ފޮއްދޫ ކައުންސިލް ފުޓްސަލް ޗެލެންޖް ފަށައިފި އެވެ.
މުބާރާތުގައި ފަސް ޓީމް ވާދަކުރެ އެވެ. އޭގެ ތެރެއިން އެއް ޓީމަކީ އެ އަތޮޅު ވެލިދޫ ޓީމެކެވެ. މުބާރާތުގެ ފުރަތަމަ މެޗު ނިމުނީ އެއްވަރުވެގެންނެވެ. ވެލިދޫ ސްޕޯޓްސް ކުލަބާއި, ކުޑަކަންމަތި ޔުނައިޓެޑު ވާދަކުރި މުބާރާތުގެ ފުރަތަމަ މެޗު ނިމުނީ 4-4 ން އެއްވަރު ވެގެންނެވެ.
މެޗުގައި ކުޑަކަންމަތި ޔުނައިޓެޑުގެ ކެޕްޓަން މުޙައްމަދު މައުމޫން ތިން ލަނޑު ޖެހި އެވެ. މެޗުގެ މޮޅު ކުޅުންތެރިއަކީ ވެސް އޭނާ އެވެ. އެ ޓީމަށް ދެން ލަނޑު ޖަހައި ދިނީ އަހުމަދު މާއިޝް ރަޝީދެވެ. ވެލިދޫ ޓީމްގެ ހަތަރު ލަނޑު ޖެހީ އަބްދުالله ޒިހާމްއާއި, އަޔާލް އަބްދުالله އާއި, ހަސަން އިބްރާހީމް އާއި, އަބްދުالله އިބްރާހީމް އެވެ.
މިދެ ޓީމުގެ އިތުރުން މުބާރާތުގައި ވާދަކުރަނީ ކުޑަކަންމަތި ސްޕޯރޓްސް ކްލަބާއި, ފޮއްދޫ ހެލްތު ސެންޓަރާއި, އެންމެ ފަހުގެ ޗެމްޕިއަން ސާއްބަ އެފްސީ އެވެ. ފަސް ޓީމް ލީގު ބުރެއް ކުޅެ ނިމޭއިރު އެއް ވަނަ ޓީމަށް ފައިނަލްގެ ސީދާ ޖާގަ ލިބޭނެ އެވެ. ފައިނަލްގެ ދެ ވަނަ ޖާގަ ލިބޭނީ ދެވަނަ ޓީމާއި ތިންވަނަ ޓީމްގެ މެދުގައި ކުޅޭ ސެމީ ފައިނަލުން މޮޅުވާ ޓީމަކަށެވެ.
މިއީ ފޮއްދޫ ކައުންސިލުން މި މުބާރާތް ބާއްވާ ފަސްވަނަ އަހަރެވެ. މިއަހަރުގެ މުބާރާތް މިމަހުގެ 24 ގެ ނިޔަލަށް ކުރިއަށް ދާނެ އެވެ.
