ކޮތަރެއް އުދުހުނަސް ރައީސްއަށް ހީވަނީ ސިހުރު ހަދާ ބަޣާވާތެއް ކުރަން އުޅޭހެން - ދީދީ
ޗާގޯސްގެ ވާހަކަ އެހުމުން އެކަމަށް މިއަދު ދޭނެ ޖަވާބެއްވެސް މި ސަރުކާރުގެ އިސްވެރިންގެ ނެތް
އައްޑޫ މަރަދޫ ދާއިރާގެ މެންބަރު ދީދީ
މުލީއާގެ މަތިން ކޮތަރު 'ބައިގަނޑެއް' އުދުހުނަސް ރައީސް ޑރ. މުހައްމަދު މުއިއްޒު އަށް ހީފުޅުވަނީ ބަޔަކު ސިހުރު ހަދާ ބަޣާވާތެއް ކުރަން އުޅޭހެން ކަމަށް އައްޑޫ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެއެވެ.
އެމްޑީޕީން ބޭއްވި ދަނޑިކޮށި ޖަގަހަ ޖަލްސާފައި ވާހަކަ ދައްކަވަމުން އައްޑޫ މަރަދޫ ދާއިރާގެ މެންބަރު އަހުމަދު ދީދީ ވިދާޅުވީ މުލިއާގެ މަތިން ކޮތަރު 'ބައިގަނޑެއް' ދިޔަޔަސް ދެކަމަކަށް ފެހި ސިގްނަލް އަންނަ ކަމަށެވެ. އެއްކަމަކީ ސިހުރެއް ކަމަށާއި، ނޫނީ ބަޣާވާތެއް ކަމަށެވެ. މިއީ ގައުމުގެ ވެރިމީހާގެ ހާލަތު ހުރި މިންވަރު ކަމަށާއި، ކަމެއްވާއިރަށް އެކަމެއް ތަހުގީގުކުރުމަށް ހޯމް މިނިސްޓަރަށް ދަންނަވަންޖެހޭ ކަމަށެވެ.
ރައީސްގެ ހާލުކޮޅަކީ މިއީ ކަމަށާއި، ގައުމާއި ދޭތެރޭގައި ވިސްނާނެ ވަގުތުކޮޅެއް އެމަނިކުފާނަކަށް ލިބިވަޑައިނުގަންނަވާ ކަމަށް ދީދީ ވިދާޅުވިއެވެ.
ދީދީ ވިދާޅުވީ ޗާގޯސް ކަނޑުވިއްކާލި ވާހަކަ މި ސަރުކާރުން ދައްކާ ވެރިކަމަށް އަންނަތާ 100 ދުވަސް ތެރޭގައި ކަނޑު ހޯދުމުގެ މަސައްކަތް ފަށާނެކަމަށް ބުނެ ދޮގު ހެދި ކަމަށެވެ. އަދި އައްޑޫއަށް މި ބޭބޭފުޅުން އައްޑޫ އަށް ވަޑައިގަތުމުން ޗާގޯސްގެ ވާހަކަ އެހުމުން އެކަމަށް މިއަދު ދޭނެ ޖަވާބެއްވެސް މި ސަރުކާރުގެ އިސްވެރިންގެ ނެތް ކަމަށް ދީދީ ވިދާޅުވިއެވެ.
ދީދީ ވިދާޅުވީ ރައީސް މުއިއްޒުގެ ވެރިކަމުގައި މަސްކިލޯއެއްގެ އަގު 20 ރުފިޔާއަށްވުރެ ދަށް ނުކުރާނެ ކަމަށް ވިދާޅުވި އިރު، މިއަދު 14 ރުފިޔާއަށްވެސް މަސްކިލޯއެއް ނުވިއްކޭ ކަމަށެވެ. މަސްވެރިންގެ އާމްދަނީ ހުސްވެ އިތުރު ގޮތެއް ނެތިފައި މަސްވެރިން އެބަތިބި ކަމަށާއި، މަސްވެރިން މިއަދު ތިބީ ގޮތް ހުސްވެފައި ކަމަށެވެ.
ދިދީ ވިދާޅުވީ ފަތުރުވެރިކަމާއި އިންވެސްޓްމަންޓް ދާއިރާވެސް އޮތީ މިފަދައިން ކަމަށެވެ. ސަރުކާރުން ކުރާހާވެސް ކަމަކީ ދޮގު ހެދުމާއި އޮޅުވާލުން ކަމަށާއި، ރާއްޖޭގެ ރައްޔިތުންނަށް ކުރީ ސަރުކާރުން ކޮށްދިން ކަންކަންވެސް ހުއްޓާލާފައިވާ ކަމަށެވެ. އަދި މިއީ ނާގާބިލު ސަރުކާރެއް ކަމަށާއި، ރައްޔިތުންނަށް މި ސަރުކާރުން ކުރި ފައިދާއެއް ނެތް ކަމަށެވެ.
