ވަޒީރުން އަމިއްލައަށް ޕްރޮމޯޓްވާން އުޅެ ސަރުކާރުގެ ތަރުތީބު އޮތީ ގެއްލިފައި - އަމްރު
24 ސެޕްޓެމްބަރު 2024 | އަންގާރަ 14:29އިންޑިއާއަށް ވަގުތުން ދައްކަން ނުޖެހޭ 50 މިލިއަން ޑޮލަރެއް ސަރުކާރުން އަވަސް އަރުވާލައިގެން ދެއްކުމަކީ ކޮންމެހެން ކުރަންޖެހޭ ކަމެއް ނޫން
ރައީސް މުއިއްޒުގެ ކެބިނެޓުގެ ބައްދަލުވުމެއްގެ ތެރެއިން
ރައީސް ޑރ. މުހައްމަދު މުއިއްޒުގެ ވަޒީރުން އަމިއްލައަށް ޕްރޮމޯޓްވާން އުޅެ ސަރުކާރުގެ ތަރުތީބު އޮތީ ގެއްލިފައި ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން އަމްރު ވިދާޅުވީ މި ސަރުކާރުގައި ތަރުތީބެއް ނެތް ކަމަށެވެ. ސަރުކާރުގެ ތަރުތީބު ގެއްލިއްޖެ ކަމަށެވެ. ތަރުތީބު ގެއްލިގެން އުޅެނީ ކުރާ ކަންތައްތަކުގައި އެކަނި ނޫން ކަމަށާއި، މުޅި ނިޒާމުގެ ތަރުތީބު ގެއްލިފައިވާ ކަމަށެވެ. އެގޮތުން ވަކި ބަޔަކު ކުރަންޖެހޭ ކަމެއް އެހެންބަޔަކު ކުރުމަކީ ވަރަށް ބޮޑު މައްސަލައެއް ކަމަށާއި، މި ސަރުކާރުގެ އެކިއެކި ވަޒީރުން އެކިއެކި ވިސްނުމުގައި މަސައްކަތްކުރާތަން ފެންނަމުންދާ ކަމަށެވެ.
އަމްރު ވިދާޅުވީ ސަރުކާރުން ކުރަން ބޭނުންވާ ކަންކަމުގެ ނަތީޖާ ހާސިލްކުރަންވެސް ކުރާ ކަންކަމަކީ އޭގެ ނަތީޖާ ނުނުކުންނަ ކަންތައްތައް ކަމަށެވެ. އެގޮތުން ހުރިހާ ދިމާލެއްގައިވެސް ކަންކަން ހުރީ އެގޮތަށް ކަމަށެވެ.
އަމްރު ވިދާޅުވީ އިންޑިއާއަށް ވަގުތުން ދައްކަން ނުޖެހޭ 50 މިލިއަން ޑޮލަރެއް ސަރުކާރުން އަވަސް އަރުވާލައިގެން ދެއްކުމަކީ ކޮންމެހެން ކުރަންޖެހޭ ކަމެއް ނޫން ކަމަށެވެ.
އަމްރު ވިދާޅުވީ ގައުމުގެ ހަމައެއްލަމައެއް ނެތް ކަމަށެވެ. އަދި މި ކަންކަން ހައްލުކުރަން ޖެހޭ ކަމަށާއި، ސަރުކާރުން މި ކަންކަން ހައްލުނުކުރެވި މުޒާހަރާ ކުރަން އާންމުން ނުކުތުމަކީ އެއީ ގޮތެއް ނޫން ކަމަށެވެ. ސަރުކާރުން ވާހަކަ މަދުކޮށް އަމަލު ގިނަކުރަން ޖެހޭ ކަމަށާއި، މިހާރު ކަންކަން ރަނގަޅުކުރިވަރަކަށް ކުރިއަށް އޮތްތަނުގައިވެސް ކަންކަން ރަނގަޅުވެގެންދާނެ ކަމަށެވެ.
