ރައީސް މުއިއްޒުގެ ސަރުކާރަކީ އިނާމު ދޭން މޮޅު ސަރުކާރެއް: މެންބަރު ނާޒިލް

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރަކީ އިނާމު ދޭން މޮޅު ސަރުކާރެއް ކަމަށް ދިވެހިރައްޔިތުން ޑިމޮކްރެޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.

ބުރާސްފަތި ދުވަހުގެ ރޭ އެމްޑީޕީން ކުރިއަށް ގެންދިޔަ ޖަލްސާގައި މެންބަރު ނާޒިލް ވިދާޅުވީ ރައީސް މުއިއްޒުގެ ސިޔާސީ ޕާޓީ، ޕީއެންސީ އަކީ އެންމެ މީހުން ގިނަ ޕާޓީއަށް ހެދުމަށް ކުރާ މަސައްކަތްތައް ވަރަށް ފުޅާކޮށްފައިވާ ކަމަށެވެ. އެގޮތުން މިހާރު އެޕާޓީގެ މީހުން އޮޑިފަހަރުތަކަށް އަރައި ފޯމް ފުރުވުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.

ނާޒިލް ވިދާޅުވީ މި ސަރުކާރުން އިނާމު ދެނީ ސަރުކާރުގެ ރައްޔިތުންގެ މަޖިލީހުގެ މެންބަރުންނަށް އެކަނި ނޫން ކަމަށާއި، ޕީއެންސީއަށް 50 ފޯމް ހިފައިގެންދާ މީހަކަށް މަތީމަގާމެއްގެ އިތުރުން ބޮޑު އިނާމެއް ލިބޭ ކަމަށެވެ. ރައްޔިތުންނާއި ގައުމުގެ ހާލަތު މިސަރުކާރަށް ނޭނގުނު ނަމަވެސް މިއީ އިނާމު ދިނުމަށް މޮޅު ސަރުކާރެއް ކަމަށް ނާޒިލް ވިދާޅުވިއެވެ.

ނާޒިލް ވިދާޅުވީ ރާއްޖޭގެ އިގްތިސާދު ރަނގަޅުވާ ކަމަށެވެ. ނަމަވެސް މިސަރުކާރަށް ފައިސާ މެނޭޖްކުރަން ނޭނގޭ ކަމަށާއި، އެކަމުގެ ދަތިކަން ރައްޔިތުން މިއަދު އުފުލަމުންދާ ކަމަށް އޭނާ ވިދާޅުވިއެވެ.