ދިވެހިރާއްޖެއިން މިއަދު ފެންނަނީ ޑިމޮކްރަޓިކް ހަމަތަކާއި އުސޫލުތަކާއި ދުރަށްދާތަން: ޝާހިދު
15 ސެޕްޓެމްބަރު 2024 | އާދީއްތަ 13:35ޑިމޮކްރަސީއެއްގައި ފަރުދެއްގެ ހައިސިއްޔަތުން އަދާކުރަން ޖެހޭ ޒިންމާ އަދާކުރުމަށް ޝާހިދު ގޮވާލެއްވި
އެމްޑީޕީގެ ރައީސް އަބްދުﷲ ޝާހިދު
ބައިނަލްއަގްވާމީ ޑިމޮކްރަސީ ދުވަސް މިއަދު ފާހަގަކުރަމުންދާއިރު، ދިވެހިރާއްޖެއިން މިއަދު ފެންނަނީ ޑިމޮކްރަޓިކް ހަމަތަކާއި އުސޫލުތަކާއި ދުރަށް ދާތަން ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އެކްސް ގައި ކުރެއްވި ޕޯސްޓެއްގައި ޝާހިދު ވިދާޅުވީ ޑިމޮކްރެޓިކް ހަމަތަކާއި ތަރައްގީ ވަނީ ގުޅިލާމެހިފައި ކަމަށެވެ.
އަދި ދިވެހިރާއްޖެ ޑިމޮކްރަސީގެ ދަތުރުގައި ހޯދާފައިވާ ކާމިޔާބީތަކާއި ދުރަށް ނުދިޔުމަށް ގަދައަޅައި މަސައްކަތްކުރަން ޖެހޭނެކަމަށާއި، ޚިޔާލުފާޅުކުރުމާއި، އެއްވެއުޅުމުގެ މިނިވަންކަމާއި، އިންސާނީ ހައްގުތަކާއި ގާނޫނުގެ ވެރިކަން ނެގެހެއްޓުމަށް މަސައްކަތްކުރަން ޖެހޭނެކަމަށް ޝާހިދު ވިދާޅުވިއެވެ
އެކަމާ ގުޅޭގޮތުން ރާއްޖެ.އެމްވީއާ ވާހަކަ ދައްކަވަމުން ޝާހިދު ވިދާޅުވީ، ގައުމެއް ތަރައްގީވެ، ކުރިއަރައިދަނީ ޑިމޮކްރެޓިކް ހަމަތައް ހިފެހެއްޓި، ޑިމޮކްރަސީގެ ހަމަތަކާއި އެއްގޮތްވާ ގޮތުގެ މަތިން ރައްޔިތުންގެ ހެވާއި ލާބަޔަށް ކުރެވޭ ރައްޔިތުންގެ ޑިމޮކްރެޓިކް ވެރިކަމެއް އޮވެގެންކަމަށެވެ.
އަދި މިފަދަ ވެރިކަމެއް އޮންނަކަން ޔަގީންކުރުމަށް ކޮންމެ ރައްޔިތަކުވެސް ޑިމޮކްރެޓިކް ހަމަތަކުގެ މަތިން ހައްގުތައް ހޯދުމަށް މަސައްކަތްކޮށް، ޑިމޮކްރަސީއެއްގައި ފަރުދެއްގެ ހައިސިއްޔަތުން އަދާކުރަން ޖެހޭ ޒިންމާ އަދާކުރުމަށް ޝާހިދު ގޮވާލެއްވިއެވެ.
