ނ ހޮޅުދޫގައި ކަރުގައި ވަޅި އަޅާފައި އޮތް އަންހެނަކު ފެނިއްޖެއެވެ.

މައުލޫމާތު ލިބޭ ގޮތުގައި މަރުވެފައި އޮއްވައި ފެނިފައިވަނީ ނ ހޮޅުދޫ ނިއުލައިފް ޒަކިއްޔާ މޫސާއެވެ.

މި ޙާދިސާގެ މައުލޫމާތު ފުލުހުންނަށް ރިޕޯޓު ކޮށްފައިވަނީ ހެނދުނު 10:10 އެހާއިރުކަމަށް ފުލުހުން މައުލޫމާތު ދެއެވެ.

މައުލޫމާތު ލިބޭ ގޮތުގައި އޭނާ އޮތީ މަރުވެފައެވެ. އޭނާ ކަރުގައި ވަޅި އަޅާފައިވާއިރު، އޭނާ ގާތުގައި މަސް ކަނޑާ ޒާތުގެ ވަޅިއެއް އޮތެވެ. އޭނާގެ ހަށިގަނޑު ފެނުނީ އޭނާ ދިރިއުޅޭ ގޯތި ތެރެއިންނެވެ. ހަށިގަނޑު އޮތީ ގެއާއި ގުދަނާ ދޭތެރޭގައި ބިންމަތީގައެވެ.

އެކަމާ ގުޅޭގޮތުން ފުލުހުންގެ މީޑިއާ އޮފިޝަލު ވިދާޅުވީ، ނ ހޮޅުދޫ ގެއެއްގައި ޒަޚަމްތަކާއެކު އަންހެނަކު އޮތްކަމަށް އަންގާރަ ދުވަހުގެ ހެނދުނުގެ ވަގުތެއްގައި ރިޕޯޓު ލިބިގެން ފުލުހުން އެޓެންޑް ވެފައިވާ ކަމަށާއި އެމީހާ ހެލްތް ސެންޓަރަށް ގެންދިޔަ ކަމަށެވެ.

އެމީހާ ނިޔާވެފައިވާކަމަށް ހެލްތް ސެންޓަރުން ވަނީ ފުލުހުންނަށް މައުލޫމާތު ދީފައެވެ. އެއީ 50 އަހަރުގެ ދިވެހި އަންހެނެއްކަމަށް ފުލުހުން މައުލޫމާތު ދެއެވެ.

އެ ރަށުން މައުލޫމާތު ދިން މީހަކު ކިޔާދިން ގޮތުގައި އަންހެން މިހާއަށް ނިޔާވެފައި އޮއްވައި ފެނިފައިވަނީ އަންގާރަ ދުވަހުގެ ހެނދުނުގެ ވަގުތެއްގައެވެ.

ރަށުން މައުލޫމާތު ދިން މީހުންވެސް ބުނީ އޭނާގެ ކަރުގައި ވަޅި އަޅާފައިވާ ކަމަށާއި، އެ ތަނުގައި ގިނަ އަދަދެއްގެ ލޭ ހުރިކަަމަށެވެ.

އޭނާ އުޅެނީ މީހަކާ އިނދެގެންނެވެ. އެގޮތުން އޭނާގެ ދެ ފިރިހެން ދަރިން ތިބެއެވެ. އެގޭގައި ދިރިއުޅެނީ އޭނާގެ ފިރިމީހާއާއި، އެއް ފިރިހެން ދަރީގެ އިތުރުން އޭނާ ކައިވެނި ކޮށްގެން އުޅޭ އަންހެން ކުއްޖާއެވެ.

މިކަމާ ގުޅިގެން ފުލުހުން ގެންދަނީ ޙަލަކާތްތެރިވަމުންނެވެ.