މުވައްޒަފުން ވަކިކުރަނީ ހަރަދުކުޑަކުރާކަށް ނޫން، އެކަން ކުރަނީ ބޭނުންވާ ބަޔަކު ވަޒީފާއަށް ނަގާ ބާރުތައް އެއްކުރުމަށް: ބިގޭ

ސަރުކާރު ކުންފުނިތަކުންނާއި އެކިއެކި ވަޒީފާތަކުން މުވައްޒަފުން ވަކިކުރަނީ ހަރަދުކުޑަކުރާކަށް ނޫން، އެކަން ކުރަނީ ބޭނުންވާ ބަޔަކު ވަޒީފާއަށް ނަގާ ބާރުތައް އެއްކުރުމަށް ކަމަށް އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

އެމްޑީޕީގެ ހަވަރުބެރު ޕެނަލް ޑިސްކަޝަންގައި ވާހަކަ ދައްކަވަމުން އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވީ ވެރިކަން ފެށި ހިސާބުން ފެށިގެން އާދަޔާ ހިލާފަށް މުވައްޒަފުން ވަޒީފާއިން ވަކިކުރަމުންދާކަން ފާހަގަކުރެވޭ ކަމަށެވެ. އަދި ސިޔާސީ ބޭނުމަށް ވަކި ޕާޓީއަކަށް ނުވަތަ ވަކި ސަރުކާރަކަށް ނިސްބަތްވާ މީހުންނަށް ސަރުކާރުގެ ކުންފުނިތަކުން މިހާތަނަށް 500ށް ވުރެ ގިނަ މީހުން ވަކިކޮށްފައިވާ ކަމަށެވެ. ނަމަވެސް ވަޒީފާ ދިން އަދަދު އެއަށްވުރެ އިތުރު ކަމަށާއި، 1500 އެއްހާ މީހުންނަށް ވަޒީފާ ދިންވާހަކަތައް އަޑު އިވޭ ކަމަށެވެ.

Advertisement

އޭނާ ވިދާޅުވީ ސަރުކާރުން މިކަން ކުރަނީ ހަރަދު ކުޑަކުރުމުގެ ވިސްނުމުގައި ނޫން ކަމަށާއި، ކުރައްވާ ކަމަކީ ޒަމާނުއްސުރެ އޮންނަ ބާރުތައް އެއްކުރުމުގެ ބޭނުމާއި، ފިކުރު ދިމާނުވާ މީހުން ވަޒީފާއިން ވަކިކުރުމާއި، ޕީއެންސީގެ ފިކުރުގެ މީހުންނަށް ވަޒީފާ ދިނުމުގެ ބޭނުމުގައި ކުރާ ކަމެއް ކަމަށެވެ.

ހަވަރު ބެރުގައި ވާހަކަ ދައްކަވަމުން މަރަދޫ ދާއިރާގެ މެންބަރު އަހުމަދު ދީދީ ވިދާޅުވީ ޑރ. މުއިއްޒަކީ ވައުދެއްވެއްޖެނަމަ އެ ވައުދަކާ ހިލާފުވާ ބޭފުޅެއް ކަމަށެވެ. ވައުދާ ހިލާފުވެ ދޮގު ހެދުމަކީ ރައީސް މުއިއްޒުގެ އާދައެއް ކަމަށެވެ. މީޑިއާތަކުންނާއި އާންމުން އެމަނިކުފާނާއި މުހާތަބުކުރައްވަނީ "ކައްޒާބު" ގެ ނަމުން ކަމަށާއި، އަދި އެނަން ކިޔަނީ ކިޔަންވެގެން ކަމަށެވެ.

މެންބަރު ދީދީ ވިދާޅުވީ މަޖިލިސް އިންތިހާބާ ޖެހެންދެން ވަޒީފާ ދެމުންދިޔައީ ގަނޑުކޮށް ކަމަށާއި، އެއިރުވެސް އިގްތިސާދީ ހާލަތު އޮތްގޮތްވެސް އެނގިވަޑައިގަންނަވާނެ ކަމަށެވެ. ނަމަވެސް ކުއްލިއަކަށް އިގްތިސާދީ ހާލަތު އޮތްގޮތް އެނގުނުކަމަށް ބުނެ ދައްކާ ވާހަކައަކީ ބޮޑު އޮޅުވާލުމެއް ކަމަށެވެ.