ގައުމިއްޔަތު މިނިސްޓްރީގައި މަސައްކަތް ކުރާނެ ރަނގަޅު މާހައުލެއް ނެތް ކަމަށް ބުނެ މުވައްޒަފުން ޕެޓިޝަން ހުށަހެޅުމުގެ ސަބަބުން  މުވައްޒަފުން އެކަހެރިކޮށް ނިކަމެތި ކުރަމުންދާކަމަށް މުވައްޒަފުން ބުނެފިއެވެ.  

ރާއްޖެއެމްވީއާ ކަންބޮޑުވުން ހިއްސާކުރި މުވައްޒަފުން ބުނީ، ދިވެހި ސިވިލް ސަރވިސްގެ ގާނޫނުގައިވާ ދިވެހި ސިވިލް ސަރވިސްގެ އަސާސި ސިފަތަކުގެ ތެރޭގައި އިންސާފުވެރިކަމާއި، ތެދުވެރިކަމާއިއެކު ވަކިފަރާތަކަށް ނުޖެހި، ދިވެހި ރައްޔިތުންނަށް ފުރިހަމަ ޚިދުމަތެއް ލިބެދެވޭނެ ޤާބިލުކަން ހުންނަންޖެހޭ ކަމަށާއި، މަސައްކަތުގެ މާޙައުލާގުޅޭ ކަންކަމުގައި، މުވައްޒަފުން ފާޅުކުރާ ޚިޔާލާއި، ދޭ ލަފާ، އަދި މުވައްޒަފުންގެ އެއްބާރުލުމާއި، ބައިވެރިވުމުގެ އަގުވަޒަންކުރަންޖެހޭކަމަށް ބަޔާންކޮށްފައިވާ ކަމަށެވެ.

އަދި މުވައްޒަފުންގެ ޙައްޤުތައް ހިމާޔަތްކޮށް، އެ ޙައްޤުތަކަށް ރައްކާތެރިވާ، މުވައްޒަފުންގެ ބޭނުންތަކަށް އިސްކަންދޭ، ކުރާ މަސައްކަތުގެ ހެޔޮ ބަދަލު ލިބިދެވޭނެ ނިޒާމުތަކެއް ޤާއިމްކޮށް، ހަމަހަމަކަން ކުރިއަރުވާ، ކެރިއަރ ބޭސްޑް ނިޒާމެއް ޤާއިމް ވެފައިއޮނަންޖެހޭކަމަށްވެސް ބަޔާންކޮށްފައިވާ ކަމަށާއި، މުވައްޒަފުންނާއި ގުޅޭގޮތުން ނިންމާ ނިންމުންތައް، ފަހުން ބަލަންޖެހިއްޖެ ހިނދެއްގައި ބެލޭނެފަދައިން، ކަނޑައެޅިފައިވާ އުޞޫލުތަކެއްގެ މަތިން، ހާމަކަން ބޮޑުގޮތެއްގައި ނިންމާނެ ނިޒާމެއް ޤާއިމްވެފައި އޮންނަންވާނެކަން ބަޔާންކޮށްފައިވާ ކަމަށެވެ.

އެހެންނަމަވެސް 11 ސެޕްޓެމްބަރު 2024 ގައި ކޮމިޝަނަށް 22 ސިވިލް ސަރވިސް ގެ މުވައްޒަފުން ހުށަހެޅި ޕެޓިޝަންގައި ބަޔާން ކޮށްފައިވާ އެކްޓިންގ ޕީއެސް އާތިކާ އިބްރާހީމް ގެ މަސްލަހަތު ހިމެނޭ މައްސަލަ ބަލާއިރު އޭނަ މަގާމުގެ ނުފޫޒު ބޭނުންކުރާގޮތަށް މާހައުލު އޮތްކަމީ ގައުމެއްގެ ރައްޔިތެއްގެ ހައިސިއްޔަތުންނާއި، ސަރުކާރަށް ހިދުމަތްކުރާ މުވައްޒަފެއްގެ ހައިސިއްޔަތުން ވަރަށް ކަންބޮޑުވާ ކަމެއްކަމާއި ނަފްސާނީގޮތުން ގެއްލުންވެ، ބިރުވެރިކަމެއްގައި  އެތައް މުވައްޒަފުންތަކެއް ތަހައްމަލުކުރަން ޖެހޭ ކަމެއްކަމަށް މުވައްޒަފުން ކިޔާދިނެވެ.

 މީގެ އިތުރުން މިނިސްޓްރީ ހިންގަމުންދަނީ ސިވިސް ސަރވިސް ގާނޫނުގައި ބަޔާންކޮށްފައިވާ ގޮތާ އެއްގޮތަށް ކަމާއިމެދުވެސް މިހާރު ސުވާލު އުފެދޭކަމަށް މުވައްޒަފުން ކިޔާދިނެވެ.  

ރާއްޖެއެމްވީއާ ވާހަކަ ދެއްކި މުވައްޒަފުން ކިޔާދިން ގޮތުގައި މި ޕެޓިޝަން ހުށަހެޅިފަހުން ވުޒާރާގެ ވަޒީރު އަދި އެކްޓިންގް ޕީއެސް ކަމާއި ހަވާލުވެ ހުންނެވި ފަރާތުން އިތުރަށް މުވައްޒަފުން ނިކަމެތިކޮށް، އެކަހެރި ކުރުމުގެ މާހައުލެއް ވަނީ އުފައްދަވާފައެވެ.

އޭގެ އިތުރުން، މި ކަންތައްތައް ސިވިލް ސާވިސްއަށް ހުށަހެޅި ނަމަވެސް މިހާތަނަށް އެއްވެސް ވަރެއްގެ އަޕްޑޭޓެއް ދީފައިނުވާކަންވެސް މުވައްޒަފުން ވަނީ ފާހަގަކޮށްފައެވެ.