އެމްއެމްއޭ އިން ބުނި ނަމަވެސް، އެކަން ހިނގާފައިވަނީ ބުނެވިދިޔަ ގޮތައް ނޫން ކަމުގައި މަޓީން ބުނޭ
ފެބްރުއަރީ 19، 2024 ގައި ބޭއްވި މަޓީގެ އާންމު ޖަލްސާގެ ބައެއް ބައިވެރިން
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަލަށް ތައާރުފް ކުރި ބޭރު ފައިސާގެ ގަވާއިދާ ގުޅޭގޮތުން މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މާޓީ) އިން ކަންބޮޑުވުން ފާޅުކޮށް، ގަވާއިދަށް އެ އެސޯސިއޭޝަނުން ހުށަހެޅި ކަންބޮޑުވުންތަކަށް ރިޢާޔަތްކޮށްފައި ނުވާކަމަށް ބުނެފިއެވެ.
އޮކްޓޯބަރު 1 ވަނަ ދުވަހު ބޭރު ފައިސާގެ ގަވައިދާއި މަނީ ޗޭންޖިންގ ވިޔަފާރިއާ ބެހޭ ގަވައިދާ ބެހޭ ގޮތުން އެމްއެމްއޭ އިން ނެރުނު ނޫސްބަޔާނާ ގުޅިގެން މަޓީން ބުދަ ދުވަހު ނެރުނު ބަޔާނެއްގައި ބުނެފައިވަނީ، "ގަވައިދުތައް އެކުލަވާލާފައިވަނީ ކަމާގުޅުން ހުރި ސްޓޭކްހޯލްޑަރުންނާ މަޝްވަރާ ކުރުމަށްފަހުގައި" ކަމަށް އެމްއެމްއޭ އިން ބުނި ނަމަވެސް، "އެކަން ހިނގާފައިވަނީ ބުނެވިދިޔަ ގޮތައް ނޫން ކަމުގައި ވަރަށް ހިތާމަޔާއެކު" ފާހަގަ ކުރާ ކަމަށެވެ.
މަޓީން ބުނާ ގޮތުގައި، އެމްއެމްއޭގެ އެދުމުގެ މަތިން ބައްދަލުވުމެއް ބޭއްވިފައިވީ ނަމަވެސް، ގަވާއިދުގެ ފަހުގެ ޑްރާފްޓްގައި އެސޯސިއޭޝަނުގެ ޚިޔާލުތަކަށް ހިމަނާފައެއް ނުވެއެވެ. މަޓީން ބުނެފައިވަނީ "ބޭރު ފައިސާގެ އައު ގަވައިދުގައި ހިމެނުމަށް އެމްއެމްއޭ އިން ހުށަހަޅާފައިވާ ކަންތައްތަކަކީ އެ ޖަމްއިއްޔާ އަށް "އެއްބަސްވެވޭނެ ކަންތައްތަކެއް ނޫން" ކަމުގައެވެ.
"ގަވައިދު ގެޒެޓް ކުރެވުނުއިރު މި ޖަމްއިއްޔާގެ ފަރާތުން ހުށަހެޅި އެއްވެސް ކަންބޮޑުވުމަކަށް އެމްއެމްއޭގެ ފަރާތުން އިޖާބާދީފައި ނުވާކަން ފާހަގަ ކުރަމެވެ." މަޓީގެ ބަޔާނުގައި ވެއެވެ.
އެމްއެމްއޭ އިން އަލަށް އެކުލަވާލި ގަވާއިދުގެ ދަށުން، ފަތުރުވެރިކަމުގެ ސިނާޢަތުގައި ހަރަކާތްތެރިވާ އަދި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގައި ރަޖިސްޓަރީކޮށްފައިވާ ވިޔަފާރިތަކުން 30 ދުވަހުގެ ތެރޭގައި އެމްއެމްއޭގައި އަލުން ރަޖިސްޓަރީ ކުރަންޖެހޭނެއެވެ.
އަލަށް ރަޖިސްޓަރީކުރާ ފަރާތްތަކުންވެސް މި މުއްދަތުގެ ތެރޭގައި މި ގަވާއިދަށް ޢަމަލުކުރަންޖެހޭނެއެވެ.
ފަތުރުވެރިކަމުގެ ދާއިރާގައި މުދަލާއި ޚިދުމަތް ފޯރުކޮށްދޭ ފަރާތްތަކުން އަގުތަކުގެ ތަފްޞީލު ޖެހިގެން އަންނަ މަހުގެ 28 ވަނަ ދުވަހުގެ ކުރިން އެމްއެމްއޭ އަށް ހުށަހަޅަންޖެހޭނެއެވެ.
ގަވައިދު ބުނާ ގޮތުން ކޮންމެ މަހެއް ނިމޭތާ 87 ދުވަހުގެ ތެރޭގައި ލިބުނު ޖުމްލަ ބޭރު ފައިސާ އެމްއެމްއޭގައި ރަޖިސްޓަރީކޮށްފައިވާ ރާއްޖޭގެ ބޭންކެއްގެ ބޭރު ފައިސާގެ އެކައުންޓަކަށް ޖަމާކުރަންޖެހޭނެއެވެ.
މި ގަވާއިދުގައި ބަޔާންކޮށްފައިވަނީ، ވަކި އިސްތިސްނާތަކަކާއެކު، ރާއްޖޭގައި ކުރެވޭ މުޢާމަލާތްތައް ކުރަންވާނީ ދިވެހި ރުފިޔާއިން ކަމަށެވެ.
މި އިސްތިސްނާތަކުގެ ތެރޭގައި ސަރުކާރާ ގުޅުންހުރި ޑޮލަރުން ކުރެވޭ މުޢާމަލާތްތަކާއި، ރެމިޓެންސްގެ ގޮތުގައި ބޭރަށް ފައިސާ ފޮނުވުމާއި، ބޭރުގެ މުޢާމަލާތްތަކާއި، ފަތުރުވެރިން ކުރާ ވިޔަފާރިތައް ހިމެނެއެވެ.
އިސްތިސްނާ ކުރެވިފައިވާ ބައިތަކުގެ ތެރޭގައި ނުހިމެނޭ މުއާމަލާތެއް ބޭރު ފައިސާއިން ކޮށްފިނަމަ ކޮންމެ މުޢާމަލާތަކަށް 10,000 ރުފިޔާއިން ފެށިގެން 1 މިލިއަން ރުފިޔާއާ ހަމައަށް ޖޫރިމަނާ ކުރެވޭނެއެވެ.
މި ގަވާއިދުގެ އެހެން މާއްދާތަކާ ޚިލާފުވުމުން ވެސް 1 މިލިއަން ރުފިޔާއާ ހަމައަށް ޖޫރިމަނާ ކުރެވިދާނެ ކަމަށް ގަވައިދުގައި ބުނެއެވެ.
އެމްއެމްއޭ ގެ ގަވައިދު މިހާރު ބުނާ ގޮތުން، ފަތުރުވެރިކަމުގެ ވަސީލަތްތަކުން އެ ތަންތަނަށް ލިބޭ ބޭރު ފައިސާގެ ވަކި މިންވަރެއް ރާއްޖޭގެ ބޭންކުތައް މެދުވެރިކޮށް މާރު ކުރަންޖެހޭ ގޮތައް ވަނީ ހަމަޖައްސާފައެވެ. މިގޮތުން "ކެޓަގަރީ އޭ" ގައި ހިމެނޭ ރިސޯޓުތަކާއި، ހޮޓާތަކާއި، ފަތުރުވެރިންގެ އުޅަނދުފަހަރުން ކޮންމެ ފަތުރުވެރިއަކަށް 500 ޑޮލަރު މާރު ކުރަންޖެހޭނެއެވެ. "ކެޓަގަރީ ބީ" ގައި ހިމެނޭ ހޮޓާތަކާއި ގެސްޓްހައުސްތަކުން ކޮންމެ ފަތުރުވެރިއަކަށް 25 ޑޮލަރު މާރުކުރަންޖެހޭނެއެވެ.
އެހެން ނަމަވެސް ބޭރު ފައިސާއިން ޓެކްސް ދެއްކުމާއި، ދަރަނި އަދާކުރުމާއި، ނުވަތަ ކޯޓު އަމުރެއްގެ ދަށުން ހަމަޖެހިފައިވާ އިންތިޒާމުތަކުގެ ޙާލަތްތަކަށް ބަލައި ބޮލަކަށް މާރުކުރަން ޖެހޭ ޑޮލަރުގެ ނިސްބަތަށް ބަދަލު ގެނެވިދާނެ ކަމަށް އެމްއެމްއޭގެ ގަވައިދުގައި ވަނީ ބުނެފައެވެ.
