އިޒްރޭލުން ޣައްޒާގެ ދެކުނުގައިވާ ޚާން ޔޫނިސް ކައިރީގައިވާ ޓެންޓު ކޭމްޕް – އަލް-މަވާސީ އަށް ހަމަލާދީ، މަދުވެގެން 40 މީހުން ޝަހީދުކޮށްލައި، 65 މީހުން ޒަޚަމްކޮށްލައިިފި ކަމަށް ޣައްޒާގެ ސިވިލް ޑިފެންސުން ބުނެފިއެވެ.

ބައިނަލްއަގްވާމީ ގާނޫނުތަކަށް ތަކުރާރުކޮށް ޚިލާފްވެފައިވާ، އިޒްރޭލު ސިފައިންގެ ބަޔާނެއްގައި އަންގާރަ ދުވަހު ބުނެފައިވަނީ އެމީހުންގެ ފައިޓަރ ޖެޓްތަކުން އަމާޒުކުރީ ހަމާސްގެ ކޮމާންޑް ސެންޓަރަކަށް ކަމަށާއި، ހަމަލާ ދިނުމުގައި އާންމުންނަށް ވީހާވެސް ގެއްލުން ކުޑަވާނެ ގޮތް ބަލާފައިވާނެ ކަމަށެވެ.

ހިއުމެނިޓޭރިއަން ޒޯނެއްގެ ގޮތުގައި އިޒްރޭލުން ކަނޑައަޅާފައިވާ މި ޓެންޓް ކޭމްޕަށް މަދުވެގެން 4 މިސައިލް އެރިކަމަށް އެތަނުގައި ދިރިއުޅޭ މީހުންނާ ހަވާލާދީ މީޑިއާ ރިޕޯޓްތައް ބުނެއެވެ.

މި ކޭމްޕަކީ ޣައްޒާގެ އެކި ސަރަހައްދުތަކުން އިޒްރޭލުގެ ހަމަލާތަކުގެ ސަބަބުން ގެދޮރު ގެއްލިފައިވާ މީހުން އައިސް ތޮއްޖެހިފައިވާ ތަނެއް ކަމަށް ޚަބަރުތައް ބުނެއެވެ.

ޣައްޒާގެ ސިވިލް ޑިފެންސް ޚިދުމަތުން ބުނެފައިވަނީ މަދުވެގެން 20 ޓެންޓުގައި އަލިފާން ރޯވެ، އަދި މިސައިލްތަކުގެ ސަބަބުން 9 މީޓަރު (30 ފޫޓު) ފުންމިނުގެ ވަޅުގަނޑުތައް އުފެދިފައިވާ ކަމަށެވެ. އެ ފަރާތުން ބުނެފައިވަނީ ޝަހީދުވި މީހުންނާއި ޒަޚަމްވި މީހުންގެ ތެރޭގައި އަންހެނުންނާއި ކުޑަކުދިން ހިމެނޭ ކަމަށެވެ.

ޣައްޒާ ކޮންޓްރޯލް ކުރާ ހަމާސްއިން އިސްރޭލުން ދެއްކި މި ހަމަލާގެ ސަބަބު ވަނީ ދޮގުކޮށްފައެވެ. ހަމާސް އިން ބުނީ ހަމަލާ ދިން ކޭމްޕްގައި ހަނގުރާމަވެރިން ނުތިބޭނެ ކަމަށެވެ.

ހަމާސް ގެ ބަޔާނުގައި ބުނެފައިވަނީ މި ހަމަލާ ދިނީ ހަމާސްގެ ކޮމާންޑް ސެންޓަރަކަށް ކަމަށް އިޒްރޭލުން ބުނާ ބުނުމަކީ މި ހުތުރު ޖަރީމާ ފޮރުވަން ދައްކާ ބަހަނާއެއް ކަމުގައެވެ.

އާންމުން ދިރިއުޅޭ ތަންތަނުގައި ހަނގުރާމަވެރިން ތިބޭ ކަމަށް އިޒްރޭލުން ބުނާ ބުނުން އެތައް ފަހަރަކު ހަމާސް އިން ވަނީ ދޮގުކޮށްފައެވެ.

އަނެއްކޮޅުން، ޣައްޒާގެ އުތުރުގައި ހިންގާ ޕޯލިއޯ ވެކްސިންދިނުމުގެ ކެމްޕޭނަށް އިޒްރޭލު ސިފައިން ގެންދަނީ އެކިގޮތްގޮތުން ދުއްތުރާތައް ކުރިމަތިކުރުވަމުންނެވެ.

އަންރްވާގެ ވެރިޔާ ފިލިޕް ލަޒަރިނީ ވިދާޅުވީ، އެއީ އިޒްރޭލު ސިފައިން އ.ދ.ގެ މުވައްޒަފުންނަށް ބަޑިން ބިރުދައްކާ ހިފަހައްޓައިފައިވާ ކަމަށާއި، އިޒްރޭލުގެ ބުލްޑޯޒަރުތަކުން އ.ދ.ގެ އުޅަނދުތަކަށް ގެއްލުން ދީފައިވާ ކަމަށެވެ.

އިޒްރޭލުން ޣައްޒާއަށް ދެމުންދާ ހަމަލާތަކުގައި ޝަހީދުވި މީހުންގެ އަދަދު މަދުވެގެން 40,988 ށް ވަނީ އަރާފައެވެ. އިޒްރޭލުގެ ހަމަލާތަކުގައި މަދުވެގެން 94,825 މީހުން ވަނީ ޒަޚަމްވެފައެވެ.