ގައުމިއްޔަތު މިނިސްޓްރީގެ މުވައްޒަފުން ހުށަހަޅާފައިވާ ޕެޓިޝަންގެ މައުލޫމާތު އެނގިވަޑައިނުގަންނަވާ: މިނިސްޓަރު
އެކްޓިން ޕީއެސްއާ ގުޅޭގޮތުން ސުވާލުކޮށްފައިނުވޭ، ނަމަވެސް މިނިސްޓަރު ވިދާޅުވީ ވަކި މީހަކަށް ސުވާލު އަމާޒު ކުރެއްވި ކަމަށް
ނޫސްވެރިންގެ ބައްދަލުވުމުގައި މިނިސްޓަރު އާދަމް ނަސީރު އިބްރާހީމް ވާހަކަދައްކަވަނީ
ގައުމިއްޔަތު މިނިސްޓްރީގައި މަސައްކަތް ކުރާނެ ރަނގަޅު މާހައުލެއް ނެތް ކަމަށް ބުނެ މުވައްޒަފުން ހުށަހަޅާފައިވާ ޕެޓިޝަންގެ މައުލޫމާތު އެނގިވަޑައިނުގަންނަވާ ކަމަށް މިނިސްޓަރު އާދަމް ނަސީރު އިބްރާހީމް ވިދާޅުވެއްޖެއެވެ.
ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕެޓިޝަންއާ ގުޅޭގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ އެމައްސަލަ ރަސްމީކޮށް ހުށަހަޅާފައިނުވާ ކަމަށާއި، ޕެޓިޝަންގެ މައުލޫމާތު އެނގިވަޑައިނުގަންނަވާ ކަމަށެވެ.
ނޫސްވެރިޔާގެ ސުވާލުވަކި މީހަކަށް އަމާޒު ކުރެވި ކަމަށް މިނިސްޓަރު ތުހުމަތު ކުރައްވައި ވިދާޅުވީ އެކްޓިން ޕީއެސް އާތިކާ އިބްރާހިމްއަކީ ވަރަށް ބުރަކޮށް މަސައްކަތް ކުރާ މުވައްޒަފެއް ކަމަށާއި، 80 މުވައްޒަފުން ބަލަހައްޓާ ކަމަށެވެ. ނަމަވެސް ނޫސްވެރިޔާ އެކްޓިން ޕީއެސްއާ ގުޅޭގޮތުން ސުވާލުކޮށްފައިނުވެއެވެ. އަދި ގައުމިއްޔަތު މިނިސްޓްރީގައި މަސައްކަތް ކުރަމުންދަނީ ސިވިލް ސަރވިސްގެ 31 މުވައްޒަފުންނެވެ.
މީގެ އިތުރުން މިނިސްޓަރު ވިދާޅުވީ ގައުމިއްޔަތު މިނިސްޓްރީގެ މުވައްޒަފުން ވަރަށް ބުރަކޮށް މަސައްކަތް ކުރާ ކަމަށާއި، މިނިސްޓްރީގެ މަސައްކަތްތައް 24 ގަޑިއިރު ހިނގާ ކަމަށެވެ.
ޕެޓިޝަން ސިވިލް ސަރވިސް ކޮމިޝަނަށް ހުށަހަޅާފައިވާތީ ދެން އިތުރަށް ބަހެއް ހޯދަން ޖެހޭނީ އެކޮމިޝަންގެ ފަރާތުން ކަމަށް މިނިސްޓަރު ވިދާޅުވިއެވެ.
ޕެޓިޝަންގެ މައުލޫމާތު އެނގިވަޑައިނުގަންނަވާ ކަމަށް މިނިސްޓަރު ވިދާޅުވި ނަމަވެސް ޕެޓިޝަން ހުށަހެޅި މުވައްޒަފުން ބުނެފައިވަނީ މިނިސްޓަރަށް މައްސަލަ ހުށަހަޅައިގެން މައްސަލަ ބެލުމަށް މަސައްކަތް ކުރި ނަމަވެސް އެއްވެސް އެއްބާރުލުމެއް މިނިސްޓަރުގެ ފަރާތުން ލިބިފައިނުވާ ކަމަށެވެ.
ގައުމިއްޔަތު މިނިސްޓްރީގައި މަސައްކަތް ކުރާނެ މާހައުލެއް ނެތް ކަމަށް ބުނެ، އެމިނިސްޓްރީގެ 22 މުވައްޒަފުން ސޮއިކޮށްފައިވާ ޕެޓިޝަނެއް 11 ސެޕްޓެންބަރު 2024 ވީ ބުދަ ދުވަހު ސިވިލް ސަރވިސް ކޮމިޝަނަށް ވަނީ ހުށަހަޅާފައެވެ.
