200ށް ވުރެ ގިނަ ބައިވެރިންނާއެކު އައިޔޫއެމްގެ އައިސީއައިއޭގެ 9 ވަނަ ކޮންފަރެންސް ފަށައިފި
އައިސީއައިއޭ ކޮންފަރެންސް ދެދުވަހަށް ކުރިއަށް ގެންދާނެ
އައިޔޫއެމްގެ އައިސީއައިއޭގެ ކޮންފަރެންސްގެ ތެރެއިން
މޯލްޑިވްސް އިސްލާމިކް ޔުނިވާސިޓީ (އައިޔޫއެމް) އިން ބާއްވާ އިންޓަނޭޝަނަލް ކޮންފަރެންސް އޮން އިންޓަލެކްޗުއަލް އެޑްވާންސްމަންޓް (އައިސީއައިއޭ)ގެ 9 ވަނަ ކޮންފަރެންސް ފަށައިފިއެވެ.
ހޮނިހިރު ދުވަހުގެ ހެނދުނު މި ކޮންފަރެންސް ފައްޓަވައިދެއްވީ އެޑިއުކޭޝަން މިނިސްޓަރު ޑރ. އިސްމާއީލް ޝަފީއު އެވެ.
ރާއްޖެ އާއި ރާއްޖޭން ބޭރުގެ 204 ބައިވެރިންނާއެކު މި ކޮންފަރެންސް ދެދުވަހަށް ކުރިއަށް ގެންދާނެއެވެ.
އައިޔޫއެމްގެ ސެންޓާ ފޯ ރިސާޗް އެން ޕަބްލިކޭޝަންސްގެ ކުރީގެ ޑީންކަން ކުރައްވާފައިވާ މިނިސްޓަރު ޝަފީއު މި ރަސްމިއްޔާތުގައި ވާހަކަދައްކަވަމުން ވިދާޅުވީ ސައިންޓިފިކް އިލްމަކީ ތައުލީމުގެ އެންމެ މަތީ ހަރުފަތުގެ ބިންގާ ކަމަށާއި، އޭގެ ސަބަބުން ހަރުދަނާ ސިޔާސަތުތައް އެކުލަވާލުމަށް ވެސް ފަސޭހަވެގެންދާ ކަމަށެވެ.
މިނިސްޓަރު ޝަފީއު ވަނީ އައިޔޫއެމްގެ ޕޯސްޓް ގްރެޖުއޭޓް ލައުންޖާއި، ދެ ރިސާޗް ޖާނަލް އިފްތިތާހުކޮށްދެއްވައިފަ އެވެ. އެ ޖާނަލްތަކަކީ އިންޓަނޭޝަނަލް ޖާނަލް އޮފް އިމާޖިން ޕާސްޕެކްޓިވްސް އިން އެޑިއުކޭޝަން (އައިޖޭއީޕީއީޑީ) އާއި އިންޓަނޭޝަނަލް ޖާނަލް އޮފް އިމާޖިން އިޝޫސް އިން މެނޭޖްމަންޓް، އެކައުންޓިން އެންޑް ޓެކްނޮލޮޖީ (އައިޖޭއީއެމްއޭޓީ) އެވެ.
އައިޔޫއެމްއިން މައުލޫމާތުދޭ ގޮތުގައި މި ކޮންފަރެންސަށް 113 ދިރާސީ ކަރުދާސް ހުށަހަޅާފައިވެ އެވެ. އޭގެ ތެރޭގައި ހިމެނެނީ އިނގިރޭސި ބަހުން ހުށަހަޅާފައިވާ 83 ކަރުދާހާއި ދިވެހި ބަހުން ހުށަހަޅާފައިވާ 12 ކަރުދާހެއްގެ އިތުރުން އަރަބި ބަހުން ހުށައަޅާފައިވާ 18 ކަރުދާހެކެވެ.
އެހެން އަހަރުތަކާއި ހިލާފަށް މި ފަހަރުގެ ކޮންފަރެންސްގައި ވަނީ ވަރަށް ގިނަ އަދަދަކަށް ޕްރީ ކޮންފަރެންސް ވޯކްޝޮޕް ބާއްވައިފައެވެ. މި ފަހަރު ބޭއްވި 12 ވޯކްޝޮޕުގެ ތެރެއިން ކޮންމެ ވޯކްޝޮޕަކަށް ވެސް އެވްރެޖްކޮށް 60 އަށް ވުރެ ގިނަ ފަރާތްތަކުން ބައިވެރިވެފައިވާ ކަމަށް އައިޔޫއެމްއިން ބުނެއެވެ.
މިއީ ރާއްޖޭގައި ބާއްވާ ބައިނަލްއަގްވާމީ ކޮންފަރެންސެއްގައި މިހާ ގިނަ އަދަދަކަށް ޕްރީ ކޮންފަރެންސް ވޯކްޝޮޕް ބޭއްވި ފުރަތަމަ ފަހަރެވެ. ފާއިތުވި އަހަރުތަކުގައި އައިސީއައިއޭގައި ވެސް އެންމެ ގިނަވެގެން ބާއްވަނީ ދެ ވޯކްޝޮޕެވެ.
މީގެ އިތުރުން އައިޔޫއެމްއިން ބުނީ މި އަހަރުގެ ކޮންފަރެންސުގައި ތަފާތު ތިން ދާއިރާއަކުން، ދުނިޔޭގައި ފާހަގަކޮށްލެވޭ ތިން އިލްމުވެރިއަކު ކީނޯޓު ތަގުރީރު ދެއްވާނެ ކަމަށެވެ. އެއީ މެލޭޝިއާގެ މާސްޒްލީ މަލިކް އާއި، އެމެރިކާގެ ފިލިޕް ހެލިންޖާ، އަދި ދެކުނު އެފްރިކާގެ ޓެކާނޯ މެޓްރެޑްރޯ އެވެ.
މެލޭޝިއާގެ ކުރީގެ އެޑިއުކޭޝަން މިނިސްޓަރު، އަދި އެ ގައުމުގެ ގާނޫނު ހަދާ މަޖިލީހުގެ މެމްބަރުކަން ވެސް ކުރައްވާފައިވާ މަލިކް ތަގުރީރު ދެއްވާނީ ތިމާވެށި ހިމާޔަތްކުރުމާއި، ދެމެހެއްޓެނެވި ތަރައްގީއާ ގުޅޭ ގޮތުންނެވެ. އެމެރިކާގެ ހެލިންޖާ އޮންލައިންކޮށް ތަގުރީރު ދެއްވާނީ ދެމެހެއްޓެނިވި އުސޫލުތަކުގެ މައްޗަށް މަތީ ތައުލީމު ދޭނެ ގޮތްތަކާ ބެހޭގޮތުންނެވެ. އޭނާއަކީ ތައިލެންޑުގެ މަހިޑޯލް ޔުނިވާސިޓީގައި މެނޭޖްމަންޓް ދާއިރާގެ ގްލޯބަލް ޓެލެންޓް ޕްރޮފެސަރެކެވެ. އަދި ސައުތު އެފްރިކާގެ ޓެކާނޯ މެޓްރެޑްރޯ އޭނާގެ ތަގުރީރުގައި އަލިއަޅުއްވާލާނީ ތައުލީމީ ދާއިރާގައި އާޓިފިޝަލް އިންޓެލިޖެންސް ބޭނުންކޮށްގެން ސިސްޓަމް ހެދުމާއި، މެނޭޖްކުރުމާ ބެހޭގޮތުންނެވެ.
އައިޔޫއެމްއިން ބުނީ މިއަހަރުގެ އައިސީއައިއޭ ކޮންފަރެންސަށް މެލޭޝިޔާ އާއި ބުރުނާއީ އަދި އިންޑޮނޭޝިއާގެ ޔުނިވާސިޓީތަކުން ވަރަށް ބޮޑު ތަރުހީބެއް ލިބިފައިވާ ކަމަށެވެ.
އެގޮތުން ބޭރުގެ 59 ފަރާތެއް ރާއްޖެ އައިސް މި ކޮންފަރެންސްގައި ބައިވެރިވެއެވެ. މި އަހަރުގެ ކޮންފަރެންސަށް އެންމެ ގިނައިން ކަރުދާސް ހުށަހަޅާފައިވަނީ ވަނީ ތައުލީމީ ދާއިރާއިންނެވެ. މީގެ އިތުރުން ގާނޫނީ ދާއިރާއިންނާއި، މެނޭޖްމަންޓްގެ ދާއިރާއިން ވެސް ކަރުދާސް ވަނީ ހުށަހަޅައިފަ އެވެ.
އިލްމު ހިއްސާކޮށް އުނގެނުމަށް ލޯބިކުރާ މުޖުތަމައެއް ބިނާކުރުމުގެ މަގުސަދުގައި އައިޔޫއެމް އިން 2016 ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ އައިސީއައިއޭއަކީ ރާއްޖޭގައި ބާއްވާ އިލްމީ އެންމެ ބޮޑު އެއް ކޮންފަރެންސެވެ.
