ފީފާ ވޯލްޑް ކަޕް ކޮލިފިކޭޝަންގައި ޕެރަގުއ އަތުން ބްރެޒިލް ބަލިވުމާއެކު، ބްރެޒިލްގެ އެންމެހާ ސަޕޯޓަރުންގެ ކިބައިން މައާފަށް އެދެން ބޭނުންވާ ކަމަށް ވިނީޝިއުސް ޖޫނިއާ ބުނެފި އެވެ.

އެންމެ ފަހުން މިއަހަރު އެމެރިކާގައި ކުރިއަށް ދިޔަ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގައި ވެސް ބްރެޒިލަށް އެކަށީގެންވާ ނަތީޖާއެއް ނުނެރެވެ އެވެ. އޭގެ ފަހުން އެންމެ ފަހުން ކުޅުނު ވޯލްޑް ކަޕް ކޮލިފިކޭޝަން މެޗުތަކުގައި ވެސް ބްރެޒިލްގެ ނަތީޖާ ރަނގަޅެއް ނޫނެވެ. ފުރަތަމަ މެޗުގައި ބްރެޒިލް އިން ވަނީ އެކުއެޑޯ ބަލިކޮށްފަ އެވެ. ނަމަވެސް ދެ ވަނަ މެޗުގައި ޕެރަގުއޭ އަތުން ބްރެޒިލް ވަނީ ބަލިވެފަ އެވެ.

އެ މެެޗުގެ ނަތީޖާއާ ގުޅޭ ގޮތުން ވާހަކަ ދައްކަމުން ވިނީޝިއުސް ބުނީ، ކުޅެން ޖެހޭ ދަނޑު ތަފާތުވުމުން ކޮންމެ ވެސް ވަރަކަށް އުނދަގޫވާ ކަމަށެވެ. ޚާއްސަކޮށް ބޯޅަ އާއެކު ކުޅެން އުނދަގޫތަކެއް ހުންނަ ކަމަށާއި، އެކަމަށް ހޭނި އެންމެ ރަނގަޅަށް ކުޅެން މަސައްކަތް ކުރަން ޖެހޭ ކަމަށް ވެސް އޭނާ ވަނީ ބުނެފަ އެވެ.

މީގެ އިތުރުން ވިނީޝިއުސް ބުނީ ބްރެޒިލްގެ ސަޕޯޓަރުންގެ ކިބައިން އޭނާ މައާފަށް އެދެން ބޭނުންވާ ކަމަށެވެ. ބްރެޒިލްގެ ސަޕޯޓަރުން އުންމީދު ކުރި ނަތީޖާ ނުނެރެވޭއިރު، މިއީ އުނދަގޫ ވަގުތަކަށް ވާނެކަން ޤަބޫލު ކުރާ ކަމަށް ވެސް ވިނީޝިއުސް ވަނީ ބުނެފަ އެވެ. އެހެން ނަމަވެސް، ބްރެޒިލްގެ ސަޕޯޓަރުންނަށް ދޭން އޮތް ޔަޤީންކަމަކީ، ބްރެޒިލް އެނބުރި އަންނާނެ ކަމުގެ ޔަޤީންކަން ކަމަށް ވެސް އޭނާ ވަނީ ބުނެފަ އެވެ.

ކޮލިފިކޭޝަންގައި ދެން ބްރެޒިލް ކުޅެން ޖެހޭނީ ޗިލީއާ ދެކޮޅަށެވެ. މިހާތަނަށް ކުޅުނު އަށް މެޗުން 10 ޕޮއިންޓާއެކު ބްރެޒިލް އޮތީ ފަސް ވަނައިގަ އެވެ.