ނެދަލެންޑްސް އިން ޖަރުމަނާ އެއްވަރު ކޮށްފި

ޔުއެފާ ނޭޝަންސް ލީގު އޭގެ، ގްރޫޕް ތިނެއްގައި ޖަރުމަނާ ދެކޮޅަށް ކުޅުނު މެޗު ނެދަލެންޑްސް އިން އެއްވަރު ކޮށްފި އެވެ.

އަންގާރަ ދުވަހުގެ ރޭ ކުޅުނު މެޗު އެއްވަރުވީ 2-2 އިންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ ނެދަލެންޑްސް އިންނެވެ. ނަމަވެސް ޖަރުމަނުން ފަހަތުން އަރައި ދެ ލަނޑު ޖަހައިގެން ލީޑު ނެގި އެވެ. ނެދަލެންޑްސް އިން މެޗުގެ ނަތީޖާ ހަމަހަމަ ކުރީ ދެ ވަނަ ހާފުގައި ލަނޑު ޖަހައިގެންނެވެ.

މެޗު ފަށައިގެން ދެ ވަނަ މިނެޓުގައި ނެދަލެންޑްސް އަަށް ލީޑު ނަގައިދިނީ ޓިޖާނީ ރައިންޑާސް އެވެ. އޭނާ އެ ލަނޑު ޖެހީ ރަޔާން ގްރަވެންބާކް ތަނަވަސްކޮށްދިން ފުރުސަތެއްގަ އެވެ. ނަމަވެސް މެޗުގެ ފުރަތަމަ ހާފުގެ 38 ވަނަ މިނެޓުގައި ޖަރުމަނުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ޑެނީސް އުންޑާވް އެވެ. އޭގެ ފަހުން ފުރަތަމަ ހާފުގެ އިތުރު ވަގުތުގައި ޖަރުމަނަށް ލީޑު ނަގައިދިނީ ޔޯޝުއާ ކިމިކް އެވެ. މެޗުގެ ދެ ވަނަ ހާފުގައި ނެދަލެންޑްސް އަށް ނަތީޖާ ހަމަހަމަ ކޮށްދިނީ ޑެންޒެލް ޑަމްފްރީސް އެވެ.

މި ގުރޫޕުގައި ކޮންމެ ޓީމަކުން ވެސް ދެ މެޗު ކުޅެފައިވާއިރު، އެއް ވަނައިގައި ޖަރުމަނު އޮތީ ހަތަރު ޕޮއިންޓާ އެކު އެވެ. ދެ ވަނައިގައި ނެދަލެންޑްސް އަށް ވެސް ހަތަރު ޕޮއިންޓު ލިބޭއިރު، ލަނޑުގެ ގޮތުން ކުރި ހޯދަނީ ޖަރުމަނެވެ.