ވ. އާރަށުގެ ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އިއްވި ހުކުމް ބާތިލްކުރި މައްސަލައިގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

އާރަށު ހިޔާނާތުގެ މައްސަލައިގައި ހައިކޯޓުގެ ނިންމުމުގައި އަންގާފައި އޮތީ މައިގަނޑު 3 ކަމެކެވެ.

އެއީ ޝަރީއަތުގެ ކުރީގެ ހުށަހެޅުންތަކަށް އަލުން ފުރުސަތުދީ އެކަމަށް ގޮތް ނިންމުމާއި، ދައުލަތުގެ އައު ހެކިތައް އެއްފަރާތް ކުރުމާއި، ދަށު ކޯޓުގެ ރިޕޯޓުގެ 68 ވަނަ ނުކުތާގައި ނެރެފައިވާ ދޭހަ އެއްފަރާތްކޮށް، އަލުން ކްރިމިނަލް ކޯޓުން މައްސަލައިގެ ގޮތެއް ކަނޑައެޅުމަށެވެ.

އޭގެ ތެރެއިން ހައިކޯޓުން ހެއްކާ ގުޅޭގޮތުން ނިންމާފައިވާ ނިންމުންތަކަކާއި ގުޅިގެން ދައުލަތުން ވަނީ ބައެއް ނުކުތާތައް ސުޕްރީމް ކޯޓުގައި އިސްތިއުނާފުވެސް ކޮށްފައެވެ.

އެއީ މައްސަލައިގެ ޝަރީއަތް ފެށި ފަހުން ދައުލަތުން ހުށަހެޅި އައު ހެކިތައް ބަލައި ނުގަނެވޭނެކަމަށް ހައިކޯޓުން ނިންމުމާއި ގުޅިގެން ސުޕްރީމް ކޯޓަށް ހުށަހެޅި މައްސަލައެކެވެ.

ހޯމަ ދުވަހުގެ އަޑުއެހުމުގައި ރައީސް ޔާމީނުގެ ވަކީލުން ވިދާޅުވީ، ދިފާއުން އެދެނީ ސުޕްރީމް ކޯޓަށް ހުށަހަޅާފައިވާ މައްސަލައިގައި ގޮތެއް ނިމުމުން ޝަރީއަތުގެ ކުރީގެ ހުށަހެޅުންތަކަށް ގޮތް ނިންމުމަށް ކަމަށެވެ.

ސުޕްރީމް ކޯޓުގައި އެ ކަންކަން އިލްތިމާސްކޮށްފައި އޮއްވައި ދަށު ކޯޓުގައި ހިނގަމުންދާ ބައިތައް ކުރިއަށް ނުގެންދިއުމަށް އެދޭކަމަށް ދިފާއުން ވަނީ ފާހަގަކޮށްފައެވެ. ދިފާއުން ދެކޭ ގޮތުގައި އެހިސާބުން މައްސަލައިގެ "އޯވަލެޕެއް" އާދެއެވެ.

މި އަޑުއެހުމުގައި ދައުލަތުގެ ވަކީލު ވިދާޅުވީ، ސުޕްރީމް ކޯޓަށް މައްސަލަ ހުށަހަޅާފައިވާ ކަމަށާއި، ސުޕްރީމް ކޯޓުގައި އޮތް މައްސަލައިގެ ޔައުމިއްޔާއާ މި ހިނގަމުންދާ މައްސަލައާވެސް ގުޅޭ ކަމަށެވެ. އެހެންކަމުން ސުޕްރީމް ކޯޓުގައި ނުކުތާތަކެއް އިސްތިއުނާފު ކޮށްފައިވާތީ ސުޕްރީމް ކޯޓުގެ ނިންމުމާއެކު، ބަދަލުތަކެއް އައުން އެކަށީގެންވާކަން ދައުލަތުން ފާހަގަކޮށްފައިވެއެވެ.

ދައުލަތުންވެސް ވަނީ ދިފާއުން ނެގި ނުކުތާގައި ބުރަދަން ހުރިކަން ޤަބޫލު ކުރައްވާކަމަށް ވިދާޅުވެފައެވެ.

ދިފާއުން ވަނީ ބައެއް ލިއެކިއުންތައް ނުލިބޭކަންވެސް ފާހަގަ ކުރައްވާފައެވެ. އެއީ ތަހުގީގު މަރުޙަލާއަށް ރައީސް ޔާމީނު ދެެއްވާފައިވާ އިންޓަވިއުތަކުގެ އޯޑިއޯ ވީޑިއޯ ރެކޯޑިންގ ތަކެވެ.

މި އަޑުއެހުމުގައި ޔާމީން ވިދާޅުވީ، ފުލުހުންގެ ތަހުގީގުގެ ލިއެކިއުންތައް ލިބެންޖެހޭނެކަމަށް ނިންމާފައިވަނީވެސް ސުޕްރީމް ކޯޓުގައި ކުރިއަށް ދިޔަ އެހެން މައްސަލައެއްގެ ނިންމުމެއްގެ ތެރެއިން ކަމަށެވެ. އެހެންކަމުން މައްސަލައިގެ ތަހުގީގުގައި ކަން ހިންގާފައިވާ ގޮތް ބަލަން ދިފާއުން ބޭނުންވާކަމަށް ޔާމީން ވިދާޅުވިއެވެ.

އޭގެ ތެރޭގައި "އުފައްދާވައިވާ" ލިއެކިއުންތައް ހުންނާނެކަމަށް ޤަބޫލު ކުރެވޭކަމަށްވެސް ރައީސް ޔާމީނު ވިދާޅުވިއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ. ގާޒީ ވިދާޅުވީ، ކޯޓަށް ހުށަހެޅިފައިވާ އެންމެހައި ލިއެކިއުންތައް ޝަރީއަތުން ދޫކުރާނެ ކަމަށެވެ.

ދެފަރާތުން ދެއްކެވި ވާހަކަތަކަށް ރިއާޔަތް ކުރައްވައި ގާޒީވެސް ވަނީ ސުޕްރީމް ކޯޓުގައި އިސްތިއުނާފު ކޮށްފައިވާ މައްސަލައިގެ ގޮތެއް ނިމުމުން ދަށު ކޯޓުގެ މައްސަލަ ކުރިއަށް ގެންދިއުމަށް ނިންމަވާފައެވެ.