އެސްޓީއޯގެ ދަށަށް ފެނަކަ ގެންގޮސް ވަގުތީ މުވައްޒަފުން ކަނޑާލާނެ ކަމަށް ގަބޫލުކުރެވޭ: ޝަރީފް

އެސެޓުގެ ވެލިއުއަަށް ބަލާލާއިރު ފެނަކައަކީ ބަނގުރޫޓްވެފައިވާ ކުންފުންޏެކޭ ބުނެވޭނެ ޖާގައެއް ނެތް ކަމަށް ސްޓެލްކޯގެ ކުރީގެ މެނޭޖިންގ ޑިރެކްޓަރު އަހުމަދު ޝަރީފް ވިދާޅުވެއްޖެއެވެ.

އެމްޑީޕީގެ ހަވަރު ބެރު ޕެނަލް ޑިސްކަޝަންގައި ވާހަކަ ދައްކަވަމުން އަންގާރަ ދުވަހުގެ ރޭ ޝަރީފް ވިދާޅުވީ އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހެދުމުގެ ވާހަކަ ވަރަށް ބާރަށް ދެކެވެމުން އަންނަ ކަމަށެވެ. ފެނަކަ އަކީ ރާއްޖޭގެ އެންމެ ބޮޑު އެއް އޮޕަރޭޝަން ހިންގާ ކުންފުނި ކަމަށެވެ. 4 އަތޮޅު ފިޔަވައި އެހެން ހުރިހާ އަތޮޅެއްގައި އަސާސީ ހިދުމަތް ދެމުން އަންނަ ކުންފުންޏަކަށް ވެފައި، ގިނަ އާއިލާތަކަކާއި ސީދަ ގުޅިފައިވާ ކުންފުންޏެއް ކަމަށް ޝަރީފް ވިދާޅުވިއެވެ.

ޝަރީފް ވިދާޅުވީ ފެނަކަ އެސްޓީއޯގެ ދަށަށް ގެންދަނީ ހަރަދުކުޑަކުރަން ކަމަށް ވާހަކަ ދެކެވުނު ނަމަވެސް ހަރަދުކުޑަރާނެ ގޮތުގެ ތަފްސީލެއް ދީފައި ނުވާ ކަމަށެވެ. އަދި މި ނިންމުމުގައި ފޮރުވިފައިވާ ބޮޑު އެޖެންޑާއެއް ހިމެނޭކަމަށް ޝަރީފް ވިދާޅުވިއެވެ.

ޝަރީފް ވިދާޅުވީ ފެނަކައިގެ ދާއިމީ މުވައްޒަފުންނަށް 23 މިލިއަން ރުފިޔާ ހަރަދުވާ އިރު، ވަގުތީ މުވައްޒަފުންނަށް 60 އާއި 70 މިލިއަން ރުފިޔާ ހަރަދުކުރާ ކަމަށެވެ. އަދި އެސްޓީއޯގެ ދަށަށް ފެނަކަ ގެންގޮސް ވަގުތީ މުވައްޒަފުން ކަނޑާލާނެ ކަމަށް ގަބޫލުކުރެވޭ ކަމަށާއި، މިއީ އެތަކެއް އާއިލާއަށް އެކަމުގެ ސަބަބުން އަސަރުކުރާނެ ކަމެއް ކަމަށް ޝަރީފް ވިދާޅުވިއެވެ.

ޝަރީފް ވިދާޅުވީ އެސްޓީއޯގެ ދަށަށް ފެނަކަ ގެންދިއުމުގެ ބަދަލުގައި ސްޓެލްކޯގެ ދަށަށް ބަދަލުކުރި ނަމަ ޓެކްނިކަލް ގޮތުން ކުންފުންޏަށް ބޮޑަށް ފައިދާވާނެ ކަމަށެވެ.