އަތުހަރުގެ މަރުގެ މައްސަލައިގައި ފުލުހުންގެ އަގުވެއްޓެނީ މިނިސްޓަރުގެ ސަބަބުން - މާރިޔާ
ހޯމް މިނިސްޓަރު ނުކުމެވަޑައިގެން އަތުހަރުގެ މަރުގެ މައްސަލައިގައި ބަލަންޖެހޭނެ ކަމެއް ނެތްކަމަށް ވިދާޅުވުމަކީ ދެރަކަމެއް
ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ
ފުލުހުންގެ ބެލުމުގެ ދަށުގައި ހުއްޓާ ނިޔާވި އާދަމް އަތުހަރުގެ މަރުގެ މައްސަލައިގައި ފުލުހުންގެ އަގުވެއްޓެނީ ހޯމް މިނިސްޓަރު އަލީ އިހުސާނުގެ ސަބަބުން ކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
އެމްޑީޕީގެ ހަވަރު ބެރު ޕެނަލް ޑިސްކަޝަންގައި ހޯމަ ދުވަހުގެ ރޭ ވާހަކަ ދައްކަވަމުން މާރިޔާ ވިދާޅުވީ އެމްޑީޕީއަކީ ފެށުނީއްސުރެވެސް ހައްޔަރުގައި ތިބޭ މީހުންނަށް ކުރާ އަނިޔާއާއި ދެކޮޅަށް މަސައްކަތް ކުރަމުން އަންނަ ބައެއް ކަމަށެވެ. އީވާން ނަސީމް އާއި ހުސައިން ސޮލާހުގެ ވާހަކަ ފާހަގަކުރައްވައްވަމުން މާރިޔާ ވިދާޅުވީ އެއީ ކަންބޮޑުވާ ކަންކަން ކަމަށާއި، ފެށުނީއްސުރެ އެވާހަކަ އެމްޑީޕީން ދައްކަމުން އައިސްފައިވާ ކަމަށެވެ. މާރިޔާ ވިދާޅުވީ އަތުހަރު ކުރި ކަމަކީ ގޯސްކަމެއް ކަމަށާއި، އެކަމަށް އަދަބު ކަނޑައެޅި އަދަބު ލިބެންޖެހޭނެ ކަމަށެވެ.
ކަސްޓަޑީގައި ތިބޭ ފަރާތްތައް އަދަބު ލިބުމާ ހަމައަށް ގެންދަންޖެހުމުގެ ޒިންމާ ދައުލަތުގެ މައްޗަށް އޮންނަ ކަމަށެވެ. އަދި ޖަލުތަކާއި ޕެރޯލްގެ ގާނޫނޫގައި ގައިދީން ބަލަހައްޓަންޖެހޭ ގޮތްތައް އޮންނަ އިރު އަދި އާއިލާގެވެސް އެތައް ކަންބޮޑުވުންތަކެއް ހުއްޓާ ހޯމް މިނިސްޓަރު ނުކުމެވަޑައިގެން އަތުހަރުގެ މަރުގެ މައްސަލައިގައި ބަލަންޖެހޭނެ ކަމެއް ނެތްކަމަށް ވިދާޅުވުމަކީ ދެރަކަމެއް ކަމަށެވެ.
މާރިޔާ ވިދާޅުވީ ފުލުހުންގެ އެތެރޭގައިވެސް ކަންކަން ބެލެން އޮންނަ ކަމަށާއި، ޕޮލިސް އިންޓެގްރިޓީ ކޮމިޝަން އޮވެ ފާއިތުވި 5 އަހަރު ފުލުހުންގެ ތެރޭގައި ހުރި ކަންކަން ރަނގަޅުކުރުމަށް ގިނަ މަސައްކަތްތަކެއް ކުރެވިފައިވާ ކަމަށެވެ. ނަމަވެސް ސިޔާސީ ގޮތުން ހޯމް މިނިސްޓަރު ނުކުމެވަޑައިގެން ފުލުހުންނަށް ފުރުސަތު ނުދެއްވާ އަމިއްލަފުޅަށް އެވާހަކަ ދެއްކުމުގެ ސަބަބުން ފުލުހުންގެ އަގު ރައްޔިތުންގެ ކުރިމަތީގައި ވެއްޓެމުންދާ ކަމަށެވެ.
