ކޮންމެ ދުވަހަކީ ސަރުކާރަށް ހެދުނު ގޯހެއް ރަނގަޅު ކުރަން "ޑިފެންސަށް ކުޅެންޖެހޭ" ދުވަހަކަށް ވެއްޖެ: މައުރޫފް
ޚާއްސަކޮށް ސިޔާސީ ޕާޓީތަކުންވެސް ރައްޔިތުންނާ އެކީގައި މަސައްކަތް ކުރަން ފަށާނެ ކަމަށް މައުރޫފް ވިދާޅުވި
ކެންދޫ ދާއިރާގެ މެންބަރު މައުރޫފް ޒާކިރު
ކޮންމެ ދުވަހަކީ ސަރުކާރަށް ހެދުނު ގޯހެއް ރަނގަޅު ކުރަން "ޑިފެންސަށް ކުޅެންޖެހޭ" ދުވަހަކަށް ވެފައިވާކަމަށް ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެއެވެ.
ރާއްޖެޓީވީގެ ސުވާލަކީ ޕްރޮގްރާމްގައި ވާހަކަ ދައްކަވަމުން މައުރޫފް ވިދާޅުވީ، ސަރުކާރުގެ ކުރީކޮޅުގައި މެމްބަރުން ސަރުކާރު ދަމަހައްޓަން މަސައްކަތް ކުރި ނަމަވެސް ރައްޔިތުންނަށް އެކިއެކި ގެއްލުންތައް ވަމުންދާ ހިސާބުން ކަންކަން ބަދަލުވުން އެކަށީގެންވާ ކަމަށެވެ.
މިހާރުވެސް ރައްޔިތުންނަށް އެތައް ގެއްލުމެއް ވަމުންދާކަން ފާހަގަ ކުރައްވައި މައުރޫފް ވިދާޅުވީ، ކަރަންޓު ބިލު ބޮޑުވުމުގެ މައްސަލައަށް އެކަނި ބަލާލި ނަމަވެސް ރައްޔިތުން އުފުލަމުންދާ ތަކުލީފުތައް އެނގިގެންދާ ކަމަށެވެ.
އެހެންކަމުން އެކަންކަމުގެ ހުރިހާ ކަންބޮޑުވުމެއް ރައްޔިތުން އެ ދާއިރާއެއްގެ މެމްބަރާވެސް ހިއްސާ ކުރާނެ ކަމަށާއި، ޚާއްސަކޮށް ސިޔާސީ ޕާޓީތަކުންވެސް ރައްޔިތުންނާ އެކީގައި މަސައްކަތް ކުރަން ފަށާނެ ކަމަށް މައުރޫފް ވިދާޅުވިއެވެ.
މައުރޫފް ވިދާޅުވާ ގޮތުގައި އެހިސާބުން ރައްޔިތުންގެ މަޖިލީހުގެ މެމްބަރުންވެސް މި ސަރުކާރު ދިފާއު ކުރެއްވުމަށް މަސައްކަތެއް ނުކުރައްވާނެއެވެ.
މައުރޫފް އިތުރަށް ވިދާޅުވީ، ސަރުކާރުގެ އާ ކޮޅުގައި ސަރުކާރު ދިފާއު ކުރުމަށް މެމްބަރުންނަށް އެތައް މަސައްކަތެއް ކުރަން ޖެހިފައިވާ މަންޒަރު މިއަދު ފެންނަނަމުންދާ ކަމަށެވެ. އެގޮތުން ކޮންމެ ދުވަހަކީ ސަރުކާރަށް ހެދުނު ގޯހެއް ރަނގަޅު ކުރަން "ޑިފެންސަށް ކުޅެންޖެހޭ" ދުވަހަކަށް ވެފައިވާ މަންޒަރު މިއަދު ފެންނަމުންދާކަމަށްވެސް މެމްބަރު ވިދާޅުވިއެވެ.
އޭގެ އިތުރުން، މެމްބަރުންނަށް ފައިސާ ދީގެން އަބަދު އެ މެމްބަރުން ކޮންޓްރޯލް ކުރެވޭނެކަމަށް ފެނިވަޑައިނުގަންނަވާކަމަށްވެސް މައުރޫފް ވިދާޅުވިއެވެ.
މައުރޫފް ވަނީ ޤައުމު އަނދަވަޅަކަށް ވެއްޓުމަކީ އޭގެ ނުރައްކަލާއި ގެއްލުން ހުރިހާ ރައްޔިތުންނަށް ކުރާނެ ކަމެއްކަން ފާހަގަ ކުރައްވައި އެކަމުގައި އެކުގައި މަސައްކަތް ކުރަން ގޮވާލައްވާފައެވެ.
