ޣައްޒާގައި ގެދޮރު ގެއްލިފައިވާ ފަލަސްތީނުގެ ރައްޔިތުން ވަގުތީ ހިޔަލެއްގެ ގޮތުގައި ބޭނުންކުރަމުންދިޔަ ދެ ސްކޫލަކަށް އިޒްރޭލުން ބޮން އެޅުމުގެ ސަބަބުން އެތައް ބަޔަކު ޝަހީދުވެއްޖެއެވެ.

އާދިއްތަ ދުވަހު ޣައްޒާ ސިޓީގެ ޝާތީ ރެފިއުޖީ ކޭމްޕް ކަފްރް ގާސިމް ސްކޫލަށް ދިން ހަމަލާގައި ފަލަސްތީނުގެ 7 މީހުން ޝަހީދުވެފައިވާއިރު، އެ ހަމަލާ އަށް ސައުވީސް ގަޑީއިރު ނުވަނީސް ނުސެއިރާތު ރެފިއުޖީ ކޭމްޕްގައި ހުންނަ ޚާލިދް ބިން އަލް-ވަލީދް ސްކޫލަށް އިޒްރޭލުން ވަނީ ބޮން އަޅާފައެވެ. މި ހަމަލާގައި މަދުވެގެން 3 ފަލަސްޠީނު މީހުން ޝަހީދުވެފައިވެއެވެ.

ޚާލިދު ބިން އަލް-ވަލީދު ސްކޫލަށް ދިން މަރުގެ ހަމަލާގެ ޒިންމާ އިޒްރޭލުން ވަނީ ނަގާފައެވެ. މި ހަމަލާ ދިނުމަށްފަހު ވެސް އިޒްރޭލުން ބުނީ އެ ސްކޫލް އަކީ ހަމާސްގެ ކޮމާންޑް އެންޑް ކޮންޓްރޯލް ސެންޓަރެއް ކަމުގައެވެ. އެހެން ނަމަވެސް މިހެން ބުނުން ފިޔަވާ އިތުރު ހެއްކެއް އިޒްރޭލުން ދައްކާފައެއް ނުވެއެވެ.

އިޒްރޭލުން ޣައްޒާގެ ސްކޫލުތަކަށް ހަމަލާ ދިނުމަކީ އާންމު ކަމަކަށް ވެފައިވާ ކަމެކެވެ.

ކޮންމެ ހަމަލާއަކަށް ފަހު އެތަންތަނަކީ ހަމާސްގެ ކޮމާންޑް އެންޑް ކޮންޓްރޯލް ސެންޓަރުތަކެއް ކަމަށް ބުނެއެވެ.

އޯގަސްޓް މަހު އެކަނި ވެސް އިޒްރޭލުން މަދުވެގެން 16 ސްކޫލަކަށް ހަމަލާދީ، އެތަންތަނުގައި ވަގުތީ ރައްކައުތެރިކަން ހޯދަމުން ދިޔަ އެތައް އާންމު ރައްޔިތުންނެއް ވަނީ ޝަހީދު ކޮށްލާފައެވެ.

މި ހަމަލާތަކުގައި ޢާންމު ރައްޔިތުން މަރުވެފައިވާ އަދަދު މަތިވުމާއި، އާދަޔާ ޚިލާފަށް ބާރުގަދަ ބޮމުގެ ހަމަލާތައް ދީފައިވުމާއެކު މިއީ ހަނގުރާމައިގެ ޖަރީމާއެއްގެ ގޮތުގައި ދެކޭ ކަމަށް އ.ދ.ގެ އިންސާނީ ޙައްޤުތަކާބެހޭ އޮފީހުން ބުނެފައިވެއެވެ.            

އިޒްރޭލުން ހިފާފައިވާ ހުޅަނގު އައްސޭރީގައި ހުންނަ އަލްޖަޒީރާގެ އޮފީހަށް ހަތިޔާރު އެޅި އިޒްރޭލު ސިފައިން ވަދެގަނެ އެ އޮފީސް ބަންދުކުރުމަށް އަމުރު ކުރުމާ ގުޅިގެން ދުނިޔޭގެ ލީޑަރުންނާއި ނޫސްވެރިކަމުގެ މިނިވަންކަމަށް މަސައްކަތްކުރާ ޖަމާޢަތްތަކުން އިޒްރޭލުގެ އެ އަމަލު ވަނީ ކުށްވެރިކޮށްފައެވެ.

އިޒްރޭލުން ޣައްޒާގައި ކުރަމުންދާ ހަނގުރާމައިގައި މަދުވެގެން 41،431 ފަލަސްތީން މީހުން ޝަހީދުވެފައިވާއިރު، 95،818 މީހުން ޒަޚަމްވެފައިވެއެވެ.