އަނިޔާގެ ސަަބަބުން އޮލްމޯ ކުޅުމާ ދުރަށް

ބާސެލޯނާ އަށް ކުޅެމުން އަންނަ ސްޕެއިންގެ އެޓޭކިން މިޑްފީލްޑަރު ޑެނީ އޮލްމޯ އަށް އަނިޔާވެ، ކުޅުމާ ދުރަށް ދާން ޖެހިއްޖެ އެވެ.

އުމުރުން 26 އަހަރުގެ ކުޅުންތެރިޔާ އަށް އަނިޔާވެފައި ވަނީ ސްޕެނިޝް ލީގުގައި ބާސެލޯނާ އިން ޖިރޯނާއާ ދެކޮޅަށް ކުޅުނު މެޗުގަ އެވެ. މެޗުގެ ދެ ވަނަ ހާފުގައި އޮލްމޯ އަށް ލިބުނު އަނިޔާގެ ސަބަބުން، މެޗުގެ 61 ވަނަ މިނެޓުގައި އޭނާ ވަނީ ބަދަލުކޮށްފަ އެވެ. އޮލްމޯގެ ބަދަލުގައި މެޗުގައި ކުޅެން ނިކުތީ އެރިކް ގާސިއާ އެވެ. ބާސެލޯނާ އިން ހަތަރު ލަނޑުގެ މޮޅެއް ހޯދި އެ މެޗުގައި، އެ ޓީމުގެ ތިން ވަނަ ލަނޑު ޖެހީ ވެސް އޮލްމޯ އެވެ.

މެޗަށްފަހު ކުރިއަށް ގެންދިޔަ އޮލްމޯގެ މެޑިކަލް ޓެސްޓުތަކުން އެނގުނު ގޮތުގައި އޭނާގެ ކަނާތު ފައިގެ ފަލަމަސްގަނޑަށް ވަނީ އަނިޔާވެފަ އެވެ. ބާސެލޯނާގެ މެޑިކަލް ޓީމުން އަންދާޒާ ކޮށްފައިވާ ގޮތުގައި، އެ އަނިޔާގެ ސަބަބުން ގާތް ގަނޑަކަށް ހަތަރެއް ނުވަތަ ފަސް ހަފުތާގެ މުއްދަތަކަށް އޮލްމޯ ކުޅުމާ ދުރުގައި ހުންނަން ޖެހޭނެ އެވެ. އަދި ވީ އެންމެ އަވަހަކަށް، އަނިޔާ އިން ރަނގަޅު ވުމަށް ރިކަވަރީގެ ކަންކަން ކުރިއަށް ގެންދާނެ ކަމަށް ވެސް، ބާސެލޯނާގެ މެޑިކަލް ޓީމާ ހަވާލާދީ ސްޕެއިންގެ މީޑިއާ ތަކުގައި ވަނީ ބުނެފަ އެވެ.

ޖަރުމަނުގެ އާރްބީ ލައިޕްޒިގްގައި ހުރުމަށްފަހު އޮލްމޯ ބާސެލޯނާ އަށް ބަދަލުވީ ކުރިއަށްދާ ސީޒަނާ ދިމާކޮށެވެ. ނަމަވެސް، ސްޕެނިޝް ލީގުގައި އޭނާ ރަޖިސްޓްރީ ކުރުމުގައި ބާސެލޯނާ އަށް ވަނީ ދަތިތަކާ ކުރިމަތިލާން ޖެހިފަ އެވެ. ބާސެލޯނާ އަށް އޮލްމޯ ރަޖިސްޓްރީ ކުރެވުނީ ވެސް އައު ސީޒަންގެ ސްޕެނިޝް ލީގު ފެށި ފަހުންނެވެ. އޭގެ ފަހުން އޮލްމޯ އަންނަނީ ބާސެލޯނާގައި މޮޅު ކުޅުމެއް ދައްކަމުންނެވެ. އޭނާ ވަނީ މިހާތަނަށް ބާސެލޯނާ އަށް ކުޅެދިން ތިން މެޗުގައި ތިން ލަނޑު ޖަހައިފަ އެވެ.