ގަވައިދާ ޚިލާފަށް އުޅޭ ބިދޭސީން ހޯދުމަށް އަތޮޅުތެރޭގެ ރަށްތަކުގައި އިންސްޕެކްޝަންތައް ކުރިއަށް ގެންދާނެ: ޝަމްއާން
އަތޮޅުތެރޭގައި އިންސްޕެކްޝަންތައް ކުރިއަށް ގެންދިއުމަށް ޕްލޭންތައް ދަނީ ހަދަމުން
ހުޅުމާލޭގައި ކުރިއަށް ގެންދިޔަ މާސް އިންސްޕެކްޝަންގެ ތެރެއިން
ގަވާއިދާ ޚިލާފަށް އުޅޭ ބިދޭސީން ހޯދުމަށް އަތޮޅުތެރޭގެ ރަށްތަކުގައި އިންސްޕެކްޝަންތައް ކުރިއަށް ގެންދާނެ ކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު ވިދާޅުވެއްޖެއެވެ.
އާދިއްތަ ދުވަހުގެ ހަވީރު ހުޅުމާލޭގައި ކުރިއަށް ގެންދިޔަ މާސް އިންސްޕެކްޝަންއާ ގުޅޭގޮތުން މީޑީއާތަކާއި ވާހަކަދައްކަވަމުން ޝަމްއާން ވިދާޅުވީ ގަވާއިދާ ހިލާފަށް އުޅޭ ބިދޭސީން ހޯދުމުގެ މަސައްކަތް މިހާރު ކުރިއަށް ގެންދަނީ މާލެ ސަރައްހަދުގައި ކަމަށެވެ. އަދި ކުރިއަށް އޮތްތަނުގައި އަތޮޅުތެރޭގެ ރަށްތަކުގައި ވެސް އިންސްޕެކްޝަންތައް ކުރިއަށް ގެންދާނެ ކަމަށާއި، އެ މަސައްކަތް ކުރުމަށް ޕްލޭންތައް އެކުލަވާލަމުންދާ ކަމަށް ޝަމްއާން ވިދާޅުވިއެވެ. އަދި ވިދާޅުވީ މިމަސައްކަތް ކުރުމަށް ވަގުތުކޮޅެއް ނަގާނެ ކަމަށެވެ.
ޝަމްއާން ވިދާޅުވީ ގަވާއިދާ ހިލާފަށް އުޅޭ ބިދޭސީންގެ މައްސަލަ ބޮޑު ކަމަށާއި، މިމައްސަލަ ހައްލު ކުރުމަށް އަމާޒު ހިފާފައިވާ ކަމަށެވެ. އެގޮތުން ކުރިއަށް އޮތް 3 އަހަރުގެ ތެރޭގައި މިމައްސަލަ ހައްލު ކުރުމަކީ މައިގަނޑު މަގުސަދު ކަމަށް އޭނާ ވިދާޅުވިއެވެ.
އޮޕަރޭޝަން ކުރަނގިއަށް އިޝާރާތް ކުރައްވައި ޝަމްއާން ވިދާޅުވީ މި އޮޕަރޭޝަންގެ ތެރެއިން ވެސް ބިދޭސީންނަށް ރަޖިސްޓްރީވުމުގެ ފުރުސަތު ލިބޭނެ ކަމަށެވެ.
ޝަމްއާން ވިދާޅުވީ ރާއްޖޭގައި ގަވާއިދާ ހިލާފަށް އުޅޭ ގިނަ އަދަދެއްގެ ބިދޭސީން މިހާރު ވެސް ޑީޕޯޓު ކުރެވިފައިވާ ކަމަށެވެ. އެގޮތުން ކުރިއަށް އޮތްތަނުގައި ގަވާއިދާ ހިލާފަށް އުޅޭ ބިދޭސީން ހޯދައި، ގާނޫނީ ގޮތުން އަޅަންޖެހޭ ފިޔަވަޅުތައް އަޅައި، ޑީޕޯޓު ކުރާނެ ކަމަށް ޝަމްއާން ވިދާޅުވިއެވެ.
