ޕީއެންސީގެ މަޖިލިސް މެންބަރުންނަށް ފައިސާ ދިންކަމަށް ބުނި އޮންލައިން ނޫހަކާ ދޭތެރޭ ގާނޫނީ ފިޔަވަޅު އަޅަނީ

ޕީއެންސީގެ މަޖިލިސް މެންބަރުންނަށް ފައިސާ ދިންކަމަށް ބުނާ ވާހަކަ އަކީ ކަނޑައެޅިގެން ދޮގެއް ކަމަށާއި، މި މައްސަލަ ކަމާބެހޭ ފަރާތްތަކަށް ހުށަހަޅައި، ޤާނޫނީ ފިޔަވަޅު އެޅުމުގެ މަސައްކަތް ކުރަމުންދާ ކަމަށް ޗީފް ސްޕޯކްސްޕާރސަން ހީނާ ވަލީދު ވިދަޅުވެއްޖެ އެވެ.

ޕީއެންސީގެ މަޖިލިސް މެންބަރުންނަށް ފައިސާ ދިންކަމަށް ބުނެ އޮންލައިން ނޫހެއްގައި ޝާއިޢުކޮށްފައިވާ ޚަބަރަކާ ގުޅިގެން ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ، އެއީ ކަނޑައެޅިގެން ހަގީގަތާ ޚިލާފު ދޮގު ޚަބަރެއް ކަމަށެވެ. އަދި ދޮގު ޚަބަރު ފަތުރާފައިވަނީ "ފިތުނަ އުފެއްދުމުގެ ބޭނުމުގައި" ކަމަށެވެ. މި މައްސަލަ ކަމާބެހޭ ފަރާތްތަކަށް ހުށަހަޅައި، ޤާނޫނީ ފިޔަވަޅު އެޅުމުގެ މަސައްކަތް ކުރަމުންދާ ކަމަށްވެސް ހީނާ ވިދާޅުވި އެވެ.

މީގެއިތުރުން، ރައީސުލްޖުމްހޫރިއްޔާއާއި ރައްޔިތުންގެ މަޖިލީހުގެ މެންބަރުންނަށް ނިސްބަތްކޮށް ފާޅުގައި ދޮގު ޚަބަރު ފަތުރަމުންދާ ފަރާތްތަކާމެދު ސަމާލުވުމަށް ދިވެހި ރައްޔިތުންނަށް އިލްތިމާސްކުރައްވާފައިވެއެވެ. މި މައްސަލައާ ގުޅޭގޮތުން އިތުރު ތަފްސީލެއް ހާމަކޮށްފައި ނުވިނަމަވެސް، ރައީސް އޮފީހުން މި މައްސަލަ ވަރަށް ސީރިއަސްކޮށް ބަލަމުންދާކަން ހީނާގެ ޕޯސްޓުން ހާމަވެއެވެ.

ވެރިކަން ކުރާ ޕީއެންސީ އަށް ނިސްބަތްވާ ރައްޔިތުންގެ މަޖިލީހުގެ މެންބަރުންނަށް ރައީސް ޑރ. މުހައްމަދު މުއިއްޒުގެ ފަރާތުން ކޮންމެ މެންބަރަކަށް 75،000ރ. ދޫކޮށްފައިވާ ކަމަށް ބުނެ ބައެއް މީޑިއާ ތަކުގައި ރިޕޯޓްކޮށްފައި ވެއެވެ.