ރުފިޔާއިން މުއާމަލާތް ކުރަން ޗައިނާގެ މަރުކަޒީ ބޭންކާއެކު ސޮއިކުރި އެއްބަސްވުމުގެ މައުލޫމާތު ހޯދުމަށް ރާއްޖެޓީވީން އާރްޓީއައި ހުށަހަޅައިފި

ރުފިޔާއިން މުއާމަލާތް ކުރަން ޗައިނާގެ މަރުކަޒީ ބޭންކާއެކު ސޮއިކުރި އެއްބަސްވުމުގެ މައުލޫމާތު ހޯދުމަށް ރާއްޖެޓީވީން އެދިއްޖެއެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އާރްޓީއައި މެދުވެރިކޮށް ރާއްޖެޓީވީން އެދިފައިވަނީ 15 ސެޕްޓެންބަރު 2024 ވީ އާދިއްތަ ދުވަހު އެވެ.

އެ އާރުޓީއައި ރާއްޖެޓީވީން އެދިފައިވަނީ ވިޔަފާރިއާއި އިންވެސްޓްމަންޓު ކުރިއަރުވަން ދިވެހި ސަރުކާރުން ޗައިނާގެ ޕީޕަލްސް ބޭންކާއެކު މިދިޔަ ހުކުރު ދުވަހު ސޮއިކުރި މެމޮރަންޑަމް އޮފް އަންޑަސްޓޭންޑިންގެ ދަށުން ރާއްޖޭން ނަގާފައިވާ ދަރަނިތައް ދިވެހި ރުފިޔާއިން ދެއްކޭނެތޯ އަދި ދިވެހި ވިޔަފާރިވެރިންނަށް ދިވެހި ރުފިޔާއިން ޗައިނާގެ ކުންފުނިތަކާއެކު ވިޔަފާރީގެ މުއާމަލާތްތައް ކުރެވޭނެތޯ ސުވާލުކޮށްފައެވެ. އަދި ޗައިނާއިން ރާއްޖެ އަންނަ ފަތުރުވެރިން ރިސޯޓުތަކަށް ފައިސާ ދައްކާނީ ޔުއާނުންތޯ އާއި ދިވެހި ސަރުކާރާއި ޗައިނާގެ ޕީޕަލްސް ބޭންކާއެކު ސޮއި ކުރެވުނު އެމްއޯޔޫ އާއްމު ކުރާނެތޯ ސުވާލުކޮށްފައިވާނެއެވެ.

މި އެއްބަސްވުމާއި ގުޅޭގޮތުން އިކޮނޮމިކް މިނިސްޓްރީން ބުނެފައިވަނީ ރުފިޔާއިން މުއާމަލާތް ކުރަން ޗައިނާގެ މަރުކަޒީ ބޭންކާއެކު ސޮއިކުރި އެއްބަސްވުމުގެ ދަށުން ދިވެހި ވިޔަފާރިވެރިންނަށް ޗައިނާއިން އިމްޕޯޓު ކުރަން ފަސޭހަވާނެ ކަމަށާއި، ދެ ގައުމުގެ މެދުގައި ބޯޑަރު ހުރަސްކޮށް ކުރެވޭ އިންވެސްޓްމަންޓްތައް އިތުރުވާނެ ކަމަށެވެ.

މި އެއްބެސްވުމުގެ ސަބަބުން ރާއްޖެއާއި ޗައިނާއާ ދެގައުމުގެ ފައިސާއިން މުއާމަލާތްތައް ކުރުމަށް ފަސޭހަވާނެ ކަމަށް މިނިސްޓްރީން ބުނެއެވެ.

ރާއްޖެ އާއި ޗައިނާއާ ދެމެދު މިހާރު ވެސް އަހަރެއްގެ މައްޗަށް 700 މިލިއަން ޑޮލަރު ހަރަދުކުރެއެވެ. ރާއްޖެއަށް މުދާ އިމްޕޯޓު ކުރާ މައިގަނޑު އެއް ގައުމަކީ ވެސް ޗައިނާ އެވެ.